ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ މި ސަރުކާރުގެ އެންގުމަށް، ޕީޕީއެމް/ޕީއެންސީގެ ސަޕޯޓަރުން މާޔޫސްކުރަން ބައެއް މީޑިއާ ތަކުން މަސައްކަތް ކުރި ނަމަވެސް، އެކަމެއް ނުވާނެ ކަމަށް ޕީޕީއެމްގެ ނާއިބު ރައީސް އަހުމަދު ޝިޔާމް ވިދާޅުވެއްޖެއެވެ. 

ކުރީގެ ރައީސް، އަދި އިދިކޮޅުު ޕީޕީއެމް ގެ ލީޑަރ ރައީސް ޔާމީން އަބްދުލްގައްޔޫމްގެ ތާއީދު،  ޕީޕީއެމް/ޕީއެންސީގެ ކެންޑިޑޭޓް ޑރ. މުހައްމަދު މުޢިއްޒު އަށް ނެތް ކަމަށް ދޭހަވާ މޭރުމުން އޮންލައިން ނޫހެއްގައި ލިޔެފައިވާ ޚަބަރެއް ހިއްސާ ކުރައްވަމުން ޝިޔާމް ކުރެއްްވި ޓުވީޓެއްގައި ވިދާޅުވީ އެފަދަ ޚަބަރުތައް ލިޔުއްވަނީ ޕީޕީއެމް ސަޕޯޓަރުން މާޔޫސް ކުރަން ކަމަށެވެ. އަދި އެފަދައިން ކަން ކުރި ނަމަވެސް އެހެން އެގޮތަށް ނުވާނެ ކަމަށް އޭނާ ވިދާޅުވި އެވެ. 

މިއާއެކު ޝިޔާމް ވިދާޅުވީ އިދިކޮޅު އެންމެން ތިބީ ރައީސް ޔާމީނަށް، ރައީސް ޞާލިހު ކުރައްވަމުންދާ އަނިޔާ ނިންމައި ޑރ.މުއިއްޒު އިންތިޚާބުކުރަން ބަދަހިކަމާއި އެކުއެކީގައި ކަމަށެވެ.

Advertisement

"މިތިބީ ރައީސް ޔާމީނަށް ‎ރައީސް ޞާލިހު މިކުރާ އަނިޔާ ސެޕްޓެމްބަރ 9 ގައި ނިންމާ ޑރ.މުއިއްޒު އިންތިޚާބުކޮށް ރައީސް ޔާމީން މިނިވަންކުރަން. މިބަދަހިކަން  ރޫޅާނުލެވޭނެ إن شاء الله" ޝިޔާމް ވިދާޅުވިއެވެ. 

ބުދަ ދުވަހު އޮތް ވ. އާރަށް ކުއްޔަށް ދިނުމުގެ ތެރެއިން ރިޝްވަތު ނެންގެވި މައްސަލައިގެ އިސްތިއުނާފު އަޑުއެހުން ނިންމާލުމަށްފަހު އިއްޔެ ކޯޓު ރޫމު ތެރޭގައި ހުންނަވައި ކަމަށް އެތަނުގައި އެވަގުތު ތިބި ޕީޕީއެމްގެ ބައެއް މެންބަރުންނާއި ދިމާއަށް، "ޕާޓީ މިއަދު އޮތް ގޮތުން، އަޅުގަނޑާ ބޮލާލާ ޖަހާފައި އެ ގޮތަށް ނުކުމެގެން މުއިއްޒަށް ހަމަ ވޯޓު ގެއްލޭނީ،" ކަމަށް ރައީސް ޔާމީން ވިދާޅުވި ކަމަށް އެ ނޫހުގައި ވެއެވެ. 

އަދި "މުއިއްޒު އެ ޖައްސަވަނީ އަމިއްލަ ފަޔަށް ބަޑި" ކަމަށްވެސް އެމަނިކުފާނު ވިދާޅުވި ކަމަށް އެ ނޫހުގައި ބުނެފައިވެއެވެ.