އިދިކޮޅު ޕީޕީއެމް/ޕީއެންސީގެ ވެރިކަމެއްގައި ހުވަދު އަތޮޅު ދެކުނުބުރީގައި އިންޓަގްރޭޓެޑް ޓުއަރިޒަމް ގެ ދެ މަޝްރޫޢެއް ހިންގާނެކަން އެ ކޯލިޝަންގެ ރިޔާސީ ކެންޑިޑޭޓް ޑރ މުހައްމަދު މުއިއްޒު އިއުލާނު ކުރައްވައިފިއެވެ.

ރިޔާސީ އިންތިހާބުގެ ކެމްޕެއިންގައި މިހާރު ހުވަދުއަތޮޅުގެ ރަށްތަކަށް ކުރަމުން ގެންދާ ދަތުރުތަކުގައި އެ އަތޮޅު ކޮލަމާފުއްޓަށް ވަޑައިގެން އެ ރަށުގައި ތިބި ސަޕޯޓަރުންނާ ވާހަކަދައްކަވަމުން ޑރ.މުޢިއްޒު ވިދާޅުވީ އެ ރަށުގެ ރައްޔިތުންނަށްވެސް އެންމެ މުހިއްމުވެފައިވާ އެއްކަމަކީ ދިރިއުޅޭ ރަށް ކައިރިން ވަޒީފާގެ ފުރުސަތުތައް ލިބުން ކަމަށެވެ.

އެ ރައްޔިތުންނަށް ވަޒީފާގެ ފުރުސަތުތައް ފަހިކުރެއްވުމުގެ ގޮތުން ކުރައްވާނެ ކަންތައްތަކެއް ފާހަގަކުރައްވައި މުއިއްޒު ވިދާޅުވީ، އެ ރަށް ކައިރީ އޮންނަ މާރަންދޫގައި ރިސޯޓު ޤާއިމުކުރުމުގެ މަސައްކަތް ހުއްޓިފައި އޮތް އޮތުން ނިމުމަކަށް ގެންނަވައި އެ މަސައްކަތް ފުރިހަމަކުރައްވައި އެ ރިސޯޓު އޮޕަރޭޝަނަށް ގެންނަވާނެކަމަށް ޑރ.މުޢިއްޒުވަނީ އެ ރަށުގެ ރައްޔިތުންނަން ވަޢުދުވެފައެވެ.

Advertisement

ހަމަ އެޔާއެކު މާރަންދޫގެ މަސައްކަތް ނިންމައި ރިސޯޓު ހުޅުވުމުގެ އިތުރަށް ގއ. އަތޮޅުގެ ރައްޔިތުންނަށް އިތުރު ފުރުސަތުތަކާއި އިޤުތިޞާދީ ތަނަވަސްކަން ހޯދައިދިނުމުގެ ގޮތުން ކެރެންދޫ ފަޅާއި މާވަރު ފަޅުގައި އިންޓަގްރޭޓެޑް ޓުއަރިސްޓު ރިސޯޓު ޤާއިމުކުރައްވާނެކަމަށްވެސް މުއިއްޒުވަނީ ވައުދުވެވަޑައިގެންފައެވެ. މީގެ އިތުރުން އެ ރަށަށް ކޮށްދިނުމަށް ހަމަ ޖެހިފައިވާ ކަންތައްތަކުގެ ތެރެއިން ކޮލަަމާފުށީގެ ކުނި މެނޭޖުކުރުމުގެ ނިޒާމު ހަރުދަނާކުރެއްވުމާއެކު، ރަށުގައި ތިބެގެން ކުރެވޭނެ މަސައްކަތްތައް ރަށުގައި އުފެއްދެވުމާއި، ސްޓޭޑިއަމް އަދާހަމަކޮށް ދުވާ ޓުރެކެއް ޤާއިމުކުރެއްވުމަށް ވައުދުވެވަޑައިގެންފައިވެއެވެ.

އަދި އެ ރަށުގެ ރައްޔިތުންނަށް ބޭނުންވާ ޒަމާނީ ޔޫތު ސެންޓަރެއް އަޅުއްވައިދެއްވުމާއި ސުކޫލާއި ޞިއްޙީ މަރުކަޒުގެ ޚިދުމަތްތަކުގެ ފެންވަރު ރަނގަޅުކުރެއްވުމަށްވެސް ޑރ.މުޢިއްޒު ވައުދުވެވަޑައިގަތެވެ.

ރިޔާސީ އިންތިހާބުގެ ކެމްޕެއިންގައި ޑރ މުހައްމަދު މުއިއްޒު އާއި ކެމްޕެއިން ޓީމުން އަތޮޅުތެރޭގެ ރަށްތަކަށް ދަތުރުކުރަމުންދާއިރު އެ ދަތުރުތަކަށް ބޮޑު ތަރުހީބެއް ލިބެމުންދާކަން ފާހަގަކޮށްލެވެއެވެ.