ޕީޕިއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒުގެ ވެރިކަމެއްގައި ކާޑެއްދޫގައި ގާއިމްކުރާ އިންޓަރނޭޝަނަލް އެއަރޕޯޓާއި ތިނަދޫގައި ގާއިމްކުރާ އެއަރޕޯޓް ގުޅާލެވޭނީ އެ ދެރަށް ދެމެދުގައި ގާއިމްކުރެވޭ ކޯޒްވޭއަކުން ކަމުގައި އެ ކޯލިޝަންގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ. 

މީގެ ދުވަސްކޮޅެއް ކުރިން ގދ ތިނަދޫއާއި ގއ ވިލިނގިިލީގައި ބޭއްވި ކެމްޕެއިން ޖަލްސާއެއްގައި ދެއްކެވި ވާހަކަފުޅާއި ގުޅިގެން އެ ދެރަށުގެ ރައްޔިތުންނަށް އޮޅުން އަރާ ކަންކައްތަކެއް ހުރިކަމަށް ދެކިވަޑައިގަންވާތީ އެކަންކަން ސާފުކޮށްދިނުމުގެ ގޮތުން ރޭ އުނގޫފާރުގައި ބޭއްވި ކެމްޕެއިން ޖަލްސާގައި ވާހަކަދައްކަވަމުން ޑރ މުހައްމަދު މުއިއްޒު ވިދާޅުވީ، ހުވަދު އަތޮޅަކީ ޖިއޮގްރަފީގޮތުން ބަލާއިރު މުޅި ދުނިޔޭގައިވެސް އޮތް އެންމެ ބޮޑު އަތޮޅުކަމަށާއި، 10،000 އެނދުގެ ޓޫރިޒަމް ޕްރޮޖެކްޓެއް އިއުލާންކުރެެއްވި ކަމުގައެވެ. 

އެހެންކަމުން މިވަރުގެ ބޮޑު މަޝްރޫއެއް ކުރިއަށް ގެންދާއިރު، އެ އަތޮޅަށް ދެ އިންޓަރނޭޝަނަލް އެއަރޕޯޓު ބޭނުންވާނެކަން ފާހަގަކުރައްވައި ޑރ މުއިއްޒު ވިދާޅުވީ، އެއް އެއަރޕޯޓް ގާއިމްކުރާނީ ކާޑެއްދޫގައި ކަމަށާއި އަނެއް އެއަރޕޯޓް ގާއިމްކުރާނީ ވިލިނގިލީގައިކަމަށެވެ. އަދި އެ ދެއަރޕޯޓަކީވެސް 10،000 އެނދުގެ މަޝްރޫއަކަށް މުޅި އަތޮޅު ގުޅާލާއިރު ދެ އެއަރޕޯޓަކީވެސް މުހިއްމު އެއަރޕޯޓެއްކަމަށެވެ. 

Advertisement

މީގެ އިތުރުން ރޭގެ ޖަލްސާގައި ޑރ މުއިއްޒުވަނީ، ތިނަސޫ ސިޓީއަކަށް ބަދަލުކުރާއިރު ކުރަންހުރި ކަންކަމުގެ އިތުރު ތަފްސީލަށް އަލިއަޅުވާލައިފައެވެ. އޭގެ ތެރެއިން އެރަށް ސިޓީއަކަށް ހެދުމަށްޓަކައި ރަށުގެ ނުހެދި ހުރި ހުރިހާމަގުތަކެއް ހެދުމާއި ސިއްހީ ނިޒާމު ފުޅާކުރުމުގެ ގޮތުން ޓަރޝަރީ ފެންވަރުގެ ހޮސްޕިޓަލެއް ގާއިމްކުރުން ހިމެނޭކަމުގައި މުއިއްޒު ފާހަގަކުރެއްވިއެވެ. 

ރިޔާސީ ކެމްޕެއިންގައި ޑރ މުހައްމަދު މުއިއްޒާއި ކެމްޕެއިން ޓީމުން އަތޮޅުތެރެއަށް ކުރަމުން ގެންދާ ދަތުރުތަކަށް ބޮޑު ތަރުހީބެއް ލިބެމުން އަންނަކަން ފާހަގަކޮށްލެވެއެވެ.