ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުޢިއްޒު، ރިޔާސީ އިންތިހާބު ކާމިޔާބު ކުރައްވާނީ އެމްޑީޕީގެ މެންބަރުންގެ ވެސް ވޯޓާއި އެއްކޮށް ކަމަށް، އެމަނިކުފާނުގެ ކެންޕެއިން ތަރުޖަމާނު މުހައްމަދު ތޮލާލް ވިދާޅުވެއްޖެއެވެ. 

ޕީޕީއެމްގެ ތަރުޖަމާނުގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ އުފަން ރަށް، ޅ އަތޮޅު ހިންނަވަރާއި އެމްޑީޕީ މެޖޯރިޓީ އޮންނަ އައްޑު އަތޮޅު ހިމެނޭ ހެން، މުޅި ރާއްޖެއިން ޑރ. މުޢިއްޒު އަށް އޮތީ ކިހާ ތާއީދެއްތޯ ސުވާލު ކޮށްފައެވެ. 

އެ ސުވާލަށް ޖަވާބު ދެއްވަމުން ތޮލާލް ވިދާޅުވީ، މިހާރު ފެންނަ މަންޒަރު ތަކަށް ބަލާއިރު، ހިންނަވަރުންވެސް މީގެ ކުރިން ޕީޕީއެމަށް ނުލިބޭ ތާއީދު މިހާރު ޕީޕީއެމަށް އޮތް ކަމަށެވެ. އެހެންކަމުން، ހިންނަވަރުން ލިބޭ ވޯޓުވެސް އެތައް ގުނައެއް އިތުރުވެގެންދާނެ ކަމަށް ތޮލާލް ފާހަގަކުރެއްވިއެވެ. 

ތޮލާލް ވިދާޅުވީ، ކުރިއަށް އޮތް ރިޔާސީ އިންތިހާބު އެއްބުރުން ނިންމުމަށް ދިވެހި ރައްޔިތުންވެސް ބޭނުންވާ ކަން ފެންނަ މަންޒަރު ތަކުން ހާމަވާ ކަމަށާ، އަދި އިންތިހާބު ޑރ. މުޢިއްޒު އަށް ކާމިޔާބު ކޮށްދެއްވުމަށް ބޭނުންވަނީ ހަމައެކަނި ޕީޕީއެމް މެންބަރުން ނޫން ކަމަށެވެ. 

ތޮލާލު މިފަދައިން ވިދާޅުވެފައި ވާއިރު، ދާދިފަހުން، ޑރ. މުޢިއްޒު ހިންނަވަރާއި އައްޑޫ ސިޓީއަށް ކުރެއްވި ދަތުރުފުޅުގައި އެމަނިކުފާނަށް މަރުހަބާ ދެންނެވުމަށް ވަރަށް ގިނަ އަދަދެއްގެ ރައްޔިތުން ވަނީ ވަޑައިގެންފައެވެ.