Majeedhiyya ge handhaan au kurahvvai Ghassan kiyai dhehvvse Muizzu ge thoonufili kamuge vaahakathah!

މަޖީދިއްޔާގެ ހަނދާންތައް އައުކުރައްވައި ޣައްސާން ކިޔައިދެއްވީ މުޢިއްޒުގެ ތޫނުފިލި ކަމުގެ ވާހަކަތައް!

04 Sep 2023 | 10:39

ގުރައިދޫ ޖަލްސާގައި ޣައްސާން ވާހަކަދައްކަވަނީ-- ފޮޓޯ/ ޕީޕީއެމް

ގުރައިދޫ ދާއިރާގެ މެންބަރު ޣައްސާން މައުމޫން މަޖީދިއްޔާ ސްކޫލުގައި ސާނަވީ ތަޢުލީމު ހާސިލް ކުރައްވަމުން ދިޔަ ދުވަސްވަރު، ޕީޕީއެމް/ޕީއެންސީގެ ކެންޑިޑޭޓް ޑރ. މުހައްމަދު މުޢިއްޒު ގެ ކިބައިން ފެނިވަޑައިގެންނެވި ތޫނު ފިލިކަމުގެ ބައެއް ވާހަކަތައް ކިޔައިދެއްވައިފިއެވެ.

ރިޔާސީ ކެންޕެއިނަށް ތ. ގުރައިދޫ އަށް ކުރެއްވި ދަތުރުފުޅުގައި އެ ރަށު ރައްޔިތުންނާ ބައްދަލު ކުރައްވާ ވާހަކަ ދައްކަވަމުން ޣައްސާން ވިދާޅުވީ، އޭނާ ގުރޭޑް 8 ގައި ތައުލީމު ހާސިލް ކުރައްވަމުން ދިޔައިރު ޑރ. މުއިއްޒު ތައުލީމް ހާސިލް ކުރައްވަމުން ދިޔައީ އެއަށްވުރެ މަތީ ގުރޭޑެއްގައި ކަމަށެވެ.

އެހެންނަމަވެސް، މީހުންގެ ތުންތުންމަތިން، އެ ސުކޫލުގައި އުޅޭ ވަރަށް ތޫނުފިލި، ވަރަށް މޮޅު ދަރިވަރެއްގެ ވާހަކަ އިވެމުންދިޔަ ކަމަށާ، އެއީ ކާކުކަން ބެލުމުގެ ޝައުގުވެސް އުފެދިގެން ދިޔަކަމަށް އޭނާ ވިދާޅުވި އެވެ.

ޑރ. މުޢިއްޒުގެ ވާހަކަ އަޅުގަނޑު އަޑު އަހަންފެށީ، އަޅުގަނޑު 1993 ވަނަ އަހަރު، މަޖީދިއްޔާ ސުކޫލުގެ ގުރޭޑު 8 ގައި ތައުލީމު ހާސިލް ކުރަމުންދިޔައިރު. އަޅުގަނޑަށްވުރެ ތަންކޮޅެއް މަތީ ބެޗެއްގައި ޑރ.މުޢިއްޒު އުޅުއްވީ. އެހެންނަމަވެސް، ކްލާސްތަކުގައި ތުންތުން މަތިން އެނގޭ، ވަރަށް ތޫނުފިލި ކުއްޖަކު މި ސުކޫލުގައި އެބަ އުޅެޔޭ. ވަރަށް ކިޔެވުމަށް ފަރުވާތެރި، ވަރަށް މޮޅު، ހުރިހާ މާއްދާއަކުން އެންމެ މަތީ މާކުސް ގެންނަ ކުއްޖަކު މި ސުކޫލުގައި އެބަ އުޅެޔޭ. ދެން އަޅުގަނޑުމެން އެންމެ ހިތަށް އަރައިފި، މިއީ ކާކުތީ ބަލަން ޖެހޭނެއޭ. މިހާ މޮޅު މީހެއް އުޅެންޏާ މިއީ ކާކުތޯ ބަލަންޖެހޭނެއޭ. އެހެން ބަލަމުންދިޔައިރު ކަން ދިމާކުރި ގޮތުން އެއީ، ޑރ. މުހައްމަދު މުޢިއްޒު.

