އިދިކޮޅު ރިޔާސީ ކެންޑިޑޭޓް ޑރ މުހައްމަދު މުއިއްޒުގެ ވެރިކަމެއްގައި ރ ކަނދޮޅުދޫގައި ޒަމާނީ ފެންވަރުގެ މަސްކިރާ ފެކްޓްރީއެއް ގާއިމްކޮށްދޭނެ ކަމުގައި މުއިއްޒު ވިދާޅުވެއްޖެއެވެ. 

ރިޔާސީ އިންތިހާބުގެ ކެމްޕެއިންގައި ރ އަތޮޅު ދުވާފަރުގައި ރޭ ބޭއްވި އެ އަތޮޅުގެ ބޮޑު ޖަލްސާގައި ވާހަކަ ދައްކަވަމުން މުއިއްޒުގެ ވެރިކަމެއްގައި ދުވާފަރަށް ކޮށްދެއްވާނެ މުހިއްމުކަންކަން އިއުލާނު ކުރެއްވިއިރު، ދުވާފަރަކީ ފާނަ މަސްވެރިކަން ކުރާ ރަށެއް ކަން ފާހަގަ ކުރައްވައި މުއިއްޒު ވިދާޅުވީ ކަނދޮޅުދޫގައި ފާނައިގެ ކަންކަމަށް ހާއްސަ ކޯލްޑް ސްޓޯރޭޖް ފެސިލިޓީއެއް ވެސް ހުންނާނެ ކަމަށެވެ.

މި ފެސިލިޓީއާއެކު ދުވާފަރާއި އެރަށް ކައިރީގައި އޮތް ރަށްރަށާއި އެހެނިހެން ރަށްރަށުގައި މަސް ކިރޭނެ އިންތިޒާމު ހަމަޖެހިގެން ދާނެ ކަމުގައި މުއިއްޒު ވިދާޅުވިއެވެ.

މީގެ އިތުރުންވެސް އެރަށަށް ކޮށްދެއްވާނެ ކަމަށް ވައުދުވެވަޑައިގެން ކަންކަމުގެ ތެރޭގައި އެ ރަށުގެ ސިއްހީ ނިޒާމް ރަނގަޅު ކުރުމަށްޓަކައި ރަނގަޅު ފެންވަރުގެ ހޮސްޕިޓަލެއް އެޅުމުގެ އިތުރުން އެ ރަށުގައި ބޯހިޔާވަހިކަަން ރަނގަޅު ކުރުމަށް ފްލެޓް އެޅުމާއި، ބޭންކް ގެ ބްރާންޗެއްް ގާއިމްކުރުން ހިމެނެއެވެ. މީގެ އިތުރުން އެ ރަށުގެ ތަރައްޤީގެ ހުރިހާ މަޝްރޫއެއް ވެސް ހާއްސަކަމެއް ދީގެން ކޮށްދެއްވާނެ ކަމުގައި ޑރ މުއިއްޒު ވިދާޅުވިއެވެ. 

ހަމަ އެޔާއެކު ޒުވާނުންގެ ދުޅަހެޔޮ ކަމަކީ އެންމެ މުހިންމު ކަންތައް ކަން ފާހަގަ ކުރައްވައި ޒުވާނުންނަށް ބޭނުންވާ ސްޕޯޓްސް ކޮމްޕްލެކްސްއެއް ގާއިމު ކުރުމަކީ މި ރަށުގައި ފުރިހަމަ ކުރައްވާނެ ކަމެއް ކަމަށް ވިދާޅުވިއެވެ.