އިދިކޮޅު ޕީޕީއެމް/ޕީއެންސީ ކޯލިޝަނަށް މިރޭޔަކީ ތާރީޚީ ރެޔެކެވެ. އެހާމެ ޖަޒުބާތީ ރެޔެއް ވެސް މެއެވެ. އެ ކޯލިޝަންގެ ލީޑަރު އަދި ކުރީގެ ރައީސް ޔާމީން އަބްދުލް ގައްޔޫމްގެ އަނބިކަނބަލުން އަދި ދިވެހިރާއްޖޭގެ ކުރީގެ މަހާރެހެންދި، ފާތިމަތު އިބްރާހިމް، މެޑަމް ފާތުން އެ ކޯލިޝަންގެ ރިޔާސީ ކެންޑިޑޭޓް ޑރ މުހައްމަދު މުއިއްޒުގެ ކެމްޕެއިނަށް ރަސްމީކޮށް ނިކުމެވަޑައިގެން ރެޔެވެ. 

މިއީ ރައީސް ޔާމިން ޖަލަށް ލީފަހުން މިފަދަ އާންމު ހަރާކާތަކުން މެޑަމް ފެނުނު ފުރަތަމަ ފަހަރުވެސް މެއެވެ. މެޑަމް ފާތުންގެ މި ފެނިލުމާއެކު އިދިކޮޅު ކޯލިޝަންގެ މެމްބަރުންގެ ހިތުގައި ރައީސް ޔާމިން ނެތް ކަމުގެ ފަޅުކަމާމެދު ކުރަމުން އައި ހިތާމަތަައް ފޫދުއްްވާލައިފިއެވެ. ރައީސް ޔާމީނަށްޓަކައި ހިތުގައި އޮތް ލޯބި މެޑަމް ފާތުންގެ ފެނިލުމާއެކު ކަރުނަޔަށްވެ އޭގެ މަގާމުން ބޭރުވެއްޖެއެވެ. 

އަލިމަސް ކާނިވަލުގައި ހުންނަ ދިވެހިންގެ ޖަގަހައިގައި ކުރިއަށް ދިޔަ ބައްދަލުވުމުން ޑރ މުއިއްޒުގެ ކެމްޕެއިން ހަރާކާތްތަކާއި ރަސްމީކޮށް މެޑަމް ފާތުން ގުޅިވަޑައިގަތްއިރު، އެ ޖަގަހައިން އެކަމަނާއަށް ގިނަ އަދަދެއްގެ މެންބަރުންވަނީ ހޫނު މަރުހަބާއެއް ކިޔައިފިއެވެ.

Advertisement

ރައީސް ޔާމިނު ނެތްކަމުގެ ފަޅުކަން އަނބިކަނބަލުން ފާތިމަތު އިބްރާހީމާއި އާއިލާއިން ކުރާވަރު އެކަމަނާގެ މޫނުމަތީގެ އަސަރުތަކުން ސާފުކޮށް ބުނެދިން އިރު ރައީސް ޔާމިންގެ ސަޕޯޓަރުންގެ މޫނުމަތިން ފެނުނު އަސަރުތައްވެސް ކިޔައިދިނީ ދިވެހި ގައުމީ ފަސްގަނޑު އެމަނިކުފާނުގެ ޚިދުމަތްތަކުގެ ހަނދާން އައުކޮށް ހިތާމަކުރާ މިންވަރެވެ. 

ރައީސް ޔާމީންގެ ސަޕޯޓަރުންނާއިއެކު މެޑަމް ފާތުން 

ރައީސް ޔާމީނުގެ ވެރިކަމުގައިވެސް އިޖްތިމާއި ގިނަ ޚިދުމަތްތަަކެއްގައި ނުހަނު ހިވާގި ކަމާއެކު ހަރަކާތްތެރިވި ކަނބަލެއްގެ ގޮތުގައި މެޑަމް ފާތުން ފާހަގަކޮށްވެއެވެ. 

މެޑަމް ފާތުންގެ ހާލުކޮޅުވެސް އެފަދައެވެ. ދިވެހި ތާރީޚު ފަތްފުށްތަކުންވެސް ނުދެކޭހާ ތަރައްގީ މި ގައުމަށް ގެނެސްދިން އެކަމަނާގެ ފިރިކަލުންގެ ޚިދުމަތުގެ އިނާމަކަށް ޖަލުގެ ތޭރިތަގެ ފުރަގަހުގައި ހޭދަކުރަމުން އަންނަ އައުމުން އެކަމަނާގެ ހިތަށް ކޮށްފައިވާ އަސަރު މިރޭ ފަރުދާއެއް ނުކުރެވުނެވެ. ގައުމަށް ޚިދުމަތްކުރުމުގައި ހޭދަކުރި ދުވަސްތަކުގެ ހަނދާން އައުކޮށް ހިތުގައި ހުރި ހުރިހާ ޖަޒުބާތުތައް މިރޭ ބޭރުވެގެން ދިޔައީ ކަރުނައިންނެވެ. 

ޑރ މުހައްމަދު މުއިއްޒުގެ ކެމްޕެއިނަށް މެޑަމް ފާތުން ރަސްމީކޮށް މިރޭ ނިކުމެވަޑައިގެންނެވި އިރު، އިއްޔެ ރައީސް މައުމޫނުގެ ދަރިކަލުން އަދި ރިޔާސީ އިންތިހާބުގައި އަމިއްލަ ގޮތުން ވާދަކުރައްވާ ފާރިސް މައުމޫނު މާފުށީ ޖަލަށް ވަޑައިގެން ރައީސް ޔާމިނާއި ބައްދަލުކުރެއްވި ކަމުގެ އަޑުތަކެއް ވަނީ މީޑިޔާގައި ފެތުރިފައެވެ. 

އެހެންނަމަވެސް ފާރިސްގެ ފަރާތުންވެސް ކަށަވަރުކޮށްދީފައިނުވާ މި ބައްދަލުކުރެއްވުމަށްފަހު ރައީސް ޔާމިނުގެ ތާއީދު ފާރިސް މައުމޫނަށް ކުރައްވާކަމަށް ފެތުރު އަޑުތަކަށް އެންމެ އެކަށޭނެ ޖަވާބަކަށް ޑރ މުއިއްޒުގެ ކެމްޕެއިނުން މިރޭ މެޑަމް ފާތުން ފެނިގެން ދިޔަ ދިއުން ވާނެކަން ޔަގީނެވެ.