މީސްމީޑިއާގައި އުރީދޫ މޯލްޑިވްސް ހެޑްކުއާޓަރާ ގެ ފޮޓޯއެއް ނުވަތަ ރީލް އެއް ހިއްސާކޮށްގެން އިންސްޓާ360 އެއް ހޯދުމުގެ ފުރުސަތު އުރީދޫ މޯލްޑިވްސް އިން ހުޅުވާލައިފި އެވެ. 

އުރީދޫން ބުނީ، މި ފުރުސަތު ހުޅުވާލެވިފައިވަނީ މި އޮގަސްޓު މަހުގެ 28 ވަނަ ދުވަހުން ފެށިގެން ސެޕްޓެމްބަރު މަހުގެ 30 ގެ ނިޔަލަށް ކަމަށެވެ. އަދި އެ މުއްްދަތުގައި އުރީދޫގެ ހެޑްކުއާޓަރގެ ފޮޓޯއެއް ނުވަތަ ވީޑިއޯ އެއް، ޓުވިޓާ، އިންސްޓަގްރާމް، ފޭސްބުކު ނުވަތަ ޓިކްޓޮކް ގައި ހިއްސާކޮށްގެން މި މުބާރާތުގައި ބައިވެރިވެވޭނެ ކަމަށެވެ. 

މިގޮތުން މީސްމީޑިއާގައި ލާ ފޮޓޯ/ވީޑިއޯ އަކީ އެމީހަކު އަމިއްލައަށް ނަގާފައިވާ އެއްޗަކަށް ވާންޖެހޭނެ ކަމަށާ، އެއް ފޮޓޯ/ވީޑިއޯ އަށްވުރެ ގިނައިންވެސް ލެވޭނެ ކަމަށް އުރީދޫއިން ބުނެފައިވެއެވެ. އަދި ޕޯސްޓު މީސްމީޑިއާ އަށް ލާއިރު، އުރީދޫ މޯލްޑިވްސް ގެ ރަސްމީ އެކައުންޓް ޓެގް ކުރުމަށްފަހު "މަވެސް އުރީދޫ" ހޭޝްޓެގް ލިޔުމަށްފަހު ޕަބްލިކް ޕޯސްޓެއްގެ ގޮތުގައި ހިއްސާ ކުރުމަށް އުރީދޫން ވަނީ އެދިފައެވެ. 

Advertisement

މުބާރާތުގައި ބައިވެރިކުރާ ފޮޓޯ އާއި ވީޑިއޯތަކަށް ޖަޖު ކުރާނީ ކަމުގެ ތަޖުރިބާ ހުރި ފަރާތްތަކުން ކަމަށާ، އެގޮތުން ފޮޓޯ/ވީޑިއޯ ކޮލިޓީ އާއި ލައިޓިންގ ފަދަ ކަންކަމުގެ އިތުރުން މީސް މީޑިއާގައި އެއަށް ލިބޭ ލައިކްސް އާއި ޝެއާ އަށްވެސް ބެލޭނެ ކަމަށް އުރީދޫއިން ބުނެއެވެ. 

ވީޑިއޯ ލާނަމަ، ލާ ވީޑިއޯ ގެ ދިގުމިން 30 ސުކުންތާއި އެއްމިނެޓާއި ދެމެދުގައި ބެހެއްޓުމަށް އުރީދޫން އެދެއެވެ. 

މުބާރާތް ނިމުމުން ފޮޓޯ އަދި ވީޑިއޯ ގެ ކެޓަގަރީއިންވެސް ކޮންމެ ކެޓަގަރީ އަކުން ރަނގަޅު އެއްޗެއް ހޮވުމަށްފަހު، އެފަރާތަކަށް އިނާމު ދެވޭނެ ކަމަށް އުރީދޫއިން ބުނެއެވެ.