ހުރިހާ ސިޔާސީ ޕާޓީއެއްގެ ސަރުކާރު ހިންގާ މައި ޕާޓީ އެމްޑީޕީގެ ރިޔާސީ ކެންޑިޑޭޓު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ތަރުޖަމާނު ޑިފެންސް މިނިސްޓަރު މާރިޔާ ދީދީ ދެއްވާ ޕްރެސް ކޮންފަރެންސްތަކުގައި ވާދަވެރި ކެންޑިޑޭޓު ޑރ މުޙައްމަދު މުއިއްޒުގެ ވާހަކަފުޅު ހުއްޓާނުލައްވާ ދައްކަވަމުން ގެންދަވާތީ އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ފާޑުވިދާޅުވެއްޖެ އެވެ. 

ނައިފަރުގައި އޮތް ޑރ މުއިއްޒުގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން އަބްދުއްރަހީމް ވިދާޅުވީ ރިޔާސީ އިންތިޚާބުގެ ވޯޓުނަގަން ހަފްތާއަކަށް ކުޑަތަން ވެފައި ވަނިކޮށް، ކެމްޕޭނު ކުރެއްވުމުގެ ބަދަލުގައި ޕްރޮގްރެސިވް ކޮންގްރެސް ކޯލިޝަންގެ ވާދަވެރިން ދައްކަވަމުން ދަނީ އެ ކޯލިޝަންގެ ކެންޑިޑޭޓު ޑރ މުއިއްޒުގެ ވާހަކަފުޅު ކަމަށެވެ. 

ހުރިހާ ސިޔާސީ ޕާޓީއެއްގެ ޝައުގުވެރިކަން އޮތީ ޑރ މުއިއްޒަށް ހުއްޓިފައި ކަމަށާއި، ހުރިހާ ޕާޓީތަކުން ވެސް މަސައްކަތް ކުރައްވަމުން ދަނީ ޑރ މުއިއްޒު ކުޑައިމީސްކޮށް އެމަނިކުފާނު ބަދުނާމުކުރުމަށް ކަމަށް އަބްދުއްރަހީމް ވިދާޅުވި އެވެ.

Advertisement

ވަކިން ޚާއްސަކޮށް ސަރުކާރުން އެކަން ކުރަމުން ގެންދާ ކަމަށާއި، ރައީސް ޔާމިނުގެ ނަންފުޅު ބޭނުން ކުރައްވައިގެން ވެސް ޑރ މުއިއްޒު ބަދުނާމުކޮށް ދޮގު ވާހަކަތައް ދެއްކުމުގެ މަސައްކަތްތައް ކުރަމުންދާކަމަށް އަބްދުއްރަހީމް ވިދާޅުވި އެވެ. 

އެކަން ފާހަގަކުރައްވާ އަބްދުއްރަހީމް ވިދާޅުވީ މި ރިޔާސީ އިންތިޚާބުގައި ރައީސް ޞާލިހުގެ ތަރުޖަމާނު މާރިޔާ ދީދީ ވެސް އަބަދުވެސް ދައްކަވަމުން ދަނީ ޑރ މުއިއްޒުގެ ކޮންމެވެސް ވާހަކަފުޅެއް ކަމަށެވެ. އެކަމަނާގެ ޒިކުރާ އަކީ، އަދި ކޮންމެ ޕްރެސް ކޮންފަރެންސްއެއްގައި ތަސްބީހައެއް ހެން ކިޔުއްވަނީ ޑރ މުއިއްޒުގެ ނަންފުޅުކަމަށް އަބްދުއްރަހީމް ވިދާޅުވި އެވެ. 

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ ކެންޕެއިން ތަރުޖަމާނު މާރިޔާ--ފޮޓޯ/ ދެން

އަބްދުއްރަހީމް ވިދާޅުވީ ރައީސް ޔާމިނުގެ ތާއީދު ޑރ މުއިއްޒަށް ނެތްކަމަށް ބުނެ ޚަބަރުތަކުގައި ތަފާތު ވާހަކަތައް ލިޔަމުންދަނީ ސަރުކާރު އަޑީގައި އޮވެގެން ކަމަށެވެ. 

ރައީސް ޔާމިނު ވިދާޅުވާ އެއްޗެއް ސަރުކާރަށް، ނުވަތަ ރައީސް ޞާލިހާއި މާރިޔާ ދީދީއަށް އެނގިވަޑައިނުގަންނަވާނެ ކަމަށާއި، ރިޔާސީ ކެމްޕޭނު ހަރަކާތްތައް ކުރިއަށް ގެންދަވަނީ ރައީސް ޔާމިނުގެ އިރުޝާދާއި އެކު ކަމަށް އަބްދުއްރަހީމް ވިދާޅުވި އެވެ. 

އަބްދުއްރަހީމް ވިދާޅުވީ ރައީސް ޔާމީން އެދިވަޑައިގަންނަވަނީ މި ރިޔާސީ އިންތިޚާބު ޑރ މުއިއްޒަށް ކާމިޔާބުކޮށްދިނުމަށް އެމަނިކުފާނަށް ތާއީދުކުރައްވާ ހުރިހާ ރައްޔިތުން ގަދައަޅާ މަސައްކަތްކޮށްދެއްވުމަށް ކަމަށެވެ.

އެމަނިކުފާނާއި ގުޅުވާ ސަރުކާރާއި، އެމަނިކުފާނުގެ ވާދަވެރިން ދައްކަވަމުންދާ ފިތުނަވެރި ވާހަކަތަކުގައި ރައްޔިތުން ޖެހިވަޑައިނުގެން، މި ރިޔާސީ އިންތިޚާބު ޕްރޮގްރެސިވް ކޮންގްރެސް ކޯލިޝަނަށް ކާމިޔާބުކޮށްދެއްވުމަށް ގަދައަޅާ މަސައްކަތްކޮށްދެއްވުމަށް ރައީސް ޔާމީނު އެދިވަޑައިގަންނަވާކަމަށް އަބްދުއްރަހީމް ވިދާޅުވި އެވެ.