ޕްރޮގްރެސިވް ކޮންގްރެސް ކޯލިޝަންގެ ސަރުކާރު ވެގެންދާނީ ރައްޔިތުން ބޭނުންވާ ނަތީޖާ ނެރެދޭނެ ފަދަ ސަރުކާރަކަށް ކަމަށް އެ ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ވިދާޅުވެއްޖެ އެވެ.
ޑރ މުއިއްޒު މިފަދައިން ވިދާޅުވެފައި ވަނީ އައްޑޫ ސިޓީއަށް އެމަނިކުފާނު ކުރައްވާ ރިޔާސީ ކެމްޕޭނު ދަތުރުފުޅުގައި އައްޑޫ ސިޓީ ފޭދޫއަށް ވަޑައިގެން އެ ރަށުގެ ރައްޔިތުންނާއި މުޚާބަތުކޮށް ވާހަކަދައްކަވަމުން ނެވެ.
އެގޮތުން ޑރ މުއިއްޒު ވިދާޅުވީ ފޭދޫގެ ތަރައްގީއަށް ކުރަންހުރި މަސައްކަތްތައް ވަރަށް ގިނަ ކަމަށެވެ. އޭގެ ތެރޭގައި ބޯހިޔާވަހިކަމުގެ މައްސަލަ ޙައްލުކުރުމާއި، މަގުތަށް ހެދުމާއި، ސުކޫލުގެ ޖާގަ ބޮޑުކުރުމުގެ އިތުރުން ފޭދޫގައި ފަތުރުވެރިކަމުގެ ސިނާއަތު ފުޅާކުރުމަށް ކުރަންޖެހޭ އިޤްތިޞާދީ މަސައްކަތްތައް ހުރިކަން ޑރ މުއިއްޒުގެ ވާހަކައި ފާހަގަކުރެއްވި އެވެ.
އަދި ފޭދޫގެ ރައްޔިތުން އެންމެ ބޮޑަށް އުންމީދުކުރަމުންދަނީ ބްރިޖުގެ މަސައްކަތް ކަމަށާއި، އެ ހުރިހާ ކަމެއް ޕްރޮގްރެސިވް ކޮންގްރެސް ކޯލިޝަންގެ ވެރިކަމުގައި ކޮށްދެއްވާނެ ކަމުގެ ޔަގީންކަން ދެއްވާކަމަށް ޑރ މުއިއްޒު ވިދާޅުވި އެވެ.
އެމަނިކުފާނު ވިދާޅުވީ ޕްރޮގްރެސިވް ކޮންގްރެސް ކޯލިޝަނަކީ މީގެ ކުރިން ވެސް ނަތީޖާ ނެރެދީފައިވާ ބައެއް ކަމަށެވެ. ރައީސް ޔާމިނުގެ ވެރިކަމުގެ 5 އަހަރަށް ބަލާލުމުން، އެ ޕާޓީން ރައްޔިތުންނަށް ވާ ވާއުދުތައް ފުއްދާދޭނެކަމުގެ ޔަގީންކަން ރައްޔިތުންނަށް ލިބިގެންދާނެކަމަށް ޑރ މުއިއްޒު ވިދާޅުވި އެވެ.
އެއާއެކު އެމަނިކުފާނު ވިދާޅުވީ، ދެން އުފެދޭ ޕްރޮގްރެސިވް ކޮންގްރެސް ކޯލިޝަންގެ ވެރިކަމެއް ވެސް ވެގެންދާނީ، ހަމަ އެފަދައިން ރައްޔިތުންނަށް ނަތީޖާ ނެރެދޭގެ ސަރުކާރަކަށް ކަމަށެވެ.
މުއިއްޒު ފޭދޫ ރައްޔިތުންނާއި ބައްދަލުކުރައްވާ ވާހަކަދައްކަވަނީ/ ފޮޓޯ: ޕީޕީއެމް
"އަޅުގަނޑުމެން މަސައްކަތް ކުރާނީ ފަންނީ މައުލޫމާތު އެނގި ތިބެގެން ރައްޔިތުންނަށް އެންމެ ލާބަޔާއި މަންފާ ކުރާނެ ގޮތަށް. ބްލަފް ނުކުރާނަން. އަޅުގަނޑުމެން ކުރާނީ ސީރިއެސް މަސައްކަތް. ނަތީޖާ ނެރެން އަޅުގަނޑުމެން މަސައްކަތް ކުރާނީ. ރައްޔިތުން ބޭނުންވަނީ ނަތީޖާ ނޫން ތޯ؟ ރިޒާލްޓް އޮރިއެންޓެޑް ސަރުކާރެއް އިރާދަކުރެއްވިއްޔާ އަޅުގަނޑުމެން ހިންގާނީ، ނަތީޖާ ނެރެދޭން، ރައީސް ޔާމިނުގެ ބާރު ސްޕީޑުގައި އެ ބޮޑެތި ބަދަލުތައް ބޭނުންވެފަ ރައްޔިތުން މި ތިބީ، އެހެންވީމާ އެގޮތަށް އަޅުގަނޑުމެން ކުރިއަށް ދާނީ"
ޑރ މުހައްމަދު މުއިއްޒު
ޑރ މުއިއްޒު އައްޑޫއަށް ވަޑައިގަތުމުން އެ ސިޓީއިން ވަނީ އެމަނިކުފާނަށް ހޫނު މަރުހަބާއެއް ކިޔައިފަ އެވެ.
އައްޑޫ ސިޓީއަކީ ސަރުކާރު ހިންގާ މައި ޕާޓީ އެމްޑީޕީގެ އަތޮޅެއްގެ ގޮތުގައި ޒަމާނުއްސުރެ ފާހަގަކުރެވިފައިވާ އަތޮޅެކެވެ.
އެހެން ނަމަވެސް ޑރ މުއިއްޒު އައްޑޫ ސިޓީއަށް ވަޑައިގަތުމާއެކު ރައްޔިތުން ކީ ހޫނު މަރުހަބާއިން، އަދި އެމަނިކުފާނުގެ އިސްތިގުބާލަށް ހިތަދޫ ޒީނަތްތެރިކޮށްފައި އޮތް ގޮތަށް ބަލާއިރު، އައްޑޫ ސިޓީގެ ސިޔާސީ ޗާޓު ބަދަލުވަމުން އަންނަ މަންޒަރު ފެންނަމުންދާކަމަށް ސިޔާސީ މަޝްރަހު ދިރާސާ ކުރައްވާ ފަރާތްތަކުން ގެންދަވަނީ ވިދާޅުވަމުން ނެވެ.
Advertisement
This content is created and paid for by advertisers and does not involve Voice Journalists
