ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ދެވަނަ ދައުރެއްގައި ސިނަމާލޭ ބްރިޖުގައި އިތުރު ލޭނެއް އަޅުއްވަން ވަޢުދުވެވަޑައިގެންފައި ވާއިރު، އެމަނިކުފާނު ވެރިކަމަށް ވަޑައިގަންވަން ވެވަޑައިގެންނެވި އެންމެ ބޮޑު އެއް ވަޢުދު ކަމުގައިވާ ތިލަމާލޭ ބްރިޖުގެ މަޝްރޫއު އަށް ވާނުވާވެސް އެނގިވަޑައި ނުގަންނަވާ ކަމަށް، ޕީއެންސީގެ ނާއިބު ރައީސް މުހައްމަދު ސަޢީދު ވިދާޅުވެއްޖެއެވެ. 

އެމްޑީޕީގެ މާލޭގެ ޕްލޭން އިއުލާން ކުރުމަށް ކާނިވާ ސަރަހައްދުގައި ބޭއްވި ޖަލްސާގައި މާލެ އަށް އެމްޑީޕީން ގެންގުޅޭ ތަސައްވަރު ހާމަކޮށްދޭ ވީޑިއޯއެއް އާންމުކޮށްފައިވާއިރު އޭގައިވާ ގޮތުން ސިނަމާލެ ބްރިޖްގެ ތޮއްޖެހުން ކުޑަކުރުމަށް ބްރިޖު ފުޅާކުރުމުގެ މަސައްކަތް ކުރަން ވަނީ ނިންމައިފަ އެވެ.

ޕްލޭނުގައިވާ ގޮތުން ބްރިޖަށް އިތުރު ދެ ލޭން އިތުރުކޮށް، ޕަބްލިކް ޓްރާންސްޕޯޓް ފުޅާކުރުމަށް ރޭލްގެ ހިދުމަތް ފަށާނެ އެވެ. އެ ހިދުމަތް ފަށާނީ ސިނަމާލެ ބްރިޖު ހިނެމޭ ގޮތަށް ވިލިމާލެ ބްރިޖު ވެސް ހިމެނޭ ގޮތަށެވެ.

Advertisement

އެކަމާއި ގުޅިގެން ސަޢީދު ކުރެއްވި ޓްވީޓެއްގައި ވަނީ، އެކަން ކުރުމަށްޓަކައި، މިހާރު ހުރި ބްރިޖުގެ ބައި ތަކާއި ސްޓްރަކްޗަރ އަށް އިތުރު ބަދަލެއް ނުގެނެސް، އެކަން ކުރެވޭނެ "ރައީސް ޞާލިހު ފަދަ އިންޖީނިއަރެއް ހޯއްދަވަން ޖެހޭނެ" ކަމަށް ވިދާޅުވެ ފާޑުވިދާޅުވެފައެވެ. 

އެހެން އެކަން ނުކުރެވޭނެ ނަމަ، ދެން ޖެހޭނީ، މިހާރުގެ ބްރިޖު ކައިރީ، އެއާއި އެއް ސަފެއްވާގޮތަށް، ރެއިލް ޓްރެކްސް ހިމެނޭ އައު ބްރިޖެއް އަޅަން ކަމަށާ، އެކަމަށްޓަކައި އަނެއްކާ އިތުރު 300-400 މިލިއަން ޑޮލަރާއި, ދުނިޔޭގެ ފެންވަރުގެ އިންޖީނިއަރުން ބޭނުންވާނެ ކަމަށް ސަޢީދު ވިދާޅުވިއެވެ. 

މިއާއެކު ސަޢީދު ވިދާޅުވީ، އައު ލޭނުގެ ވާހަކަ ދައްކަވާއިރު, މި ދައުރުގައި ރައީސް ޞާލިހު އަޅުއްވާނެ ކަމަށް ވިދާޅުވި ތިލަމާލެ ބްރިޖަށް ވާނުވާ ވެސް އެމަނިކުފާނަށް އެނގި ނުލައްވާ ކަމަށެވެ. 

މިއާއެކު ސަޢީދު ވިދާޅުވީ، ރައީސް ޞާލިހުގެ ކިބައިން އެމްޑީޕީ ވެސް މިންޖުވާން ޖެހޭ ކަމަށެވެ. އެޕާޓީއަށް ފައިދާ ހުރި ގޮތަކީ އެއީ ކަމަށްވެސް ސަޢީދު ވިދާޅުވި އެވެ. 

"އެމަނިކުފާނުގެ (ރައީސް ޞާލިހުގެ) ވެރިކަމަކީ ބޮޑު ޖޯކެއް. އެއީ އިގްތިޞާދާއި ގައުމުގެ ސިޔާދަތަށް ހުރި ނުރައްކަލެއް." ސަޢީދު ވިދާޅުވިއެވެ. 

ރައީސް ޞާލިހު ވެރިކަމަށް ވަޑައިގަންނަވަންވެގެން ވެ ވަޑައިގެންނެވި އެންމެ ބޮޑު އެއް ވަޢުދަކީ ތިލަމާލޭ ބުރިޖުގެ މަޝްރޫއުއެވެ. އެ މަޝްރޫއު، ނިމިދިޔަ އޮގަސްޓު މަހުތެރޭގައި ނިމޭނެ ކަމަށް ވެސް ޕްލޭނިންގ މިނިސްޓްރީން މީގެ ކުރިން ބުންޏެވެ. އެހެން ނަމަވެސް، މިހާރު އެ ބްރިޖު ނިމޭނެ ކަމަށް ލަފާކޮށްފައި ވަނީ، އަންނަ އަހަރަށެވެ.