ހުޅުމާލޭގެ ދެވަނަ ފިޔަވަހި ހިއްކަން ފެއްޓެވީ އެމަނިކުފާނުގެ ވެރިކަމުގައި ކަމަށް ވިދާޅުވެ ކުރީގެ ރައީސް، ޑރ. މުހައްމަދު ވަހީދު ހަސަން މަނިކު ދެއްކެވި ވާހަކަފުޅު، އެޗްޑީސީގެ ކުރީގެ މެނޭޖިންގ ޑިރެކްޓަރ މުހައްމަދު ސައިމަން ދޮގު ކުރައްވައިފި އެވެ.
އއ ތޮއްޑޫގައި މިއަދު ބޭއްވި ޤާސިމް އިބްރާހިމްގެ ރިޔާސީ ކެމްޕޭނު ބައްދަލުވުމުގައި ވާހަކަދައްކަވަމުން ޑރ ވަހީދު ވަނީ ހުޅުމާލޭގެ ދެވަނަ ފިޔަވަހި ހިއްކަން ހަވާލުކުރެއްވީ އެމަނިކުފާނުގެ ވެރިކަމުގައި ކަމަށް ވިދާޅުވެފައެވެ. އެގޮތުން، އެ އެއްބަސްވުމުގައި ސޮއި ކުރެވުނީ 2013 އަހަރުގެ ޖޫން މަހުގައި ކަމަށާ، އެ މަޝްރޫއު ގެ އަގަކީ 59 މިލިއަން ޑޮލަރު ކަމަށް އެމަނިކުފާނު ވިދާޅުވި އެވެ.
"އަދި ތި ބޭފުޅުން ހައިރާންވެ ވަޑައިގެންނަވާފާނެ އަޅުގަނޑު މިވާހަކަ ދެންނެވީމާ. އެއީ ހުޅުމާލޭގެ ދެވަނަ ފޭސް ހިއްކަންފެށީ، ހިއްކަން 59 މިލިއަން ޑޮލަރު ހަވާލުކުރީ ޖޫން މަހު. 2013 ވަނަ އަހަރު. އެ ފައިސާ، އެތަން ހިއްކަން ހަވާލުކުރިއިރު، އޭރުގެ ރައީސުލްޖުމްހޫރިއްޔާ އަކަށް އޭރުގައި ހުރީ އަޅުގަނޑު. އެކަމު އެތަން ހިއްކުމުގައިވެސް އަޅުގަނޑުގެ އެއްވެސް ރޯލެއް އޮތް ކަމަކަށް ނުވޭ. އެއީ އަޅުގަނޑު ސިޔާސީ ކަންކަމުން ދުރުގައި ހުރީމާ. އަޅުގަނޑުގެ ވާހަކަ ދައްކާނެ މީހަކު ނެތީ."
ޑރ. މުހައްމަދު ވަހީދު ހަސަން މަނިކު
ޑރ. ވަހީދުގެ އެވާހަކަތައް ދޮގު ކުރައްވައި، ސައިމަން ފޭސްބުކް ގައި ކުރެއްވި ކޮމެންޓެއްގައި ވިދާޅުވީ، އެއީ މުޅިން ވެސް ހަގީގަތާއި ޚިލާފު ވާހަކަތަކެއް ކަމުގެ ޔަގީންކަން އޭނާ ދެއްވާކަމަށެވެ.
އަދި އެ މަޝްރޫއު އަކީ ބޭންކް އޮފް ސިލޯނުން ލޯނު ނަގައިގެން ހިންގި 39 މިލިއަން ޑޮލަރުގެ މަޝްރޫޢެއް ކަމަށާ އޭގެ ތެރޭގައި އިކުއިޓީގެ ގޮތުގައި ދިން 10 މިލިއަން ޑޮލަރު ވެސް ހިމެނޭ ކަމަށް އޭނާ ވިދާޅުވި އެވެ.
"ލޯން އެގްރީމެންޓް އާއި، ކޮންޓްރެކްޓަރ އާއި އެކު ވެވުނު އެއްބަސްވުމުގައިވެސް ސޮއި ކުރެވުނީ 2014 ވަނަ އަހަރުގެ މެދު ތެރޭގައި" ސައިމަން ވިދާޅުވި އެވެ.
Advertisement
This content is created and paid for by advertisers and does not involve Voice Journalists
