Advertisement
އިޔާޒުގެ ބައްޕަގެ ތައީދު ޑރ. މުޢިއްޒަށް!
ސަރުކާރު ކޯލިޝަންގައި އޮތް އަދާލަތު ޕާޓީގެ އިލްމުވެރިންގެ މަޖިލީހުގެ ނާއިބު ރައީސް، ޑރ.މުހައްމަދު އިޔާޒް އަބްދުއްލަތީފުގެ ބައްޕަ، ކަޅުބެ އަބްދުއްލަތީފު ކުރިއަށް އޮތް ރިޔާސީ އިންތިހާބުގައި އިދިކޮޅު ޕީޕީއެމް/ ޕީއެންސީގެ ކެންޑިޑޭޓް ޑރ. މުހައްމަދު މުއިއްޒަށް ތާއީދުކޮށް އެކަން ހާމަކޮށްފި އެވެ.
ކަޅުވެ އަބްދުއްލަތީފުގެ ފަރާތުން މީސް މީޑިއާގައި އާއްމު ކޮށްފައިވާ ވީޑިއޯއެއްގައި އޭނާ ވަނީ މިހާރު، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ތާއިދު ނުކުރާ ގިނަ ސަބަބުތަކެއް ވަރަށް ތަފްސީލާއި އެކު ހާމަކުރައްވާފައެވެ.
އެގޮތުން އެއް ސަބަބެއްގެ ގޮތުގައި ފާހަގަކުރެއްވީ އެމަނިކުފާނުގެ މައްޗަށް ޒިނޭގެ ތުހުމަތު އޮތުމެވެ. އިޔާޒުގެ ބައްޕަ ދެކެވަޑައިގަންނަވާ ގޮތުގައި އެ ތުހުމަތުތަކުން ބަރީއަ ނުވެ އިންތިހާބުގައި ވާދަކުރެވިގެން ވެސް ނުވާނެ އެވެ.
Advertisement
"އިބޫ ސޯލިހަށްވެސް ތާއީދު ނުކުރެވެނީ އެކަހަލަ މައްސަލައެއް އޮތީމައޭ، ޝަރުއީ މައްސަލައެއް އޮތީމަ. އެއީ ރައްޔިތުންގެ މަޖިލީޙުގެ ރައީސް ހަމަ ފާޅުގައި އެތައް ބައެއްގެ ތެރޭގައި ވިދާޅުވީ އިބްރާހީމް މުހައްމަދު ސޯލިހު، މިހާރުގެ ރައީސް އެ ހުންނެވީ ޒިނޭ ކުރައްވައިގެންނޭ. އިބްރާހީމް މުހައްމަދު ސޯލިހަކަށް އަދިއަކު އެއަކުން ބަރީއައެއް ނުވެވޭ،" އަބްދުއްލަތީފް ވިދާޅުވި އެވެ.
"ކޯޓު މެދުވެރިކޮށް ބަރީއަވާން ޖެހޭނީ، މީ ޝަރުއީ މައްސަލައެއް، ދީނީ މައްސަލައެއް. ހަމަ ތިމަންނަ ނުކުރަމޭ އެހެން ބުނެލީމަކާ ކަމަކު ނުދާނެ. ބަރީއަ ވާންޖެހޭނީ ކޯޓު މެދުވެރިވެގެން. އަޅުގަނޑު ދެކޭ ގޮތުގައި އިބްރާހީމް މުހައްމަދު ސޯލިހަކަށް އަދި މިފަހަރު [އިންތިހާބަށް] ކުރިމައްޗެއް ނުވެސް ލެއްވޭނެ އެ ތުހުމަތުތަކުން ބަރީއަ ނުވެއެއް."
ކަޅުބެ އަބްދުއްލަތީފް
މީގެ އިތުރުން ވެސް އިޔާޒުގެ ބައްޕަ ވިދާޅުވީ، މީގެ ކުރިން އޭނާވެސް ރައީސް ޞާލިހަށް ވަރަށް ތާއީދު ކުރެއްވި ކަމަށެވެ. އެހެން ނަމަވެސް، މިހާރު ތާއީދު ނުކުރަނީ އެމަނިކުފާނުގެ ފަރާތުން "ކަމުނުދާ" ކަންތައްތަކެއް ފެނިފައިވާތީ ކަމަށް އޭނާ ވިދާޅުވި އެވެ.
