ވެރިކަން ކުރާ ޕާޓީ، އެމްޑީޕީ ސަރުކާރުގެ މިހާރުގެ ސިޔާސަތުތަކަށް އިތުރަށް ފުރުސަތު ދީގެން ރާއްޖޭގެ މިނިވަންކަން މިހާރު އޮތް ވަރަށްވެސް ނޯންނާނެ ކަމުގައި ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ. 

ރިޔާސީ އިންތިހާބުގެ ކެމްޕެއިންގައި ކ ކާށިދޫގައި މިއަދު އެ ރަށުގެ ސަޕޯޓަރުންނާއި ބައްދަލުކުރައްވާ ދެއްކެވި ވާހަކަފުޅުގައި މުއިއްޒު ވިދާޅުވީ، ދެތިން ދުވަހުގެ ތެރޭގައި ރައްޔިތުންގެ އަތަށް އަންނަނީ ވަރަށް ބޮޑު ފުރުސަތެެެއް ކަމަށާއި ވަރަށް ސީރިއަސްކޮށް ވިސްނައިގެން ނިންމުން ނިންމަންޖެހޭ ފުރުސަތެއް ކަމަށެވެ. 

އެގޮތުން މިއަދު ދިވެހިންނަށް މިނިވަންކަމާއެކު ތިބެވުމުގެ ފުރުސަތު ހޯދައިދިނުމަށް އެތައް އަހަރެއް ވަންދެން މިގައުމުގެ އަބްތާލުން ކުރެއްވި ޖިހާދުގެ މަތިން ހަނދާންކޮށް ނިންމުމެއް ނިންމަންޖެހޭ ދުވަހެއް ކަމުގައި މުއިއްޒު ވިދާޅުވިއެވެ. 

އެގޮތުން މިއަދުގެ ހާރިޖީ ސިޔާސަތުތައް އޮތްގޮތުން ދިވެހިރާއްޖެގެ މިނިވަންކަން ދިވެހިންގެ އަތުގައި ނެތް ކަމަށާއި، ދިވެހިންގެ އިސްތިގްލާލު ދިވެހިންގެ އަތުން ގެއްލޭ ހިސާބަށް ދިވެހިންގެ ވަށައިގެން ވާ ބައުންޑްރީން އެއްބައި، ދިވެހި ކަނޑުގެ ބައެއް ދޫކޮށްލައިފައި ވާކަމުގައި ޑރ މުއިއްޒު ވިދާޅުވިއެވެ. 

މީގެ އިތުރުން މުއިއްޒު ވިދާޅުވީ މި ރާއްޖޭގައި ދިވެހިންނަށް ހަމަޖެހިލައިގެން ތިބެވޭކަހަލަ އެއްކަމެއްވެސްނެތް ކަމުގައެވެ. 

އަދި މީގެ އިތުރުންވެސް މުއިއްޒު ވިދާޅުވީ، އެހެން ގައުމެއްގެ ސިފައިން ތިބެންޖެހޭނީ ހަމައެކަނި ކުލަ ހެދުމުގައި ނޫންކަމަށާއި އެގޮތަށް ތިބޭނަމަ އެއީ މައްސަލައެއް ނޫންކަމަށް ވެރިން ދެކޭ ދެކުމަކީ ބަލައިގަނެވޭ ކަމެއް ނޫންކަން ހޮނިހިރު ދުވަހުގެ ވޯޓުން ދައްކައިދިނުމަށް މުއިއްޒު ވަނީ އެދިފައެވެ.