ޕީޕިއެމް/ޕީއެންސީ ގެ ވެރިކަމެއްގައި ލ އަތޮޅުގައި ތަރައްގީކުރުމަށް ނިންމާފައިވާ ޑޮމެސްޓިކް އެއަރޕޯޓް އަޅާނެ ސަރަހައްދެއް ކަނޑައަޅާނީ ވަރަށް ވިސްނާފައި ދިރާސާތައް ކުރުމަށްފަހު ކަމަށް އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުޢިއްޒު ވިދާޅުވެއްޖެއެވެ.

ރިޔާސީ އިންތިޚާބުގެ ކެމްޕެއިންގައި އިދިކޮޅުގެ ރިޔާސީ ކެންޑިޑޭޓް ޑރ.މުޢިއްޒު ލ.އަތޮޅަށް މިހާރު ކުރައްވަމުން ގެންދަވާ  ދަތުރުފުޅުގައި އެ އަތޮޅުގެ ހިތަދޫ އަށް ވަޑައިގަތުމުން، މާމެންދޫ، ކުނަހަންދޫ އަދި ހިތަދޫގެ ގިނަ އަދަދެއްގެ ޒުވާނުން ތަކެއް ވަނީ ނިކުމެ މެންދޫގައި ޑޮމެސްޓިކް ވައިގެ ބަނދަރެއް ޤާއިމްކޮށްދިނުމަށް އެދިފައެވެ.

މިއަދު ހިތަދޫގެ ރައްޔިތުންނާ ބައްދަލުކޮށް ވާހަކަ ދައްކަވަމުން މުޢިއްޒު ވިދާޅުވީ ލ.އަތޮޅުގެ 3 ރަށަކުން މިހާރު އެއާޕޯޓެއް އަޅަން ބޭނުންވެގެން އެދިފައިވާކަމަށާއި އޭނާ ގަބޫލު ކުރައްވާ ގޮތުގައި ލ.ކައްދޫގައި އޮންނަ އެއާޕޯޓްގެ އިތުރުން ލ އަތޮޅުގެ އެހެން ސަރަހައްދެއްގައި ވެސް އެއާޕޯޓެއް އޮންނަން ޖެހޭކަމަށެވެ. މީގެ އިތުރުން ލ.އަތޮޅު ފަދަ ބޮޑު އަތޮޅެއްގައި އެންމެ އެއާޕޯޓެއް އޮތުމުން ފަތުރުވެރިކަމަށް އެކަށީގެންވާ ކުރިއެރުމެއް ނުލިބޭކަން ވެސް މުޢިއްޒު ވަނީ ވާހަކައިގައި ފާހަގަކުރައްވާފައެވެ.

މުޢިއްޒު ކެމްޕެއިންނަށް ލ.އަތޮޅުގެ ރަށްރަށަށް ވަޑައިގެން އެ ރަށްރަށުގެ ރައްޔިތުންނާ ބައްދަލުކޮށް ވާހަކަ ދައްކަވަމުން އެއާޕޯޓް ބޭނުންވާ ކަމަށް ވިދާޅުވި ނަމަވެސް އަދި އެއާޕޯޓް އެޅޭނެ ވަކި ސަރަހައްދެއް ނިންމަވާފައި ނުވެއެވެ.

މީގެ އިތުރުން މުއިއްޒުވަނީ އެމަނިކުފާނުން އަބަދުވެސް ކަންކަން ކުރައްވަނީ އަދި ކުރައްވާނީވެސް އެގޮތަށް ކަމުގައި ވިދާޅުވިއެވެ.