"ކަމުނުދާ ކަންތައްތަކެއް އިބްރާހީމް މުހައްމަދު ސޯލިހުގެ ފަރާތުން ފެނުނު. ކުރީގައި ހަމަ ވަރަށް ތާއީދުކުރިން. އެކަމަކު ފަހުން ވީގޮތަކީ އޭނާގެ ފަރާތުން ފެނިއްޖެ ކަންތައްތަކެއް. އެއީ އަޅުގަނޑު މާކުރިން މައުމޫން ދުވަސްވަރުވެސް މައުމޫނާ ދިމާލަށްވެސް ވެރިކަމުގެ ނުވަވަނަ އަހަރު ސިޓީއަކުން ދެންނެވިން އެމީހެއްގެ އަނބިދަރިން އިސްލާހު ނުކުރެވޭ މީހަކަށް ގައުމެއް އިސްލާހެއް ނުކުރެވޭނޭ،"
ކަޅުބެ އަބްދުއްލަތީފް
"އިބްރާހީމް މުހައްމަދު ސޯލިހަށް ވެސް އޭނާގެ އަނބިކަނބަލުން ހުކުރު ހައްޖެއް ލިބުނީމާ ހައްޖަށް ގެންގޮސްފަ، އެތާނގައި ބުރުގާ އަޅުއްވައިގެން އުޅުއްވާފަ ފަހުން އެ [ބުރުގާ] އެއްލާލައިފި. އެއްލާލައިފަ ފަހުން ރުހިގެން ގޮވައިގެން އުޅޭކަން މައްސަލައަކީ." ކަޅުބެ އަބްދުއްލަތީފް ވިދާޅުވި އެވެ.
މިއާއެކު އިޔާޒުގެ ބައްޕަ ވަނީ ރައީސް ޞާލިހަށް ދެވަނަ ދައުރެއް ލިބިއްޖެ ނަމަ، އިސްލާމް މާއްދާ އިނގިރޭސިން ކިޔައިދޭން ނިންމި ނިންމުމާއި މެދުވެސް ނުރުހުން ފާޅުކުރައްވާފައެވެ. އަދި އެފަދައިން ކަން ނުކޮށް އަރަބިން ކިޔަވައި ދޭ ނަމަވެސް މާ ރަނގަޅު ވާނެ ކަމަށް އޭނާ ވިދާޅުވި އެވެ.
"އަނެއްކާ ދީނަށް ފުރައްސާރަކުރި އެންމެން ގެންގޮސް [މި ސަރުކާރުން] ކާގެއަށްލީ.... އިންޑިއާގައި މުސްލިމުން އުޅޭ ހާލު އެބަ ފެނޭ. އެމީހުންގެ [އިންޑިއާގެ] ނުފޫޒު މިތަނަށް [ރާއްޖެއަށް] އަތުވެއްޖިއްޔާ ދީނީ މީހުންނަށް ވަރަށް ބޮޑު ނުރައްކަލަކާ ކުރިމަތިލާން ޖެހިދާނެ. މިހާރުވެސް އެކަންކަން އެހެރަ އަންނަނީ މަޑުމަޑުން ފެންނަމުން،" އޭނާ ވިދާޅުވި އެވެ.
"މިހާރު ފަސް އަހަރުގެ ވެރިކަން ނިމުނީ. ނިމިއްޖެ. ދެން އިތުރަށް ކުރިމަތިލައްވަން ޖެހޭނީ އަޅުގަނޑު ދެކޭ ގޮތުގައި ހަމަ އޭނާގެ ބޮލުގައި އެޅިފައި އޮތް ޒިނޭގެ ތުހުމަތުން ބަރީއަވެގެެން. ހުވާ ކޮށްގެން ހުންނެވީ ވެސް ދީނާ އެއްގޮތަކަށް ކަންކަން ކުރަން. އެކަމަކު މިތަނުގައި ދީނާ ދެކޮޅަށް ފުރައްސާރަކުރީމާ ވެސް އެކަންކަމެއް ނުބެލުނު. އިންޑިއާ މީހުންނަށް އަޅުވެތިވެއްޖެ."
ކަޅުބެ އަބްދުއްލަތީފް
މިއާއެކު އިޔާޒުގެ ބައްޕަ ވިދާޅުވީ، ރައީސް ޞާލިހު ގެ ފަރާތުން ފެނިފައި އެވާ ފަދަ "ގޯސް ކަމެއް" ޑރ. މުއިއްޒުގެ ފަރާތްޕުޅުން ނުފެންނަ ކަމަށެވެ.
Advertisement
Advertisement
Advertisement
This content is created and paid for by advertisers and does not involve Voice Journalists
Advertisement
