ރިޔާސީ އިންތިޚާބަށް ބާކީ މިއޮތް މަދު ދުވަސްކޮޅުގައި އައްޑޫ ސިޓީގައި ރިޔާސީ ކެމްޕޭނުގެ ހަރަކާތްތައް ވަރުގަދަކޮށް ގެސްގޮދެއްވުމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު އެދިވަޑައިގެންފި އެވެ. 

ޑރ މުއިއްޒު އައްޑޫ ސިޓީއަށް ކުރައްވާ ދަތުރުފުޅުގައި މިއަދު ވަނީ ފޭދޫ އާއި މަރަދޫ ފޭދޫގައި ބައެއް ޖަގަހަތައް ހުޅުވާދެއްވާ ރައްޔިތުންނާއި މުޚާތަބުކުރައްވާ ވާހަކަދައްކަވަމުން ވިދާޅުވީ ރިޔާސީ އިންތިޚާބުގެ ވޯޓުލުމަށް ބާކީ މި އޮތް މަދު ދުވަސްކޮޅުގައި ކެމްޕޭނު ހަރަކާތްތައް މިހާރަށް ވުރެ ފުޅާކޮށް ވަރުގަދަކުރުމަށް އެދިވަޑައިގަންނަވާ ކަމަށެވެ. 

އައްޑޫ ސިޓީއަކީ ރާއްޖޭގައި އެންމެ އާބާދީ ބޮޑު އެއް އަތޮޅަށް ވެފައި، މި އަތޮޅުގެ މެޖޯރިޓީ ލިބިގެން ދިއުމަކީ ލިބިގެންދާނެ ވަރަށް ބޮޑު ކާމިޔާބީއެއްގެ ގޮތުގައި ޑރ މުއިއްޒު ސިފަކުރެއްވި އެވެ. 

Advertisement

ޑރ މުއިއްޒު ވިދާޅުވީ އައްޑޫ ރައްޔިތުންނަށް ވީ ވައުދުތައް މަތިން ވެރިކަމަށް އާދެވިއްޖެ ނަމަ ހަނދާން ނައްތާލާނެ ބޭފުޅަކަށް ވެ ވަޑައިނުގަންނަވާނެ ކަމަށެވެ. އަދި އެކަން ޔަގީންކޮށް ރައްޔިތުން އިތުބާރު ކުރެއްވުމަށް ވެސް ޑރ މުއިއްޒު އެދިވަޑައިގަތެވެ. 

ޑރ މުއިއްޒު ވިދާޅުވީ އެމަނިކުފާނު ވައުދުވަނީ، އެ ވައުދުތައް ފުއްދާދެއްވާނެ ގޮތުގެ ޕްލޭނެއް އޮވެގެން ކަމަށެވެ. އަދި ނަތީޖާ ނެރެދޭނެ ގޮތް ހޯއްދަވައިގެން ކަމަށެވެ.

ރައީސް ޔާމިނުގެ ޒައާމަތުގައިވެސް ޕްރޮގްރެސިވް ކޮންގްރެސް ކޯލިޝަނުން ވައުދުފުއްދާނެކަން ރައްޔިތުންނަށް ސާބިތުކޮށްދީފައިވާނެ ކަމަށާއި، ދެން އުފެދޭ އެ ޕާޓީގެ ވެރިކަމެއްގައި ވެސް އެ ސިޔާސަތު ދަމަހައްޓާނެކަމުގެ ޔަގީންކަން ދެއްވާކަމަށް ޑރ މުއިއްޒު ވިދާޅުވި އެވެ. 

އެމަނިކުފާނު ވަނީ ރައީސް ޔާމީން މިނިވަންކޮށް ރައްޔިތުން އެދޭ ތަރައްގީ ގެނައުމަށް މި ރިޔާސީ އިންތިޚާބު ޕްރޮގްރެސިވް ކޮންގްރެސް ކޯލިޝަނަށް ކާމިޔާބުކޮށްދިނުމަށް އެދިވަޑައިގެންފަ އެވެ. އަދި އެކަން ކުރާއިރު، ސިޔާސީ މަސައްކަތުގެ ފޯރި އިތުރުކޮށް އައްޑޫގައި ހަރަކާތްތައް ވަރުގަދަ ކުރުމަށް ވެސް އެމަނިކުފާނު ވަނީ ރައްޔިތުންގެ އަރިހުން އެދިވަޑައިގެންފަ އެވެ.