ޣައްސާން މައުމޫން

ޣައްސާން ވިދާޅުވީ، ޑރ. މުޢިއްޒު އަކީ ރާއްޖޭގައި އެންމެ ފުރަތަމަ ފަހަރަށް އެންމެ ގިނަ މާއްދާ އޯލެވެލްގައި ހަދައިގެން، މަތީ މާކުސް ހޯއްދެވި ފުރަތަަމަ ބޭފުޅާ ކަމަށެވެ. އެގޮތުން، އޯލެވެލްގައި އެމަނިކުފާނަށް 17 މާއްދާއިން އޭ ފާސް ލިބިވަޑައިގެންނެވި ކަން އޭނާ ފާހަގަކުރެއްވިއެވެ.

އެމަނިކުފާނަކީ ރާއްޖޭގެ އެންމެ ފުރަތަމަ، އޯލެވެލް އިމްތިހާނުގެ، ގިނަ މާއްދާތަކެއް ހައްދަވައި، އެއީ ސުކޫލުގައި ނަގައިދޭ ފިލާވަޅު ތަކުގެ ބޭރުން އަމިއްލައަށް ތައްޔާރުވެވަޑައިގަންނަވައިގެން، އޯލެވެލް އިމްތިހާނުގައި ބައިވެރިވެވަޑައިގަންނަވާ، ގިނަ މާއްދާ ތަކަކުން، އަޅުގަނޑު ހަނދާން ގޯސް ނޫން ނަމަ، 17 މާއްދާއިން އޭ ހޯއްްދެވި ބޭފުޅެއް އެއީ. އަދި އެ އަހަރު، ރައީސުލްޖުމްހޫރިއްޔާ ގެ ސްކޯލާޝިޕް ހޯއްދަވައިގެން، ރާއްޖެއިން ބޭރަށް، އިނގިރޭސި ވިލާތަށް ކިޔަވާވިދާޅުވާން ވަޑައިގެންނެވި ބޭފުޅެއް އެއީ. އެމަނިކުފާނު އެތަނުގައި ކުރެއްވި މަސައްކަތުގައި ޔުނިވާސިޓީ އިންވެސް ހޯއްދެވީ އެއްވަނަ.

ޣައްސާން މައުމޫން

މިއަދު ޑރ. މުއިއްޒު އަކީ ސްޓްރަކްޗަރަލް އިންޖިނިއަރިން އިން ޕީއެޗްޑީ ހާސިލް ކުރައްވައިގެން ހުންނެވި، ތަޖުރިބާކާރު ބޭފުޅެއް ކަމަށް ޣައްސާން ވިދާޅުވިއެެވެ. އަދި އެމަނިކުފާނު ދަރިވަރުވެ ވަޑައިގެންނެވީ ކުރީގެ ރައީސް، ރައީސް އަބްދުالله ޔާމީން އަބްދުލްގައްޔޫމް ގެ އަރިހުން ކަމަށާ، އެއީ ރައީސް ޔާމީން ފޮނުއްވި ބޭފުޅެއް ކަމަށްވެސް ޣައްސާން ވިދާޅުވިއެެވެ.

އެހެންކަމުން، ޑރ. މުއިއްޒު ވެ ވަޑައިގަންނަވާ ވަޢުދުތައް ފުއްދަވާނެ ކަމަށް ވިދާޅުވަނީ އެ ސަބަބުތަކާއި ހުރެ ކަމަށްވެސް ޣައްސާން ވިދާޅުވިއެެވެ.

ހަބަރު

މުޙައްމަދު ޣައްސާން މައުމޫން

ރައީސް ޑޮކްޓަރ މުޙައްމަދު މުޢިއްޒު

ރިޔާސީ އިންތިޚާބު 2023

ޕްރޮގްރެސިވް ޕާޓީ އޮފް މޯލްޑިވްސް

ތ. ގުރައިދޫ