ލ ގަމުގައި ނޭޝަނަލް މެންޓަލް ހެލްތް ހޮސްޕިޓަލެއް ގާއިމްކޮށްދެއްވުމަށް ޕީޕީއެމް/ ޕީއެންސީގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ވައުދުވެވަޑައިގެންފިއެވެ.
ރިޔާސީ އިންތިހާބުގެ ކެމްޕެއިނަށް ލ ގަމަށް ވަޑައިގެން އެ ރަށުގެ ރައްޔިތުންނާއި މުހާތަބުކޮށް ވާހަކަދައްކަވަމުން މުއިއްޒު ވިދާޅުވީ ރާއްޖޭގައި ނަފްސާނީ ބަލިތައް ތަހައްމަލް ކުރަމުންދާ މީހުން ވަރަށް ގިނަ ކަމަށެވެ. އެހެންކަމުން ނޭޝަނަލް މެންޓަލް ހެލްތް ހޮސްޕިޓަލެއް ހުރުމަކީ ވަރަށް މުހިންމު ކަމެއް ކަމަށް އޭނާ ވިދާޅުވި އެވެ.
"އަޅުގަނޑުމެން އެހެން ރަށެއްގައި އިއުލާންކުރި އަޅުގަނޑުމެންގެ ހެލްތް މެނިފެސްޓޯގައި ހިމަނާފައި ވާނީ. އެއީ ރާއްޖޭގައި ވަރަށް ގިނަ ނަފްސާނީ ބަލިތައް. މުޖުތަމައު އޮތް ގޮތުން، ނޭޝަނަލް ލެވެލްގެ މެންޓަލް ހެލްތް ހޮސްޕިޓަލެއް އަޅަން ވަކި ރަށެއް މީގެ ކުރިން އިއުލާނެއް ކޮށްފައިނުވާނެ." މުޢިއްޒު ވިދާޅުވިއެވެ.
މުޢިއްޒު ވިދާޅުވީ ބޭރުގައުމު ތަކުގައިވެސް މެންޓަލް ހެލްތު ހޮސްޕިޓަލު އަޅަނީ ހިތްފަސޭހަ ތަންތަނުގައި ކަމަށެވެ. އެހެންކަމުން ރާއްޖޭގެ އެ ހޮސްޕިޓަލު އަޅާނީ ގަމުގައި ކަމަށް ވެސް އެމަނިކުފާނު ވިދާޅުވި އެވެ.
"ބޭރު ގައުމު ތަކުގައިވެސް އެ ހޮސްޕިޓަލް އަޅަނީ ވަރަށް ހިތްފަސޭހަ ގަސްގަހާގެހި ގިނަ ހިތް ގައިމު މީހުން ބާރުބޮޑުވުން މަދު އެކަހަލަ ތަނަކަށް ދިޔައީމަ ހިތްފަސޭހަ ކަން ލިބޭނެ މާހައުލެއް. އެހެންވީމާ ނޭޝަނަލް މެންޓަލް ހެލްތް ހޮސްޕިޓަލެއް އަޅާނީ އިރާދަކުރެއްވިއްޔާ ގަމުގައި ކަން އިއުލާން ކުރަން.
ޑރ. މުހައްމަދު މުޢިއްޒު
މީގެ އިތުރުން މުއިއްޒު ވަނީ ގަމުގައި ހުރި ޓާޝަރީ ހޮސްޕިޓަލްއިން ހުރިހާ ހިދުމަތްތަކެއް ލިބޭނެ ގޮތް ހަމަޖައްސަވައިދެއްވާނެ ކަމަށާ އަދި އެއީ ތަފާތު ހިދުމަތްތަކެއް ދޭ ހޮސްޕިޓަލެއްގެ ގޮތުގައި ހައްދަވާނެކަމަށް ވައުދުވެވަޑައިގެންފައެވެ. އެގޮތުން އެތަނުގައި ބިހޭވިއަރަލް ތެރަޕީ ފަދަ ތެރަޕީތައްވެސް ދެވޭނެ ކްލިނިކް އެއް ގާއިމް ކޮށްދެއްވާނެ ކަމަށް އޭނާ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
