މި އަހަރުގެ ރިޔާސީ އިންތިޚާބުގެ ވޯޓުލާ ދުވަހު ހަމަނުޖެހުން ހިންގާ މުޅި ޤައުމު ހަލަބޮލިކުރުމަށް ސަރުކާރު ހިންގާ މައި ޕާޓީ އެމްޑީޕީން ރާވަމުންދާކަމުގެ މައުލޫމާތު ލިބޭކަމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒުގެ ތަރުޖަމާނު މުޙައްމަދު ޠަލާލު ވިދާޅުވެއްޖެ އެވެ.
ރިޔާސީ އިންތިޚާބާއި ގުޅިގެން އިދިކޮޅުން ފާހަގަކުރަން ހުރި ކަންކަން ހިއްސާކުރުމަށް މިއަދު ބޭއްވި ޕްރެސް ކޮންފަރެންސްގައި ވާހަކަދައްކަވަމުން ޠަލާލު ވިދާޅުވީ ރިޔާސީ އިންތިޚާބުގެ ވޯޓުލުން އޮންނަ ދުވަހު ވަކި ހިސާބަކުން މުޅި ގައުމު ހަލަބޮލި ކުރުމުގެ މަޝްވަރާތަކެއް އެމްޑީޕީން ކުރަމުންދާ ކަމުގެ މައުލޫމާތުތައް ލިބެމުންދާ ކަމަށެވެ. އަދި މި މަޝްވަރާތައް ކުރަމުންދަނީ އެމްޑިޕީންގެ އިސް ފަރާތްތަކުގެ މެދުގައިކަން ވެސް ޠަލާލު ފާހަގަކުރެއްވި އެވެ.
"ސެޕްޓެމްބަރު 9 ވަނަ ދުވަހުގެ ވޯޓުގައި ވަކި ހިސާބަކުން މުޅި ގައުމު ހަލަބޮލިކޮށްލުމުގެ މަޝްވަރާތަކެއް، ނޫނީ އެކަންކަން ރޭވުމުގެ މަޝްވަރާތަކެއް އެމްޑީޕީގެ ތެރޭގައި އެމްޑީޕީގެ އިސް ބޭފުޅުން ކުރައްވަމުންދާ ކަމުގެ މައުލޫމާތު އަޅުގަނޑުމެންނަށް ވަނީ ލިބިފައި"
ޑރ މުއިއްޒުގެ ތަރުޖަމާނު ޠަލާލު
ޠަލާލު ވަނީ މި ކަމަށް ރައްޔިތުން ސަމާލުވުމަށް އިލްތިމާސް ކުރައްވާފަ އެވެ. އަދި ރިޔާސީ އިންތިޚާބުގެ ވޯޓުލާ ދުވަހު އެފަދަ ކަމެއް ހިންގުމަށް ފުރުސަތު ނުދެއްވުމަށް ވެސް އެދިވަޑައިގެންފަ އެވެ.
އެއާއެކު އޭނާ ވަނީ ރިޔާސީ އިންތިޚާބަށް ސަރުކާރުން ފޯރުވަމުންދާ ނުފޫޒުތައް ބަލައި، ހަމަނުޖެހުމަށް ހިންގުމަށް ޖާގަ ލިބިދާނެ ފަދަ އެއްވެސް ފުރުސަތެއް އެއްވެސް ބަޔަކަށް ނުދިނުމަށް އިލެކްޝަންސް ކޮމިޝަނާއި ކަމާގުޅުންހުރި އިދާރާތަކަށް ގޮވާލައްވާފަ އެވެ.
Advertisement
This content is created and paid for by advertisers and does not involve Voice Journalists
