ރައްޔިތުންގެ މަޖިލީހުގެ މެމްބަރުންނަށް ރިޝްވަތުދޭކަމަށް ބުނާ މައްސަލައެއް މަޖިލީހުން ފުލުހުންގެ އިދާރާއަށް ހުށައަޅައިފި އެވެ. 

އެކަން ރައްޔިތުންގެ މަޖިލީހުން މީޑިއާއަށް ކަށަވަރުކޮށްދީފައި ވީ ނަމަވެސް، އެ ކަމުގެ އިތުރު ތަފްސީލެއް ހާމަކޮށްފައެއް ނުވެއެވެ. 

އެހެން ނަމަވެސް މި މައްސަލަ މަޖިލީހަށް ހުށައަޅާފައި ވަނީ ސަރުކާރު ހިންގާ މައި ޕާޓީ އެމްޑީޕީން ވަކިވެވަޑައިގަތުމަށް ފަހު މަޖިލީހުގެ ރައީސް މުހައްމަދު ނަޝީދު އިސްކޮށް ހުންނަވާ އުފެއްދި ސިޔާސީ ޕާޓީ "ދަ ޑިމޮކްރެޓްސް" އަށް ނިސްބަތްވާ ރައްޔިތުންގެ މަޖިލީހުގެ މެމްބަރެއް، އެ ޕާޓީން ވަކިވެވަޑައިގެން އެމްޑީޕީއާއި ގުޅިވަޑައިގެންފައިވާ ދަނޑިވަޅެއްގަ އެވެ. 

Advertisement

އެގޮތުން ތޮއްޑޫ ދާއިރާގެ މެމްބަރު ހަސަން ޝިޔާން އާއި ކުޅުދުއްފުށީ އުތުރު ދާއިރާގެ މެމްބަރު ޔާސިރު އަބްދުއްލަތީފު ވަނީ ދަ ޑިމޮކްރެޓްސްގައި ތިއްބެވުމަށްފަހު އަލުން އެމްޑީޕީއާއި ގުޅިވަޑައިގެންފަ އެވެ. 

ރައްޔިތުންގެ މަޖިލީހުގެ މެމްބަރުންނަށް ރިޝްވަތުދޭ މައްސަލަ މަޖިލީހުން ހުށައަޅާފައިވާއިރު، އެކަމާއި ގުޅޭ އެއްވެސް ތަފްސީލެއް މިހާތަނަށް ފުލުހުންގެ އިދާރާއިން ވެސް ހާމަކޮށްފައެއް ނުވެއެވެ.