ތ. އަތޮޅު ވޭމަންޑޫ އާއި ކިނބިދޫގެ ބިން ހިއްކައި، އެ ދެ ރަށް ގުޅުވާލައްވާނެ ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓު އަދި މާލޭގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.

ރިޔާސީ ކެމްޕެއިނަށް ތ އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން، އެ އަތޮޅު ވޭމަންޑޫއަށް ވަޑައިގެން އެރަށު ސަޕޯޓަރުންނާއި ބައްދަލު ކުރައްވާ ވާހަކަފުޅު ދައްކަވަމުން މުޢިއްޒު ވިދާޅުވީ، ކުރިއަށް އޮތް ރިޔާސީ އިންތިހާބު އެއްބުރުން އެމަނިކުފާނަށް ކާމިޔާބު ކޮށްދެއްވުމުގައި ވޭމަންޑޫއިން ފުރިހަމަ ނަތީޖާ އެއް ނެރެދޭނެ ކަމަށެވެ. 

މިއާއެކު މުޢިއްޒު ވިދާޅުވީ، ވޭމަންޑޫ އަކީ ތަރައްގީއަށް ލޯބިކުރާ، ގިނަ މަޝްރޫއުތަކެއް ހިންގޭނެ އިގްތިޞާދީ ގޮތުން ވެސް ކުރިއަށް ދިޔުމުގެ ފުރުޞަތު އޮތް ރަށެއް ކަަމަށެވެ. 

އެގޮތުން ކުރީގެ ރައީސް ޔާމީންގެ ވެރިކަމުގައިވެސް ވޭމަންޑޫ އާއި އެ ސަރަހައްދުގެ ތަރައްގީ އަށް އިސްކަންދެއްވިކަން ފާހަގަކުރައްވަމުން މުޢިއްޒު ވިދާޅުވީ، ވޭމަންޑު އާއި ކިނބިދޫ ގުޅުވާލުމަކީ، ރައްޔިތުން ބޭނުންވާ ކަމެއް ކަމަށާއި، އެއީ ރައީސް ޔާމީންވެސް 2018ގެ ވައުދެއްވެސް ކަމަށެވެ.

މުޢިއްޒު ވިދާޅުވީ ދެ ރަށް ގުޅުވާލުމުގެ މަޝްރޫއުއާއި އެކީގައި ދެ ރަށުގައިވެސް ބިން ހިއްކުމުގެ މަޝްރޫއެއް ކުރިއަށް ގެންދަވާނެ ކަަމަށެވެ. އަދި އެއީ އިގްތިޞާދީ ގޮތުން ނަފާވާނެ މަޝްރޫއު އަކަށް ވެގެންދާނެ ކަމަށްވެސް އެމަނިކުފާނު ވިދާޅުވި އެވެ. 

"މި ޖާގަ އަކީ، މުސްތަގުބަލުގައި ރާއްޖޭއަށް، ރާއްޖޭގެ ބިން އިތުރު ކުރަމަށް އަޅުގަނޑުމެން ހަދާފައިވާ މާސްޓާ ޕްލޭން އަށްވެސް މުހިންމު ސަރަހައްދެއް. ދުރުރާސްތާ އަށްވެސް ވަރަށް މުހިންމު. އެހެންވީމާ މި ދެރަށް ގުޅާލުމާއި ބިން ހިއްކުމުގެ މަޝްރޫއަކީ ދެކޮޅު ޖެހޭ ސިޔާސަތެއްގެ ގޮތެއްގެ ގޮތުގައި، އެއީ ހަރަދަކަށްވުރެ ނަފާ އަނބުރާ ލިބޭ ބޮޑު އިންވެސްޓްމެންޓެއްގެ ގޮތުގައި އަޅުގަނޑުމެންނަށް ފެންނަނީ." މުޢިއްޒު ވިދާޅުވިއެވެ. 

އެ މަޝްރޫއު ތަކުގެ އިތުރުން މުއިއްޒުގެ ވެރިކަމެއްގައި ވޭމަންޑޫ އަށް ކޮށްދޭނެ ކަމަށް ވަޢުދުވެވަޑައިގެންނެވި ކަންކަމަކީ؛ 

1) މަގުތައް ތާރު އަޅައިގެން ޒަަމާނީ ފެންވަރަށް ތަރައްޤީކުރުން 

2) ރަނގަޅު ފެންވަރެއްގެ ބޮޑު ބަނދަރެއް

3) ހޮސްޕިޓަލް ރަނގަޅަށް ފެންވަރަކަށް ބަދަލު ކުރުން

4) ޒުވާނުންނަށް ހާއްސަ ކުޅިވަރު ކުޅުމުގެ ފުރުސަތުތައް

5) ޒަމާނީ ފެންވަރުގެ ރީތި ބޮޑު މިސްކިތެއް