ޤައުމަށް ޤައްދާރުވާ މީހުންނަށް އަދަބު ދިނުމަށް އެކަމަށް ޚާއްސަ ޤާނޫނެއް ހައްދަވާނެ ކަމަށް ޕީއެންސީ ޕީޕީއެމްގެ ރިޔާސީ ކެންޑިޑޭޓް ޑރ މުޙައްމަދު މުޢިއްޒު ވިދާޅުވެއްޖެއެވެ.

ޑރ މުޢިއްޒު މިހެން ވިދާޅުވީ އެމަނިކުފާނުގެ ރިޔާސީ ކެމެޕޭނުގައި ރ.ދުވާފަރުގައި ރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ޖަލްސާގައި ވާހަކަދައްކަވަމުން މުޢިއްޒު ވިދާޅުވީ އެންމެ އިސް ސިޔާސަތަކަށް ހައްދަވާނީ ރާއްޖޭގެ މިނިވަންކަމާއި އަމިއްލަވަންތަކަން ދެމެހެއްޓުން ކަމަށާއި އެކަން ގެއްލޭ ގޮތަށް މި ސަރުކާރުގެ ބައެއް ވެރިން ޢަމަލުކޮށްފައިވާ ކަމަށެވެ. ޑރ މުޢިއްޒު ވިދާޅުވީ އެފަދަކަންކަން ކުރުމަކީ ޤައުމަށް ޤައްދާރުވުން ކަމަށެވެ. އަދި އެފަދަ ކަންކަން ކުރާ ފަރާތްތަކަށް އަދަބު ދެވެން ޖެހޭ ކަމަށް ޑރ މުޢިއްޒު ވިދާޅުވިއެވެ.

މުޢިއްޒު ވިދާޅުވީ އެފަދަ ފަރާތްތަކަށް އަދަބު ދިނުމަށްޓަކައި ރައްޔިތުންގެ މަޖިލީހުގެ ތެރެއިން ޤާނޫނެއް ފާސްކުރައްވާނެ ކަމަށެވެ.

ޑރ މުޢިއްޒު ވިދާޅުވީ ބޭނުންހާ ގޮތަކަށް އަމިއްލަ ފައިދާތަކެއް ހޯދަން މިހާރު މި ހިނގާ ބޮޑެތި ކަންކަމެއް ނުހިންގޭނެ ކަމަށާއި އެއީ ޒީރޯ ޓަލެރެންސް އެންމެ ބޮޑަށް ދޭން ޖެހޭނެ ކަންކަންކަމަށެވެ. އަދި އޭނާ އެކަން ކުރައްވާނެ ކަމަށް މުޢިއްޒު ވިދާޅުވި އެވެ.

މުޢިއްޒުގެ ވާހަކަފުޅުގައި ވަނީ އަޑި ނޭނގޭ އެއްބަސްވުންތަކާއި ރާއްޖޭގައި ބޭރުގެ ސިފައިން ބޭތިއްބުމަކީ ގައްދާރުވުމުގެ ގޮތުގައި ސިފަކުރައްވާފަ އެވެ. އަދި އެއީ ޤައުމުގެ މިނިވަންކަމަށް ބުރޫއަރާފައިވާ ކަމެއް ކަމަށާއި އެއިން ކޮންމެ އެއްބަސްވުމެއް ބަލައި މިނިވަންކަން ގެއްލޭ ގޮތަށް ހުރި ކަންކަން ހައްލު ކުރައްވާނެ ކަމަށް މުޢިއްޒު ވަނީ ވިދާޅުވެފައެވެ.

މީގެއިތުރުން މުޢިއްޒުވަނީ ޝަރުޢީ ދާއިރާ މިނިވަންކަމާ އެކު ހިންގުމަކީ ދައުލަތަށް ވަރަށް މުހިންމު ކަމެއް ކަމަށް ވިދާޅުވެފައެވެ. އަދި އެ މިނިވަންކަން ޝަރުޢީ ދާއިރާއަށް ދިނުމަށްޓަކައި އެންމެ މުހިންމު ކަމެއްގެ ގޮތުން ޖުޑީޝަލް ސާވިސް ކޮމިޝަންގެ ފޯމޭޝަން ބަދަލުކުރާނެ ކަމަށް އޭނާ ވިދާޅުވި އެވެ. އެއީ ސިޔާސީ މީހުން މަދުކޮށް، ޝަރުޢީ ދާއިރާގެ މީހުން ގިނަ ކުރުމާއި އަދި މަސައްކަތްތައް އެ ކޮމިޝަނުން ނެގުންކަމަށެވެ.