ރިޔާސީ އިންތިހާބު ކާމިޔާބުވެވަޑައިގެން ވެރިކަން ލިބި ވަޑައިގެންފިނަމަ ފައިސާ ޗާޕްކުރުން އެއްކޮށް ހުއްޓާލާނެ ކަމުގައި މިއަހަރުގެ ރިޔާސީ އިންތިހާބުގައި އިދިކޮޅު ޕީޕީއެމް ޕީއެންސީގެ ފަރާތުން ވާދަކުރައްވާ ކެންޑިޑޭޓު ޑރ މުހައްމަދު މުއިއްޒު ވިދާޅުވެއްޖެއެވެ. 

ރިޔާސީ ކެމްޕެއިންގެ އެންމެ ފަހު މަންޒިލެއްގެ ގޮތުން ކ. ތުލުސްދޫއަށް ވަޑައިގެން ރޭ އެރަށުގެ ސަޕޯޓަރުންނާއި ބައްދަލުކުރައްވާ ބޭއްވި ޖަލްސާގައި ވާހަކަ ދައްކަވަމުން ޑރ. މުއިއްޒު ވިދާޅުވީ މި ސަރުކާރު ފިޔަވާ މިދިޔަ ހުރިހާ ވެރިކަން އެއްކޮށްލުމުން ޗާޕްކުރި ފައިސާގެ އަދަދު 6 ބިލިއަނަށް އަރާ ކަމަށެވެ.

މީގެ އިތުރުން މި ސަރުކާރުން އެކަނިވެސް 8 ބިލިޔަން ރުފިޔާ ޗާޕުކޮށްފައިވާކަމަށް ވިދާޅުވެ މުއިއްޒު ވަނީ މި ސަރުކާރުގެ ދޯހަޅި އިގްތިސާދީ ސިޔާސަތަށް ފާޑު ވިދާޅުވެފައެވެ. 

އެގޮތުން، ޑރ. މުއިއްޒު ވިދާޅުވީ ރައްޔިތުންގެ މަޖިލީހުގެ މެޖޯރިޓީ އޮތުމުން އޭގެ ނާޖާއިޒް ފައިދާ ނަގައިގެން ނެޝަނަލް ރެސްޕޮންސިބިލިޓީ ގާނޫނުގައި އޮތް މާއްދާ ސަސްޕެންޑު ކުރުމަށްފަހު ފައިސާ އިންތިހާ އަށް ޗާޕުކޮށްފައިވާ ކަމަށެވެ. ގައުމުގެ އިގްތިސާދު މިއަދު ހަލާކުވަމުންދަނީ އޭގެ ސަބަބުންކަމަށްވެސް މުއިއްޒު ވިދާޅުވިއެވެ.

މީގެ އިތުރުން މުސާރަދިނުމާ ކަންކަން ކުރުމަށް ލޯނު ނަގަމުން ދިއުމަށްވެސް ވަރަށް ބޮޑަށް ފާޑު ވިދާޅުވެފައެވެ. އޭނާ ވިދާޅުވީ ލިބޭ އާމްދަނީ އިން ރިކަރަންޓް ޚަރަދުތައް ހަމަޖައްސަން ޖެހޭނެ ކަމަށާއި އޭރުން އިގްތިސާދަށް ހެޔޮ ބަދަލެއް ލިބިގެންދާނެ ކަމަށެވެ. އެހެންކަމުން ޕީޕީއެމް/ޕީއެންސީގެ ސަރުކާރެއްގައި އެކަންކަމަށް ޚާއްސަ އިސްކަމެއް ދެއްވާނެ ކަމަށް މުއިއްޒު ވިދާޅުވިއެވެ.