ހުޅުމާލޭ ފިޔަވަހި 2 ގައި 'ހިޔާ ތެރަޕީ އެންޑް އިންޓަވެންޝަން ސެންޓަރު' ގެ ނަމުގައި ކެއަރ ސެންޓަރެއް ހުޅުވައިފިއެވެ. އިއްޔެ ވަހީރު އޮތް ރަސމިއްޔާތެއްގައި މި ސެންޓަރު ރަސްމީކޮށް ހުޅުވައިދެއްވީ ރައީސުލްޖުމްހޫރިއްޔާގެ ނައިބު ފައިސަލް ނަސީމެވެ.

ހިޔާ ފްލްޓް ޓަވަރު 1 ގައި ހުޅުވި ހިޔާ ތެރަޕީ އެންޑް އިންޓަވެންޝަން ސެންޓަރަކީ އެކެއަރ ސޮސައިޓީ އާއި އާބަންކޯ ގުޅިގެން ހުޅުމާލޭގައި ހާއްސަކޮށް އުތުރު ހުޅުމާލޭގައި ދިރިއުޅޭ ނުކުޅެދުންތެރިކަން ހުންނަ ފަރާތްތަކަށް ބޭނުންވާ ތެރަޕީ އަދި އެހެނިހެން ފަރުވާ ފޯރުކޮށްދިނުމަށް ހުޅުވުނު ހާއްސަ ސެންޓަރެއް ކަމަށް ކެއާ ސޮސައިޓީން ބުނެއެވެ.

ކެއާ ސޮސައިޓީން ބުނީ ނުކުޅެދުންތެރިކަން ހުންނަ ފަރާތްތަކަށް އެންމެ އެކަށޭނަ ގޮތަކަށް ހިދުމަތްތައް ފޯރުކޮށްދިނުމަށްޓަކައި މި ސެންޓަރު މަރާމާތު ކުރުމާއި ބޭނުންވާ ފަރުނީޗަރާ އަދި އެހެނިހެން ތަކެތި ފޯރުކޮށްދެއްވާފައިވަނީ ހެޔޮއެދޭ އެކިއެކި ފަރާތްތަކުން ކަމަށެވެ.

Advertisement

އެހެންކަމުން މި ސެންޓަރު ފުރިހަމަ ކުރުމަށް ކެއަރ ސޮސައިޓީއަށް އެހީތެރިކަން ފޯރުކޮށްދިން ފަރާތްތަކަށް ޝުކުރު އަދާކޮށް ކެއާ ސޮސައިޓީން ބުނީ އެ ފަދަ ފަރާތްތަކުން އެ ސޮސައިޓީ އާ އަބަދުވެސް ބާއްވާ ގާތް ކަމަކީ ސޮސައިޓީގެ ޓީމަށް ސާބިތުކަމާ އެކު ކުރިއަށް ދިއުމަށް ލިބޭ ވަރަށް ބޮޑު ހިތްވަރެއް ކަމަށެެވެ.

ހިޔާ ތެރަޕީ އެންޑް އިންޓަވެންޝަން ސެންޓަރުން ލިބޭ ޚިދުމަތްތަކުވެ ތެރޭގައި، ޅަފަތުގައި ނުކުޅެދުންތެރިކަން ދެނެގަތުމާއި އެކަމަށް ބޭނުންވާ ފަރުވާއާއި އެކަޑެމިކް އެންހޭންސްމަންޓްގެ އިތުރުން ރެޑިނަސް ފޮ އެމްޕްލޯއިމަންޓް/ޖޮބް ހިމެނެއެވެ.