ވަޢުދުވަނީ ވަޢުދުފުއްދޭނެ ކަމުގެ ޔަޤީންކަން ހޯދައިގެން ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް މިހެން ވިދާޅުވީ އިއްޔެ ރ.އަތޮޅަށް ކުރެއްވެވި ދަތުރުފުޅުގައި އެއަތޮޅު އަލިފުއްޓަށް ވަޑައިގެން އެރަށު ރައްޔިތުންނާއި ބައްދަލުކުރައްވައި ވާހަކަދައްކަވަމުންނެވެ.

"އަޅުގަނޑުމެން ވަޢުދުތައް ވަނީ އެކަން ފުއްދޭނެ ކަމުގެ ޔަޤީންކަން އަޅުގަނޑުމެން ހޯދައިގެން، މާތް اللهގެ ރަޙްމަތާއި އެކު މިހާތަނަށް އަޅުގަނޑުމެން ވީ ވަޢުދުތަކުގެ 80 ޕަސެންޓް މިހާރުވަނީ ފުދި ނިމުމާ ހިސާބުގައި" ރައީސް ޞާލިޙް ވިދާޅުވިއެވެ.

ރައީސް ވިދާޅުވީ 2018 ވަނަ އަހަރު ދިވެހި ރައްޔިތުން ނުކުމެ އެމަނިކުފާނާއި ބޮޑެތި ޒިންމާތަކެއް ހަވާލުކުރެއްވެވީ އޭގެ ކުރީ ސަރުކާރާއި އެކު  ކުރި ހިތްދަތި ތަޖުރިބާއަށް ފަހުގައި ކަމަށެވެ. އަދި އެދުވަހު އެމަނިކުފާނު ވެވަޑައިގަތް ވަޢުދުތައް ރައްޔިތުން އަޑު އެއްސެވި ކަމަށް ރައީސް ވިދާޅުވިއެވެ.

ރައީސް ވިދާޅުވީ މިއަދުވެސް ކުރިއަށް މިދަނީ އެވަޢުދުތައް ފުއްދުމައިގެން ކަމަށެވެ. އެއްވެސް މީހަކު އެއްވެސް ރަށެއް ބާކީ ނުކޮށް ރާއްޖެ ތަރައްޤީ ކުރުމުގެ މަސައްކަތް މިދަނީ ކުރިއަށް ކަމަށް ރައީސް ވިދާޅުވިއެވެ.

ވަޑައިގަންނަވާ ކޮންމެ ރަށަކުން ވެސް ފެންނަނީ ހެޔޮ ބަދަލު ކަމަށާއި، ތަރައްޤީގެ އެތައް މަޝްރޫޢެއް ކުރިއަށް ދާއިރުގައި ރައްޔިތުން ތިބީ އެކަމާއި ހިތްހަމަ ޖެހިފައިވާ މަންޒަރު ފެންނަ ކަމަށް ރައީސް ޞާލިޙް ވިދާޅުވިއެވެ.

މީގެ އިތުރުން ރައީސް ވިދާޅުވީ ކުޑަ ރަށެއް ބޮޑު ރަށެއް ތަފާތުނުކޮށް ތަރައްޤީ ކުރުމުގެ ނަތީޖާ މުޅި ރާއްޖެއިން ފެންނަމުން ދާކަމަށެވެ. އެބަދަލު ރާއްޖެއިން އެބަ ފެންނަ ކަމަށާއި، ރާއްޖެ ތަރައްޤީ ކުރެވޭނީ މުޅި ރާއްޖެ ތަރައްޤީ ކޮށްގެން ކަމަށް ރައީސް ޞާލިޙް ވިދާޅުވިއެވެ.

"މިއީ ޖަޒީރާ ރާއްޖެ، ރާއްޖޭގެ އިޤްތިޞާދު އެހެން ހަރުފަތަކަށް ގެންދެވޭނީ އަޅުގަނޑުމެންނަށް ލިބިފައިހުރި ޤުދުރަތީ ވަޞީލަތްތައް އެންމެ ފުރިހަމައަށް ބޭނުން ކުރެވިގެން، ކުޑަ ތަންކޮޅެއްގައި ވަކި ކަންތަކެއް ކޮށްގެނެށް މިރާއްޖެއަކަށް އަޅުގަނޑުމެން މިބޭނުންވާ ތަރައްޤީއެއް ކުރިއެރުމެއް ރާއްޖެއަކަށް ނުގެނެވޭނެ" ރައީސް ޞާލިޙް ވިދާޅުވިއެވެ.

ރައީސް ޞާލިޙް ވިދާޅުވީ ކުރިއަށް މިއޮތް ފަސްއަހަރު ވެގެންދާނީ ތަރައްޤީގެ ބޮޑު ބަދަލު ގެންނާނެ ފަސްއަހަރަށް ކަމަށް ރައީސް ޞާލިޙް ވިދާޅުވިއެވެ.

އަލިފުށްޓަށް ކުރެއްވެވި ޒިޔާރަތައްފަހު ރައީސް ޞާލިޙް ވަނީ އެނބުރި މާލެ ވަޑައިގެންފައެވެ.