ދެކުނުގެ މަސްވެރިކަމުގެ ސިނާއަތު ރަނގަޅުކުރުމަށް ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި ކޮށްދޭނެކަންކަން އެ ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ހާމަކޮށްދެއްވައިފި އެވެ. 

އައްޑޫ ސިޓީ ހުޅުދޫގައި ބޭއްވި ޖަލްސާއެއްގައި ވާހަކަދައްކަވަމުން ޑރ މުއިއްޒު ވިދާޅުވީ ދެކުނުގެ މަސްވެރިކަން ރަނގަޅުކޮށް، އެ ސިނާއަތު ފުޅާކުރުމަށް މިހާރު އައްޑޫ ސިޓީގައި ޤާއިމްކޮށްފައި ހުރި ބައެއް ވަސީލަތްތައް ތަރައްގީކުރުމަކީ މުހިންމުކަމެއް ކަމަށް ދެކިވަޑައިގަންނަވާ ކަމަށެވެ. 

އެގޮތުން މިހާރު އައްޑޫ ސިޓީގައި ހުރި ކޯލްޑް ސްޓޯރޭޖުގެ ކެޕޭސިޓީ އިތުރުކުރުމަކީ ކުރައްވާނެ ކަމެއްގެ ގޮތުގައި ޑރ މުއިއްޒު ފާހަގަކުރެއްވި އެވެ. 

އޭގެ އިތުރުން ފެލިވަރާއި އެއް ފެންވަރުގެ ކޭނިން ފެކްޓްރީއެއް އައްޑޫގައި ތަރައްގީކޮށްދެއްވާނެކަމަށް ޑރ މުއިއްޒު ވައުދުވެވަޑައިގަތެވެ. 

އެމަނިކުފާނު ވިދާޅުވީ އެ ވަސީލަތްތަކުގެ ސަބަބުން ދެކުނުގެ މަސްވެރިކަން ކުރާ ފަރާތްތަކަށް އެތައް ފަސޭހަތަކެއް ލިބިގެންދާނެ ކަމަށެވެ. އަދި އެމީހުންނަށް ލިބޭނެ އާމްދަނީ އިތުރުކުރުމަށް ވަގުފަހިވެގެންދާނެ ކަމަށެވެ. 

މަސްވެރިކަމުގެ ސިނާއަތާއި ގުޅުންހުރި އެފަދަ ވަސީލަތްތައް އިތުރުކޮށްގެން ހަމައެކަނި ކުރިއަރާނީ މަސްވެރިކަމުގެ ސިނާއަތް އެކަނި ނޫންކަމަށާއި، އެއީ އުފެއްދޭ އިތުރު ވަޒީފާތައްކަމަށް ޑރ މުއިއްޒު ވިދާޅުވި އެވެ.

އެގޮތުން އައްޑޫގައި ޤާއިމްކިރާ ކޭނިން ފެކްޓްރީއާއެކު، އެ ސިނާއަތުގެ ތެރެއިން މަދުވެގެން 500 ވަޒީފާ އުފެދިގެންދާނެކަމަށް އަންދާޒާކުރެވޭ ކަމަށާއި، އެއީ ސަރަހައްދީ ތަރައްގީއަށް ލިބިގެންދާނެ ވަރަށް ބޮޑު ފުރުސަތެއްގެ ގޮތުގައި ޑރ މުއިއްޒު ސިފަކުރެއްވި އެވެ. 

އައްޑޫ ސިޓީ ހުޅުދޫ ޖަލްސާގެ ތެރެއިން

ޑރ މުއިއްޒު ވިދާޅުވީ އައްޑޫ ސިޓީ ހިމެނޭހެން ދެކުނުގެ މަސްވެރިކަމުގެ ސިނާއަތް ފުޅާކުރާ ވާހަކަ ދައްކާއިރު، ދެކުނުގެ ކަނޑުން މި ސަރުކާރުން ވިއްކާލި މަސްކަނޑުވެސް ދިވެހީންނަށް އަނބުރާ ހޯދަން ޖެހޭކަމަށެވެ.

އެމަނިކުފާނުގެ ވެރިކަމުގައި އެކަން ވެސް ކުރައްވާނެ ކަމަށާއި، މަސްވެރިކަން ފުޅާކުރުމަށް ކުރެވެން ހުރި މަސައްކަތްތައް ފާހަގަކޮށް އެކަންކަން ކުރިއަށް ގެންދާނެގޮތުގެ ޕްލޭނުތައް މިހާރު އެކުލަވާލެވިފައިވާ ކަމަށް ޑރ މުއިއްޒު ވިދާޅުވި އެވެ. 

މަސްވެރިކަމުގެ ސިނާއަަތަކީ ރައީސް ޔާމިނުގެ މެނިފެސްޓޯގެ ދެވަނަ ޗެޕްޓަރެވެ. މަސްވެރިން ބާނާ މަސް ކިލޯއެއްގެ އަގު ދަށްވެގެން 20 ރުފިޔާގައި ހިފަހައްޓާނެކަމަށް ޑރ މުއިއްޒު ވައުދުވެވަޑައިގެންފައިވާއިރު، މަސްވެރިކަމުގެ ސިނާއަތު ކުރިއެރުވުމަށް ޕްރޮގްރެސިވް ކޮންގްރެސް ކޯލިޝަންގެ މެނިފެސްޓޯގައި ހިމަނާފައިވާ ކަންކަން ވަރަށް އަވަހަށް ހާމަކުރައްވާނެކަމަށް ޑރ މުއިއްޒު ވަނީ ވިދާޅުވެފަ އެވެ.