2018 ގެ ރިޔާސީ ބަހުސަށްވެސް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ފިއްލެވީކަމަށަށާއި މި އަހަރުގެ ބަހުސަށްވެސް ފިއްލެވީކަމަށާއި އެހެންކަމުން ރައީސް މި ވެވަޑައިގަތީ ފިލި އިބޫއަށް ކަމުގައި ވިދާޅުވެ، ނައިފަރު ދާއިރާގެ މެމްބަރު އަދި ޕީޕީއެމްގެ ނައިބު ރައީސް އަހްމަދް ޝިޔާމް ރައީސް ޞާލިހަށް ފާޑުވިދާޅުވެއްޖެއެވެ. 

ޕީއެސްއެމާއި އެމްއެންޔޫއިން ގުޅިގެން ކުރިއަށް ގެންދާ މިއަހަރުގެ ރިޔާސީ ބަހުސް ކެންސަލްކުރުމަށް ނިންމުމާއި ގުޅިގެން ޝިޔާމް ކުރެއްވި ޓުވީޓެއްގައި ވިދާޅުވެފައިވަނީ، ބަދަލުގައި ރައީސް ޞާލިހުގެ އިންތިހާބީ ތަރުޖަމާނު މާރިޔާ އަހްމަދު ދީދީ ފޮނުއްވުމަށްވެސް އެދިލައްވާކަމުގައެވެ. 

ރައީސުލްޖުމްހޫރިއްޔާ ދިފާއުކުރުމުގެ ނަމުގައި މިހާރު ބައިކޮޅަށް އެންމެ ގިނަ ގޯލް ޖައްސަވަނީ މާރިޔާކަމުގައި ފާހަގަކުރައްވައި ޝިޔާމް ވަނީ މި ވެރިކަން މިދަނީ ނިމުމަކަށް ކަމުގައި ޓުވީޓުގައި ވިދާޅުވެފައެވެ. 

މި އަހަރުގެ ރިޔާސީ ބަހުސް ކެންސަލްކުރުމަށް ޕީއެސްއެމުން ނިންމައިފައިވަނީ މިއަދުއެވެ. ސަބަބެއްގެ ގޮތުގައި ބަހުސް ކެންސަލްކުރުމަށް ނިންމައި ނެރުނު ބަޔާނުގައި ބުނެފައިވަނީ، ރިޔާސީ ބަހުސް މިހާރު އޮތް މުއްދަތުގައި ބައެއް ކެނޑިޑޭޓުންގެ ކެމްޕެއިން ހަރަކާތްތައް އޮތުމުގެ އިތުރުން ފަހުގެ ތާރީޚަކަށް ބަހުސް ފަސްކޮށްފިނަމަ ކެމްޕެއިން ހަރަކާތްތަކަށް ބުރޫއަރާނެ ކަމަށް ދެކޭތީކަމުގައެވެ. 

މި އަހަރުގެ ރިޔާސީ ބަހުސްގެ ދައުވަތު އެންމެ ފަހުން ގަބޫލުކުރެއްވީވެސް ރައީސް ޞާލިހެވެ. އަދި އެފަހުން އެ ތާރީޚުގައި އެމްޑީޕީގެ ޖަލްސާއެއް އޮންނާތީ ބަހުސް ފަސްކުރުމަށް މަޝްވަރާ ކުރަމުންދާކަމުގައި އެމަނިކުފާނުގެ އިންތިހާބީ މަންދޫބު، މާރިޔާ އަހްމަދު ދީދީ ވަނީ ވިދާޅުވެފައެވެ.