ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުގެ ކެމްޕެއިން ޖަގަހައަށް ރައީސް އަބްދުﷲ ޔާމީންގެ އަނބިކަނބަލުން އަދި ކުރީގެ ފަސްޓް ލޭޑީ ފާތިމަތު އިބްރާހިމް މިރޭ ޒިޔާރަތްކުރުމުން ވީ ހާއްސަ ރެއަކަށެވެ.

ވެހެމުން ދިޔަ ވާރޭގައި މެޑަމް ފާތުން "ދިވެހިންގެރާއްޖެ" ޖަގަހައަށް ވަޑައިގަތީ ހިންގަވާފައެވެ. ޖަގަހައިން މެޑަމްއަށް މަރުހަބާ ކިޔުއްވީ ރިޔާސީ ކެނޑިޑޭޓް ޑރ. މުޙައްމަދު މުޢިއްޒުގެ އަނބި ކަނބަލުންނާއި ރަނިންގމޭޓް ގެ އިތުރުން ރަނިންގމޭޓްގެ އަނބިކަނބަލުންނެވެ.

މިރޭ ޖަގަހައިން ފެނިގެންދިޔައީ ޕީޕީއެމް/ޕީއެންސީގެ ލަޝްކަރުގެ އިންތިހާބުތަކުގައި ފެނިގެން ދިޔަ ޖޯޝެވެ. މެޑަމް ފާތުން ވަޑައިގަތުމުން "އެންމެހާ ކަނބަލުންގެ ހިތްތައް ފޮޅިގެން ދިޔަ"ކަމެއް މަޑުއްވަރީ ދާއިރާގެ މެންބަރު އާދަމް ޝަރީފް ވިދާޅުވިއެވެ. އަދި "ޖަލުގައި އޮންނެވިޔަސް މިޕާޓީ ބަދަހި ކުރައްވާނެކަން. މެޑަމް ފާތުން ޖަގަހައަށް ވަޑައިގަތުމުން ފުދޭ"ކަމަށް ވިދާޅުވިއެވެ.

"ރައީސް ޔާމީން މިނިވަންކުރަންޖެހޭ"ކަމުގެ އަޑު މިރޭ ވަނީ "ދިވެހިންރާއްޖެގެ ޖަގަހަ" ގުގުމާލާފައެވެ.

ޕީއެންސީގެ ރިޔާސީ ޓިކެޓް މުއިއްޒަށް ދޭން އެ ޕާޓީގެ ކައުންސިލުން ފާސްކުރި ފަހުން ޔާމީންގެ އަނބިކަނބަލުން މުއިއްޒުގެ ކެމްޕެއިން ހަރަކާތްތަކަށް އަމަލީ ގޮތުން ނުކުންނެވި މިއީ ފުރަތަމަ ފަހަރެވެ. ގިނަ އަދަދެއްގެ އަންހެނުން މެޑަމް ފާތުންނަށް މަރުހަބާ ކިޔުމަށް ޖަގަހައަށް އެއްވެފައިވެއެވެ. ޖަގަހައަށް ޒިޔާރަތް ކުރުމަށްފަހު މެޑަމް ފާތުން ވަނީ ޖަގަހައަށް އެއްވެފައިވާ އަންހެން ކަނބަލުންނަށް ހިތްވަރު ދެއްވާފައެވެ.

ފޯރިއާއި އެކު އަތްޖަހަމަނުން ދިޔަ ކަނބަލެއް ވޮއިސްއަށް ހާމަކުރީ މެޑަމް ފާތުން ކެމްޕޭންގައި ބައިވެރިިވުމުން "އިތުރު ހިތްވަރެއް ލިބިގެން ހިނގައްޖެ"ކަމަށް ބުނެފައެވެ