ކުރިއަށް އޮތް ރިޔާސީ އިންތިހާބުގައި ޕީޕީއެމް ޕީއެންސީގެ ފަރާތުން ވާދަކުރައްވާ ކެންޑިޑޭޓު ޑރ މުހައްމަދު މުއިއްޒަށް ތާއީދު ކުރެއްވުމަށް ދީނީ ޢިލްމުވެރިޔާ އަދި ދިވެހިރާއްޖޭގެ އިސްލާމީ ޔުނިވަރސިޓީގެ ލެކްޗަރަރ އަލްއުސްތާޛާ ސާމިޔާ ޒަކަރިއްޔާ ނިންމައިފިއެވެ. 

މިކަން ހާމަކުރައްވައި ސާމިޔާ ކުރެއްވި އެފްބީ ޕޯސްޓެއްގައި ބުނެފައިވަނީ، އެ ނިންމުމަކީ އަމިއްލަފުޅު ނިންމުމެއްކަމަށާއި މާތް الله ގެ އިރާދަފުޅާއެކު ބަދަލަކަށް ޑރ މުހައްމަދު މުއިއްޒު ހޮވުމަށެވެ. 

މީގެ އިތުރުން ސާމިޔާ ވިދާޅުވީ، ޑރ. މުޢިއްޒަކީ މިވަގުތު ދިވެހިރާއްޖެ އޮތް ޙާލަތުން އެއަށްވުރެ ރަނގަޅު ޙާލަތަކަށް ގެންގޮސްދިނުމުގެ ޢިލްމާއި،ތަޖުރިބާ އާއި ޤާބިލިއްޔަތު ކަން ހުރި ކެންޑިޑޭޓު ކަމުގައިގަބޫލު ކުރައްވާކަމަށާއި، ޑރ.މުޢިއްޒުގެ އެންމެ ފާހަގަކޮށްލެވޭ ޞިފައަކީ، އިދިކޮޅު ކެންޑިޑޭޓުންނަށް ކުޑައިމީސް ބަސްފުޅެއް ވިދާޅުނުވެ، އެމަނިކުފާނުގެ ވިޝަން އާއި މިޝަން އަދި ކަންކަން ރާއްވަވާ ހިންގަވާނެ ގޮތް ރައްޔިތުންނާއި ޙިއްސާކުރެއްވުން ކަމުގައި ސާމިޔާގެ ޕޯސްޓްގައި ބުނެފައިވެއެވެ. 

އަދި މީގެ އިތުރުންވެސް ޑރ މުއިއްޒަކީ، ނަމޫނާ ދައްކަވާ، އިސްލާމްދީނަށް ލޯބިކުރައްވާ، ޢަމަލުކުރައްވާ ބޭފުޅެކެވެ. ގައުމަށް އިޚްލާސްތެރި، ވަފާތެެރި، ވަޠަނީ ރޫޙެއްގައި މަސައްކަތް ކުރައްވާ، ގައުމީ ދަރިއެއްްގެ ގޮތުގައި ސާމިޔާ ވަނީ ސިފަކުރައްވާފައެވެ. 

ރިޔާސީ އިންތިހާބަށް 7 ދުވަހަށް ވެފައިވާއިރު ގިނަ އަދަދެއްގެ އިލްމުވެރިން އަންނަނީ މި އަހަރުގެ ރިޔާސީ އިންތިހާބުގައި ޑރ މުހައްމަދު މުއިއްޒަށް ތާއިދު ކުރައްވާކަން ހާމަކުރައްވަމުންނެވެ.