ޕްރޮގްރެސިވް ކޮންގްރެސް ކޯލިޝަންގެ ޒުވާނުން އިސް ނަގައިގެން "ދިވެހީންގެ ރާއްޖެ" ނަމުގައި ހުޅުމާލޭގައި ކުރިއަށް ގެންދިޔަ ސައިކަލު ބުރުގައި ގިނަ އަދަދެއްގެ ޒުވާނުން ބައިވެރިވެއްޖެ އެވެ. 

މި ސައިކަލު ބުރަކީ މި ރިޔަސީ އިންތިޚާބުގައި ޕްރޮގްރެސިވް ކޮންގްރެސް ކޯލިޝަން ތަމްސީލުކުރައްވާ ރިޔާސީ ކެންޑިޑޭޓު ޑރ މުހައްމަދު މުއިއްޒަށް ޒުވާނުންގެ ތާއީދު އޮތް މިންވަރު ދައްކާލުމަށް ކުރިއަށް ގެންދިޔަ ހަރަކާތެކެވެ.

ސައިކަލު ބުރުގައި ޑރ މުހައްމަދު މުއިއްޒުގެ ރަނިން މޭޓް ހުސައިން މުހައްމަދު ލަތީފް (ސެންބެ) ވެސް ބައިވެރިވެ ވަޑައިގަތެވެ.

ހުޅުމާލޭގައި ބޭއްވި ސައިކަލު ބުރުގައި ޑރ މުއިއްޒުގެ ރަނިން މޭޓު ހުސެއިން މުޙައްމަދު ލަތީފު

ޒުވާނުން އިސްނަގައިގެން ކުރިއަށް ގެންދިޔަ ސައިކަލު ބުރުގައި ގިނަ އަދަދެއްގެ ޒުވާނުންގެ އިތުރުން ރޭސިންގ އެސޯސިއޭޝަނުން ވެސް ވަނީ ބައިވެރިވެފައެވެ. އަދި ސައިކަލުބުރަށް ފަހު ޑްރިފްޓް ގެ ހަރަކާތް ތަކެއް ވެސް ވަނީ ކުރިއަށް ގެންގޮސްފަ އެވެ.

ހުޅުމާލޭގައި މިއަދު ހަވީރު ކުރިއަށް ގެންދިޔަފަދަ ބޮޑު ސައިކަލު ބުރެއް މާދަމާ ފުރަމާލޭގައި ކުރިއަށް ގެންދިއުމަށް ވެސް ވަނީ ހަމަޖެހިފަ އެވެ. މި ސައިކަލު ބުރުގައި ވެސް ގިނަ އަދަދެއްގެ ޒުވާނުން ބައިވެރިވުމަށް އިދިކޮޅު ކޯލިޝަނުން ވަނީ އެދިފަ އެވެ. 

ހުޅުމާލޭގައި ބޭއްވި ޒުވާނުންގެ ސައިކަލު ބުރުގެ ތެރެއިން 

ޑރ މުއިއްޒު ވަނީ ރާއްޖޭގައި ކުރިއަރަމުން އަންނަ ރޭސިން އަދި ޑްރިފްޓްގެ ހަރަކާތްތައް ކުރިއަށް ގެންދިއުމަށް ޚާއްސަ ސްޓޭޑިއަމްތަކެއް އަޅުއްވާދެއްވާނެ ކަމުގެ ވައުދުވެވަޑައިގެންފަ އެވެ.

މާލޭގައި ވެސް އެފަދަ ސްޓޭޑިއަމެއް އަޅުއްވާނެ ކަމަށާއި، އަދި ޒުވާނުން ބޭނުންވާ ފެންވަރުގެ ސްޕޯޓްސް އެރީނާތައް ރާއްޖޭގެ އެކި ކަންކޮޅުތަކުގައި ގާއިމްކޮށްދެއްވާނެ ކަމަށް ޑރ މުއިއްޒު ވަނީ ވިދާޅުވެފަ އެވެ.