މިހާތަނަށް ރާއްޖޭގައި ވެރިކަން ކުރި ސަރުކާރު ތަކުގެ ތެރެއިން، ރައްޔިތުންގެ މަޖިލީހަށް އެންމެ ގިނައިން ޖަވާބުދާރީވެ، ސަރުކާރުގެ މައުލޫމާތު ތައް އެންމެ ގިނައިން ހާމަކުރީ އަދުގެ ސަރުކާރުން ކަމަށް، އެމްޑީޕީގެ ރިޔާސީ ކެންޑިޑޭޓް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ. 

ބ.ދަރަވަންދޫގައި ބޭއްވި ކެންޕެއިން ޖަލްސާގައި ވާހަކަ ދައްކަވަމުން ރައީސް ޞާލިހް ވިދާޅުވީ ހެޔޮ ވެރިކަމެއް ކުރުމަށް ބޭނުން ނަމަ, މަޝްވަރާކޮށް، އެހެން މީހުން ދައްކާ ވާހަކަ އަޑުއަހަންވާނެ ކަމަށާ އަދި އެހާ އަވަހަށް ރުޅި އިސްކޮށްގެން ނުވާނެ ކަމަށެވެ.

މިއާއެކު ހެޔޮ ވެރިކަމެއް ކުރާން ބޭނުންވާ ނަމަ، އެ ސަރުކާރެއް ޖަވާބުދާރީ ކުރެވެންޖެހޭނެ ކަން ފާހަގަކުރައްވައި ރައީސް ޞާލިހު ވިދާޅުވީ، ޖަވާބުދާރީ ވުމާއި މައުލޫމާތްތައް ހާމަކުރުމުގައި މިސަރުކާރުން މަސައްކަތް ކުރި ވަރަށް އެއްވެސް ސަރުކާރަކުން މަސައްކަތް ނުކުރާ ކަމަށެވެ. 

ރައީސް ޞާލިހު އިތުރަށް ވިދާޅުވީ އިންސާފު ޤާއިމުކޮށް އިންސާފު ހޯދައިދިނުމަށްޓަކައި މިސަރުކާރުން ޝަރުއީ ދާއިރާ މިނިވަން ކޮށްދީފައިވާ ކަމަށެވެ. އަދި ދެން ބޭނުންވާ ކަމަކީ ފަނޑިޔާރުންނަށް ފަސޭހަކަމާއެކު މަސައްކަތްކުރެވޭނެ މާހައުލަކާއި ވަސީލަތްތައް ޤާއިމުކުރުން ކަމަށް ވިދާޅުވިއެވެ. އަދި ފަނޑިޔާރުންނަށް ލިބޭ މުސާރައަށްވެސް ޖެނުއަރީން ފެށިގެން ބަދަލު ގެނެވޭނެ ކަމަށް ރައީސް ވިދާޅުވިއެވެ.