އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުގެ ކެމްޕެއިން ހަރަކާތްތަކަށް ކުރީގެ ރައީސް ޔާމީންގެ އަނބިކަނބަލުން އަދި ކުރީގެ ފަސްޓް ލޭޑީ ފާތިމަތު އިބްރާހިމް މިރޭ ރަސްމީކޮށް ނުކުމެވަޑައިގަންނަވަން ނިންމަވައިފިއެވެ. 

މައުލޫމާތު ލިބިފައިވާގޮތުން ޑރ މުހައްމަދު މުއިއްޒުގެ ކެމްޕެއިން ހަރާކާތަކުގައި ރަސްމީކޮށް ބައިވެރިވުމުގެ ގޮތުން، ކާނިވާ ސަރަހައްދުގައި ހަދާފައިވާ ޕީޕީއެމްގެ މައި ޖަގަހަ އަށް މިރޭ 8:30 އަށް ފާތުން ވަޑައިގެން ކެމްޕެއިން ޓީމުތަކާ ބައްދަލުކުރެއްވުމަށް ވަނީ ހަމަޖެހިފައެވެ.

އަދި އެ ކަމަނާ ވަޑައިގަންނަވާތީ އެ ބައްދަލުވުންތަކަށް ދިއުމަށް ޕީޕީއެމްގެ އިސް ބައެއް އެކްޓިވިސްޓުން މިހާރު ދައުވަތު ފޮނުވަމުން އަންނަކަމުގެ މައުލޫމާތުވެސް ލިބެއެވެ. 

Advertisement

މިއީ ޕީއެންސީގެ ރިޔާސީ ޓިކެޓް މުއިއްޒަށް ދޭން އެ ޕާޓީގެ ކައުންސިލުން ފާސްކުރި ފަހުން ޔާމީންގެ އަނބިކަނބަލުން މުއިއްޒުގެ ކެމްޕެއިން ހަރަކާތްތަކަށް އަމަލީ ގޮތުން ނުކުންނަވާ ފުރަތަމަ ފަހަރެވެ. ނަމަވެސް މުއިއްޒުގެ އަރިހުގައި މަސައްކަތްކުރާ އެކި އިސްބޭފުޅުން ވިދާޅުވާ ގޮތުގައި މުއިއްޒު ކެމްޕެއިން ކުރައްވަމުން ގެންދަވަނީ ޔާމީންގެ އިތުރުން ސީދާ ފާތުންގެ ތާއީދާއި އެހީތެރިކަމާ އެކު އެވެ.

މީގެ އިތުރުން މުއިއްޒުގެ ކެމްޕެއިންގައި ހަރާކާތްތެރިވާ ވަކިވަކި ކެމްޕެއިން ގުރޫޕްތަކަށް ވެސް ފާތުން ފޯނު ކުރައްވައި އިރުޝާދު ދެއްވަމުން ގެންދަވާ ކަމުގައި އެ ޕާޓީގެ އިސްވެރިން އަންނަނީ ބުނަމުންނެވެ.