މާލޭގައި މީހަކު ރަހީނުކޮށް ފައިސާ ފޭރުނު މައްސަލައަކާއި ގުޅިގެން ފިލްމީ ދާއިރާ އާއި ސިޔާސީ ދާއިރާއިން މަޝްހޫރުވި އަލީ ޝާހިދު(ސްޓެޕް އައްޔަ) ހައްޔަރުކޮށްފިއެވެ.

ފުލުހުން ހާމަކޮށްފައިވަ ގޮތުގައި އިތުރު ބަޔަކާ ބައިވެރިވެގެން މާލޭގެ ގެއެއްގައި ފިރިހެނަކު ހުއްދަނޫން ގޮތުގައި ހިފަހައްޓައި އަނިޔާކޮށް އޭނާގެ ބޭންކް އެކައުންޓުން ފައިސާ ޓްރާންސްފާ ކުރި މައްސަލައެއްގައި މީހަކު ހައްޔަރުކޮށްފައިވާ ކަމަށެވެ.

މިމައްސަލައިގައި ހައްޔަރު ކުރި މީހަކީ ސްޓެޕް އައްޔަ ކަން ވޮއިސް އަށް ވަނީ ކަށަވަރު ވެފައެވެ.

Advertisement

އެ މައްސަލަ ފުލުހަށް ހުށަހަޅާފައި ވަނީ މި މަހުގެ ހަތަރެއްގައި ކަމަށާއި އެ މީހާ ހައްޔަރުކުރީ ކޯޓު އަމުރެއްގެ ދަށުން ކަމަށާ އޭނާ 15 ދުވަހަށް ބަންދު ކުރުމަށް ކްރިމިނަލް ނިންމާފައިވާ ކަމަށްވެސް ބުނެފައިވެއެވެ. 

ފުލުހުން އިތުރަށް ބުނެފައިވަނީ މައްސަލަ ފުލުހުން ގެންދަނީ ތަހުގީގު ކުރަމުން ކަމަށެވެ.

މި މަހުގެ ތެރޭގައި ތަފާތު މައްސަލައަކާ ގުޅިގެން ވެސް ސްޓެޕް އައްޔަ ހޯދަން ފުލުހުން އިއުލާންކޮށްފައިވެއެވެ. އޭރު ފުލުހުން ބުނެފައިވަނީ އެއީ ފުލުހުންގެ އިކޮނޮމިކް ކްރައިމް ޑިޕާޓްމަންޓުން ބަލަމުން އަންނަ ފޯޖަރީގެ މައްސަލައެއްގައި ތަހުގީގަށް ހާޒިރު ކުރުމުގެ ޗިޓު ހަވާލު ނުކުރެވި، އޭނާ އުޅޭ ތަނެއް ނޭނގޭތީ ކަމަށެވެ.

ފުލުހުންގެ އެއިއުލާނުގެ ފަހުންވެސް އެކިއެކި ޕާޓީ ތަކުގެ ކެމްޕޭނު ހަރަކާތްތަކުން އޭނާ ވަނީ ފެނިފައެވެ.