ރައީސް އަބްދުالله ޔާމީނުގެ ވެރިކަމުގައި އެމަނިކުފާނުވަނީ ރައްޔިތުންނަން ނަތީޖާ ނެރެފައިވައި ކަންކަން ކުރެއްވޭނެކަން ސާބިތު ކޮށްދެއްވައިފައިކަމަށާއި އެމަނިކުފާނުވެސް ކުރިއަށް ދާނީ ހަމަ އެގޮތުގައި ކަމުގައި ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ. 

ކ ތުލުސްދޫގައި ރޭ ބޭއްވި މުއިއްޒުގެ ރިޔާސީ ކެމްޕެއިން ޖަލްސާގައި ވާހަކަ ދައްކަވަމުން އެމަނިކުފާނު ވިދާޅުވީ، އެމަނިކުފާނުގެ ސަރުކާރެއްގައި ކުރިއަށް ދާނީ ރައީސް ޔާމިނުގެ ތަރައްގީގެ ތަސައްވުރާއީ އެއްގޮތަށް ކަމަށާއި، ރައީސް ޔާމިނު ނަތީޖާ ނެރުއްވި ގޮތަށް އެގޮތުގެ މަތީގައި ކަމުގައެވެ. 

ހަމައެހެންކަމުން މި ސަރުކާރުން ފަށައިފައިވާ އެއްވެސް މަޝްރޫއުއެއް، އަދި ފަށައިދިނުމަށް ބުނެފައިވާ އެއްވެސް މަޝްރޫއެއް ހުއްޓައި ނުލާ އެއަށްވުރެވެސް ރައްޔިތުންގެ ފައިދާ އާއި މަންފާ ވާނެގޮތަށް ކުރިއަށް ގެންގޮސްދެއްވާނެ ކަމުގައި ޑރ މުހައްމަދު މުއިއްޒުވަނީ ވިދާޅުވެފައެވެ. 

މީގެ އިތުރުން މުއިއްޒު ވިދާޅުވީ އެމަނިކުފާނުގެ ސަރުކާރުގައި ގެންދާ ހުރިހާ މަޝްރޫއެއްވެސް ކުރިއަށް ގެންދާނީ ރައްޔިތުން އެދޭ ގޮތަށް ބާރަށް ފުރިހަމައަށް ކަމުގައެވެ. 

ރޭގެ ޖަލްސާގައި މުއިއްޒުވަނީ ތުލުސްދޫ ދާއިރާގެ ހުރިހާ ރަށެއްގެ ރައްޔިތުން އެދޭ ފަދައިން އެ ރަށްރަށުގެ މަގު ހެދުމުގެ މަޝްރޫއުތައް ކުރިއަށް ގެންގޮސްދޭނެ ކަމުގައި ވައުދުވެފައެވެ. އަދި މީގެ އިތުރުންވެސް ފެނާއި ނަރުދަމާގެ މަސައްކަތް ކުރަން ޖެހިފައި ހުރި ކ އަތޮޅުގެ ހުރިހާ ރަށެއްގައި އެ މަސައްކަތް ކޮށްދޭނެ ކަމުގެ ޔަގީންކަން މުއިއްޒު ވަނީ އަރުވައިފައެވެ. 

ރިޔާސީ އިންތިހާބުގެ ކެމްޕެއިންގައި އަތޮޅުތެރޭގެ ރަށްތަކަށް ކުރަމުންދާ ދަތުރުގައި ޑރ މުއިއްޒާއި ކެމްޕެއިން ޓީމަށް ބޮޑު ތަރުހީބެއް ލިބެމުންދާކަން ފާހަގަކޮށްލެވެއެވެ.