ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ލަދެއް ނެތި ދައުލަތުގެ ފައިސާ ބޭނުން ކުރައްވައިގެން ރައްޔިތުންގެ މަޖިލީސް މެންބަރުންނާއި އާއްމުންނަށް ރިޝްވަތުދެއްވަމުންދާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ޑިމޮކްރެޓްސް އާ ގުޅުނު މަޖިލިސް މެންބަރެއް އަލުން އެމްޑީޕީއާއި ގުޅިފައިވާ މި ދަނޑިވަޅެއްގައި ރައީސް ނަޝީދު މިއަދު ކުރެއްވި ޓްވީޓެއްގައި ވިދާޅުވީ، ރައީސް ޞާލިހު ލަދެއް އަދި ބިރެެއް ނެތި ދައުލަތުގެ ފައިސާ ބޭނުން ކުރައްވައިގެން މަޖިލީސް މެންބަރުންނާއި އެހެންވެސް މީހުންނަށް ރިޝްވަތުދެއްވަމުންދާ ކަަމަށެވެ.

އަދި އެފަދައިން ކަން ކުރެއްވި ނަމަވެސް ވާނެ މޮޅެއް ނޯންނާނެ ކަމަށް ނަޝީދު ވިދާޅުވި އެވެ. 

Advertisement

"ތިޔަކަމުން ވާނެ މޮޅެއް ނޯންނާނެ، ވާނީ މަނިކުފާނު ފަޟީހަތް" ނަޝިދު ވިދާޅުވިއެވެ.

ނަޝީދު މިފަދައިން ވިދާޅުވެފައި ވާއިރު، އެމަނިކުފާނުގެ ދަ ޑިމޮކްރެޓްސް އުފެއްދުމަށް އެމްޑީޕީން ވަކިވެވަޑައިގެންނެވި ރައްޔިތުންގެ މަޖިލިހުގެ ތޮއްޑޫ ދާއިރާގެ މެމްބަރު އަހްމަދު ޝިޔާން (ގިޓާ) ރޭގެ ވަގުތެއްގައި ވަނީ އަލުން އެމްޑީޕީ އާއި ގުޅިވަޑައިގެންފައެވެ. 

އޭނާގެ އިތުރުން ރައްޔިތުންގެ މަޖިލިހުގެ ކުޅުދުއްފުށީ އުތުރު ދާއިރާގެ މެމްބަރު ޔާސިރު އަބްދުއްލަތީފް އާއި ކުޅުދުއްފުށީގެ މޭޔަރު މުހައްމަދު އާތިފާއި އެހެން ހުރިހާ މެމްބަރުންވެސް ވަނީ ދަ ޑިމޮކްރެޓްސް ދޫކުރައްވައި އެމްޑީޕީއާ ގުޅިވަޑައިގެންފައެވެ.