ޕްރޮގްރެސިވް ކޮންގްރެސް ކޯލިޝަންގެ ވެރިކަމުގައި އައްޑޫ ސިޓީގައި ފަތުރުވެރިކަމުގެ ސިނާއަތު ފުޅާކުރުމަށް 6000 ޓުއަރިސްޓު އެނދު ތަރައްގީކުރާނެ ކަމަށް އެ ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ވިދާޅުވެއްޖެ އެވެ. 

ޑރ މުއިއްޒު މިފަދައިން ވިދާޅުވެފައިވަނީ އައްޑޫ ސިޓީ ހިތަދޫގައި ބޭއްވި ކެމްޕޭނު ޖަލްސާގައި ވާހަކަދައްކަވަމުން ނެވެ. 

ޑރ މުއިއްޒު ވިދާޅުވީ އައްޑޫ ސިޓީގައި ޓުއަރިޒަމް ފުޅާކުރުމަކީ، ދެކުނުގެ ރައްޔިތުންނަށް ބޭނުންވާ ވަޒީފާ އުފެއްދުމަށް މުހިންމު ކަމެއްކަމުގައި ދެކިވަޑައިގަންނަވާ ކަމަށެވެ. 

Advertisement

މި ސަރުކާރުން ވެސް އައްޑޫ ސިޓީގައި 8000 ޓުއަރިސްޓު އެނދު އަޅާނެކަމަށް ވައުދުވެފައި ވީ ނަމަވެސް އެ މަސައްކަތްތައް އެގޮތަށް ކުރިއަށް ނުދާކަން އައްޑޫ ސިޓީގެ ކަންކަމާއި ގުޅޭގޮތުން ވާހަކަދެއްކެވި ޒުވާން ބޭފުޅެއްގެ ވާހަކައަށް ވެސް އިޝާރާތް ކުރައްވާ ޑރ މުއިއްޒު ވިދާޅުވީ، ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި އައްޑޫ ސިޓީގައި ޓުއަރިޒަމް ފުޅާކުރުމަށް ރައްޔިތުން ބޭނުންވާ "އައްސޭރި ޓުއަރިޒަމް ކޮންސެޕްޓު" ހަޤީގަތަކަށް ހައްދަވާދެއްވާނެ ކަމަށެވެ. 

އެ މަސައްކަތުގެ ތެރެއިން އައްޑޫ ސިޓީގައި 6000 ޓުއަރިސްޓު އެނދު ތަރައްގީ ކުރައްވާނެ ކަމަށާއި، އެއާއެކު އައްޑޫ ސިޓީގައި މަދުވެގެން 10000 ވަޒީފާ ހަމައެކަނި ޓުއަރިޒަމް ސިނާއަތުގެ ތެރެއިން އުފެދިގެންދާނެ ކަމަށް ޑރ މުއިއްޒު ވިދާޅުވި އެވެ. 

ޑރ މުއިއްޒު ވިދާޅުވީ އައްޑޫ ސިޓީގައި ޓުއަރިޒަމް ފުޅާކުރެވި 6000 އެނދު ތަރައްގީ ކުރެވިއްޖެކަމަށް ވާނަމަ، މާލޭގައި އޮންނަ ފަދަ ސީޕްލޭން ހަބެއް އައްޑޫ ސިޓީގައި ވެސް އުފެދިގެންދާނެ ކަމަށެވެ. އަދި އޭގެ ފައިދާ މުޅި ދެކުނުގެ ރައްޔިތުންނަށް ލިބިގެންދާނެ ކަމަށް ޑރ މުއިއްޒު ވިދާޅުވި އެވެ. 

އައްޑޫ ސިޓީގެ ރައްޔިތުންނަކީ ތަރައްގީއަށް ފެންބޮވައިގެންފައިވާ ބައެއް ކަމަށާއި ޕްރޮގްރެސިވް ކޮންގްރެސް ކޯލިޝަނުން މަސައްކަތް ކުރާނީ ތަރައްގީގެ ކުލަވަރު ހަގީގަތަކަށް ހަދައިދީ ރައްޔިތުންގެ އުންމީދުތަކުގައި ކުލަޖައްސައި ދިނުމަށް ކަމަށް ޑރ މުއިއްޒު ވިދާޅުވި އެވެ.