ކުރީގެ ރައީސް ޔާމިންގެ ވެރިކަމުގައި ހިންގި ހިޔާ މަޝްރޫއިން ފްލެޓް ލިބޭނެކަމަށް 2018 ގައި އާންމުކުރި ލިސްޓުގައި ނަން ހިމެނުނު ފަރާތްތަކުގެ ތެރެއިން މިހާރުގެ ސަރުކާރުން އެ ލިސްޓުން ނަން އުނިކުރި އެންމެހައި ފަރާތްތަކަށްވެސް ޑރ މުހައްމަދު މުއިއްޒުގެ ވެރިކަމެއްގައި ހިންގާ ސޯޝަލް ހައުސިން ޔުނިޓްތަކުން ފްލެޓް ދޭނެކަމުގައި މިރޭ އިއުލާންކުރަމުންދާ ޕީޕީއެމް/ޕީއެންސީގެ ރިޔާސީ މެނިފެސްޓޯގައި ބުނެފިއެވެ.

ހުޅުމާލެ ދެވަނަ ފިޔަވަހީގައި އޮތް މި ޖަލްސާގައި އިއުލާންކޮށްފައިވާ ގެދޮރުވެރިކަމާއި އަރބަނައިޒޭޝަންގެ ދަށުން އިއުލާނުކޮށްފައިވާ މެނިފެސްޓޯގައި ބުނެފައިވަނީ، ރައީސް ޞާލިހުގެ ސަރުކާރުން ފްލެޓުން މަހުރޫމު ކުރި އެންމެހައި ފަރާތްތަކަށްވެސް މުއިއްޒުގެ ސަރުކާރެއްގައި ފްލެޓް ދެވިގެންދާނެ ކަމުގައެވެ.

މީގެ އިތުރުން މި މެނިފެސްޓޯގައި ބުނެފައިވަނީ ގެދޮރުވެރިކަމަކީ، ޤާނޫނު އަސާސީން ލިބިދޭ ހައްގެއްކަން ފުރިހަމައަށް ބަލައިގަނެ އެކަން ކަށަވަރުކުރަން ގާނޫނުތައް އެކުލަވާލައި ސިޔާސަތުތައް ރާވައި ތަންފީޒުކުރާނެކަމުގައެވެ.

Advertisement

އަދި މީގެ އިތުރުންވެސް މާލޭގައި ހުރި އެދެވޭގޮތުގައި ބޭނުން ނުކުރާ ބިންތައް ހުސްކޮށް 2000 ހައުސިންގް ޔުނިޓް ގާއިމްކޮށް ފްލެޓަށް އެދޭ މާލޭގެ ރައްޔިތުންނަށް ފޯރުކޮށްދޭނެކަމުގައި އެ މެނިފެސްޓޯގައި ވަނީ ބުނެފައެވެ.

އަލަށް ފެށޭ ސޯޝަލް ހައުސިން ސްކީމްތަކުގައި ޒުވާން އާއިލާތަކަށް ހާއްސަކުރެވިގެން ދެ ކޮޓަރީގެ 3000 އެޕާޓްމެންޓް ގާއިމްކުރުމުގެ އިތުރުން، އެކަނިވެރި މައިންނާއި އެކަނިވެރި ބަފައިންނަށް ދެ ކޮޓަރީގެ 1000 އެޕާޓްމެންޓް ހިމެނުމާއީ، ހާއްސަ އެހީއަށް ބޭނުންވާ ކުދިންނަށް ހާއްސަކޮށްގެން ދެ ކޮޓަރީގެ 500 އެޕާޓްމެންޓް ގާއިމްކުރާނެކަމަށް މިރޭ އިއުލާންކުރި ޕީޕީއެމް/ޕީއެންސީގެ ރިޔާސީ މެނިފެސްޓޯގައި ވަނީ ހިމަނާފައެވެ. 

ރިޔާސީ އިންތިހާބުގެ ކެމްޕެއިންގައި ޑރ މުހައްމަދު މުއިއްޒުގެ މެނިފެސްޓޯ މިރޭ އިއުލާނުކުރަން ފަށައިފައިވާއިރު މި މެނިފެސްޓޯގެ ދަށުން ބޯހިޔާވަހިކަަމާ ގުޅުންހުރި ގިނަ ވައުދުތަކެއް ވެ ވަޑައިގަންނަވަމުން އަންނަކަން ފާހަގަކޮށްވެއެވެ.