ދިވެހިރާއްޖޭގައި ތިބި ބޭރުގެ ސިފައިން ރާއްޖެއިން ބެލުމަކީ މަޝްވަރާއެއް ބޭނުންވާ ކަމެއް ނޫން ކަމަށާއި އެކަމަށް މަޝްވަރާއެއް ބޭނުން ނުވާނެ ކަމުގައި ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ. 

ރޭ ކުރިއަށް ދިޔަ ސަންގު ޓީވީގެ ރިޔާސީ ބަހުސްގައި ވާހަކަ ދައްކަވަމުން މުއިއްޒު ވިދާޅުވީ، ރާއްޖޭގައި ބޭރުގެ އެއްވެސް ޤައުމެއްގެ ސިފައިން ތިބުމަކީ ބަލައިގަނެވޭނެ ކަމެއް ނޫން ކަމަށެވެ.

ރޭގެ ބަހުސްގައި ރާއްޖޭގައި އިންޑިއާ ސިފައިން ތިބުމާ ގުޅޭ ކުރި ސުވާލަށް ޖަވާބުދެއްވަމުން މުއިއްޒު ވިދާޅުވީ، ބޭރުގެ އެއްވެސް ޤައުމެއްގެ ސިފައިން ރާއްޖޭގައި ތިބުމަކީ ދިވެހިން އެދޭ ކަމެއް ނޫން ކަމަށެވެ. އަދި މަނަވަރެއްގައި ތަމްރީނު ހަދަން އައިސް ފަސް އަހަރު ތިބޭނެތޯ ވިދާޅުވެ މުއިއްޒު ވަނީ ސުވާލު އުފައްދަވާފައެވެ. 

Advertisement

މުއިއްޒުގެ މިފަދައިން ވިދާޅުވީ ހަމަ އެ ސުވާލަށް ޖަވާބު ދެއްވަމުން، ރާއްޖޭގައި ބޭރު ޤައުމެއްގެ ސިފައިން ތިބެނީ ހަމައެކަނި މިލިޓަރީ ތަމްރީނު ހެދުމަށް ކަމުގައި ރައީސް ޞާލިޙް ވިދާޅުވުމުންނެވެ. 

މީގެ އިތުރުން ޑރ.މުޢިއްޒު ވިދާޅުވީ ރާއްޖޭގެ އަމިއްލަވަންތަކަން އަނބުރާ އިއާދަކުރެވޭނީ ރާއްޖޭގައި ތިބި ބޭރުގެ ސިފައިން މި ޤައުމުން ފޮނުވައިލެވިގެން ކަމަށެވެ. އެކަމަކީ ކޮންމެހެންވެސް ކުރަންޖެހޭ ކަމެއް ކަމުގައި އެއީ އެއްވެސް ދިވެއްސަކަށް އެއްބަސްވެވޭނެ ކަމެއް ނޫންކަމަށެވެ. 

ރޭގެ ބަހުސްގައި އިންޑިއާގެ ސިފައިން ރާއްޖެގައި ތިބުމާއި ގުޅޭ ސުވާލަށް ޖަވާބުދެއްވަމުން އުމަރު ނަސީރުވެސް ވަނީ ރާއްޖެގައި މިވަގުތު އިންޑިޔާގެ 200 ސިފައިން ތިބިކަން ތުހުމަތުކޮށްފައެވެ.