ކޯޓުތަކަށް ރައީސް އޮފީހުން ފޯރުވަމުން ގެންދާ ނުފޫޒު ވެރިކަމަށް ހުވާކުރައްވާ ފުރަތަމަ ދުވަހު ނިމުމަކަށް ގެންނާނެ ކަމަށާއި، އެ ހިސާބުން ރައީސް ޔާމިނު މިނިވަންވެގެންދާނެ ކަމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ވިދާޅުވެއްޖެ އެވެ. 

ޑރ މުއިއްޒު މިފަދައިން ވިދާޅުވެފައި ވަނީ ވެރިކަމަށް އިންތިޚާބުވެއްޖެ ނަމަ ރައީސް ޔާމިނާއި ދޭތެރޭގައި ކަންތައް ކުރައްވާނެ ގޮތް ސާފުކޮށްދެއްވުމަށް އައްސަވާ ރިޔާސީ ކެންޑިޑޭޓުންގެ ބަހުސުގައި ކުރި ސުވާލުތަކަށް ޖަވާބުދެއްވަމުން ނެވެ. 

އެ ސުވާލުތަކަށް ޖަވާބުދެއްވަމުން ޑރ މުއިއްޒު ވިދާޅުވީ އެމަނިކުފާނު މި ރިޔާސީ އިންތިޚާބުގައި ވާދަކުރައްވަނީ ރައީސް ޔާމީނުގެ ފުރިހަމަ ތާއީދާއި އެކުގައި ކަމަށެވެ. އަދި އެމަނިކުފާނަށް އެރުވި ޓިކެޓަކީވެސް ރައީސް ޔާމިނުގެ ތާއީދާއެކު ލިބިގެންދިޔަ ޓިކެޓެއް ކަމަށެވެ. 

ރައީސް ޔާމީން މިވަގުތު ނުހައްގު ޖަލު ހުކުމެއް ތަންފީޒު ކުރައްވަމުން ގެންދަވާއިރު، އެއީ އިންތިހާއަށް ސިޔާސީ ނުފޫޒު ފޯރުވައިގެން ކޮށްފައިވާ ހުކުމެއްކަމަށް ޑރ މުއިއްޒު ވިދާޅުވި އެވެ. އެއާއެކު އެމަނިކުފާނު ވިދާޅުވީ ރައީސް ޔާމީނަކީ މައުސޫމު ބޭފުޅެއް ކަމަށާއި، ޝަރުއީ ދާއިރާއަށް އޮތް ނުފޫޒު ނައްތާލާ ކޯޓުތައް މިނިވަން ކުރުމާއެކު، ރައީސް ޔާމީން މިނިވަންވެގެންދާނެ ކަމަށެވެ. 

ވެރިކަމަށް ވަޑައިގެން އެންމެ ފުރަތަމަ ވެސް ކުރައްވާނެ ކަމަކީ ރައީސް އޮފީހުން ކޯޓުތަކަށް ނުފޫޒު ފޯރުވުން ހުއްޓުވުންކަމަށް ޑރ މުއިއްޒު ވިދާޅުވި އެވެ. އެއާއެކު ރައީސް ޔާމީނު މިނިވަން ވެގެންދާނެކަމަށް ޑރ މުއިއްޒު ވިދާޅުވި އެވެ. 

ޑރ މުއިއްޒު ރިޔާސީ ބަހުސްގައި ވާހަކަދައްކަވަނީ

ރައީސް ޔާމިނަށް ރިޔާސީ އިންތިޚާބުގައި ވާދަކުރުމުގެ ފުރުސަތު ގެއްލިވަޑައިގަތީ، އެމަނިކުފާނުގެ ކެންޑިޑެސީ ބަލައިނުގަތުމަށް އިލެކްޝަންސް ކޮމިޝަނުން ނިންމި ނިންމުން ސުޕްރިމް ކޯޓުން ދެމެހެއްޓުމާއި ގުޅިގެންނެވެ. 

މިއަހަރުގެ ރިޔާސީ އިންތިޚާބަށް ކުރިމަތިލާ ފަރާތްތަކުން ފޯމު ހުށައެޅުމަށް ހުޅުވާލިއިރު، ރައީސް ޔާމިނު ހުންނެވީ އެމަނިކުފާނުގެ މައްޗަށް އާރަށުގެ މުއާމަލާތާއި ގުޅުވާ ކޮށްފައިވާ 11 އަހަރުގެ ޖަލުހުކުމެއްގަ އެވެ. އެމަނިކުފާނުގެ ފަރާތްޕުޅުން އެ މައްސަލަ އިސްތިއުނާފުކޮަށް ދެ މަހަށްވުރެ ގިނަ ދުވަސް ވެގެންދިޔައިރު ވެސް އެ މައްސަލައާއި މެދު އޮތީ ގޮތެއް ނުނިންމައެވެ. 

ރައީސް ޔާމިނުގެ އިސްތިއުނާފު މައްސަލަ ނުނިމި އޮތް އޮތުމަކީ، ސުޕްރިމްކޯޓުން ކެންޑިޑެސީ މައްސަލަ، އެމަނިކުފާނާއި ދެކޮޅަށް ނިންމި މައިގަނޑު ސަބަބުކަމަށް ގާނޫނީ ވަކީލުން ފާހަގަކުރައްވަ އެވެ. 

އެއާއެކު އިދިކޮޅު ކޯލިޝަން ތަމްސީލުކުރައްވާ ކެންޑިޑޭޓަކީ ޑރ މުހައްމަދު މުއިއްޒުކަމުގައި ކަނޑައަޅާ އެމަނިކުފާނުގެ ނަންފުޅު ހުށައެޅިއެވެ. ހައްސާސް ކަންތައްތަކެއްގެ ތެރެއިން ޑރ މުއިއްޒުގެ ރިޔާސީ ކެންޑިޑެސީ ކަށަވަރުވެގެން ދިޔަ ނަމަވެސް، ރައީސް ޔާމީން ވަނީ އެމަނިކުފާނުގެ ފުރިހަމަ ތާއީދު ޑރ މުއިއްޒަށް އޮތްކަމަށް ވިދާޅުވެފަ އެވެ. 

މި ރިޔާސީ އިންތިޚާބު އެއްބުރުން ޑރ މުއިއްޒަށް ކާމިޔާބުކޮށްދެއްވުމަށް ރައީސް ޔާމީން ވަނީ އެމަނިކުފާނުގެ ސަޕޯޓަރުންގެ އަރިހުން އެދިވަޑައިގެންފަ އެވެ. އެގޮތުން އެމަނިކުފާނު ވަނީ މި އިންތިޚާބުގައި، ސިޔާސީ ފަރާތްތަކާއި، ސަރުކާރު ގުޅިގެން އުފައްދާ ފިތުނަތަކުގައި ނުޖެހި ރިޔާސީ ކެމްޕޭނުގެ ހަރަކާތްތައް ވަރުގަދަކޮށް ޑރ މުއިއްޒު އިންތިޚާބުކުރުމަށް މަސައްކަތްކޮށްދެއްވުމަށް ސަޕޯޓަރުންގެ އަރިހުން އެދިވަޑައިގެންފަ އެވެ.