ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙްގެ ސަރުކާރުން ހިންގަވާ ބިންވެރިޔާ މަޝްރޫއިން ގޯތި ލިބޭނެކަމަށް އެންގި ފަރާތްތަކަށް ޑރ މުހައްމަދު މުއިއްޒުގެ ސަރުކާރެއްގައި އެފަރާތްތަކުން އެދޭނަމަ ގެދޮރު އަޅައިދީ ނިންމައި ހަވާލުކުރާ ސްކީމެއް ތައާރަފްކޮށްދޭނެ ކަމުގައި އިއުލާނުކޮށްފިއެވެ. 

މިރޭ ހުޅުމާލެ ދެވަނަ ފިޔަވަހީގައި ކުރިއަށްދާ ޕީޕީއެމް/ޕީއެންސީގެ ރިޔާސީ މެނިފެސްޓޯ އިއުލާންކުރުމުގެ ޖަލްސާގައި އިއުލާންކޮށްފައިވާ ގެދޮރުވެރިކަމާއި އަރބަނައިޒޭޝަންގެ ދަށުން އިއުލާނުކޮށްފައިވާ މެނިފެސްޓޯގައި ބުނެފައިވަނީ، ބިންވެރިޔާ ޕްރޮގްރާމްގެ ތެރެއިން ގޯތި ލިބޭނެކަމަށް ބުނެފައިވާ ފަރާތްތަކުގެ ތެރެއިން އެކަމަށް އެދޭ ފަރާތްތަކަށް ސަރުކާރުގެ ހާއްސަ ސްކީމެއްގެ ދަށުން ލިބިފައިވާ ގޯތީގައި ގެދޮރު އިމާރާތްކޮށް ލިބިފައިވާ ގޯތީގައި ނިމިފައިވާ ގެޔަކާއެކު ހަވާލުކުރެވޭނެ މަގު ތަނަވަސްކޮށްދެއްވާނެ ކަމަށެވެ. 

މީގެ އިތުރުން އެ މެނިފެސްޓޯގައި ބުނެފައިވަނީ ގޯތި ލިބުނު ފަރާތްތަކަށް ލިބުނު ގޯއްޗަކީ ހުސް ބިމެއްގައި ނުވަތަ ނުހިއްކައި އޮތް ތަނެއްގައި އޮތް އޮތުން ބަދަލުކޮށް ގޯތި ލިބުނު ރައްޔިތުންނަށް ގެދޮރުވެރިކަމުގެ ހަގީގީ އުފާ ކަށަވަރުކޮށްދޭނެ ކަމަށެވެ.

ހަމައެއާއެކު އަމިއްލަ ފަރުދުން ގެދޮރު އިމާރާތް ކުރަން ފަށައި، އެކި ސަބަބުތަކާއި ހުރެ ކުރިއަށް ނުގެންދެވި ހުއްޓިފައިވާ މަސައްކަތްތައް ކުރިއަށް ގެންދިއުމަށްޓަކައި ލުއި ބޭންކް ލޯން ސްކީމެއް ތައާރަފް ކުރާނެކަމުގައިވެސް އެ މެނިފެސްޓޯގައިވެއެވެ.

އަދި މީގެ އިތުރުންވެސް ޕީޕީއެމް/ޕީއެންސީގެ ސަރުކާރެއްގައި ގޯތި ލިބޭ އެންމެހައި ފަރާތްތަކަށްވެސް މި ސްކީމުގެ ދަށުން ގޯތި ހަދައިދެވޭނެކަމަށް ބުނެފައިވެއެވެ. 

ރައީސް އިބްރާހިމް މުހައްމަދު ޞާލިހްގެ ސަރުކާރުން ބިންވެރިޔާ ޕްރޮގްރާމްގެ ތެރެއިން ގުޅީފަޅުންނާއީ ފުށިދިއްގަރު ފަޅުން ގޯތި ދޫކުރަމުން ދާއިރު މި ތަންތަނަކީ އަދި ނުވެސް ހިއްކާ ފަޅުތަކަކަށް ވުމުން އެކަމުގެ ފާޑުކިޔުން ވަރަށް ބޮޑަށް ރައީސް ޞާލިޙްގެ ސަރުކާރަށް އަންނަނީ ރައްދުވަމުންނެވެ.