މީސް މީޑިޔާއިން ގިނަ އަދަދެއްގެ ދިވެހިންގެ މަގުބޫލުކަން ހޯދާފައިވާ ކޮމޭޑިއަން ހުސައިން ޝާދު (މަޓޭ) ގެ ތާއީދު، މި އަހަރުގެ ރިޔާސީ އިންތިހާބުގައި ޕީޕީއެމް ޕީއެންސީން ވާދަކުރައްވާ ކެންޑިޑޭޓު ޑރ މުހައްމަދު މުއިއްޒަށް ކުރުނަށް ނިންމައިފިއެވެ. 

ރޭ ޗެނަލް 13 އިން ގެނެސްދިން ދިވެހިންގެ ރާއްޖެ- މަގޭ ވޯޓު މުއިއްޒުއަށް، ޕްރޮގްރާމްގަައި ވާހަކަދައްކަމުން މަޓޭ ބުނީ އެމްޑީޕީއަކީވެސް ދިވެހިންނަން ރަނގަޅު ކަންތައްތަކެއް ކޮށްދިނުމުގެ ނަމުގައި އައި ޕާޓީއެއް ކަމަށާއި އެހެންނަމަވެސް 2008 ވަނަ އަހަރު ވެރިކަމަށް އައުމަށްފަހުވެސް މާބޮޑެތި ކަންތައްތަކެއް ނުވެ އެ ޕާޓީއަށް ވެރިކަން ނިމުނީ ކަމުގައެވެ. އޭގެ ފަހުން 2018 ވަނަ އަހަރުވެސް މަރުތަކުގެ ހަގީގަތްތައް ހޯދުމާއި، ކޮރަޕްޝަން ހުއްޓުވުން ފަދަ ބައިވަރު މުހިއްމު ވައުދުތަކެއް ވެގެން އެ ޕާޓީން ވެރިކަމަށް އައިކަމަށެވެ. 

މަޓޭ އިތުރަށް ބުނީ ކަންވެގެން ދިޔައީ އެހެން ނޫންކަމަށާއި އެމީހުންގެ އަމިއްލަ ޖީބުތަކަށް އިތުރުވުމާއި ބާ ބާއިސްކާލާއި ބާ ސައިކަލުގައި އުޅުނު މީހުންނަށް ކުއްލިޔަކަށް މާ ބޮޑެތި ތަނަވަސްކަން ލިބި، ރަށްރަށުގައި އުޅެމުން އައިސް ކުއްލިއަކަށް ޕާޓީއާއި ގުޅިގެން ދެން ފެންނަނީ 3 ހަތަރު އެޕާޓްމެންޓާއި އެއްޗިހި ލިބޭތަންކަމުގައެވެ.

މީގެ އިތުރުން ސަރުކާރަށް ވަރަށް ބޮޑަށް ފާޑު ކިޔަމުން މަޓޭ ބުނެފައިވަނީ ރައްޔިތުން ތިބޭނަން ސަރުކާރަށް އެނގެނީ 1800 ވަނަ ދުވަހު ކަމަށާއި އެއީ ސަރުކާރުގެ ސްލޯކަން ކަމަށެވެ. 

ޑރ މުއިއްޒުގެ ފަހަތަށް އެރުމަށް ނިންމީ އެ މަނިކުފާނަކީ ކަންކަން ކޮށް ނަތީޖާ ދައްކާފައިހުރި ބޭފުޅެއްކަމުގައި ވާތީކަން ފާހަގަކުރައްވައި މަޓޭ ބުނީ، ރައީސް ޔާމިނު ޖަލަށް ލާފައިވާ ވުމަކީ ބަލައިގަނެވޭ ކަމެއް ނޫންކަމަށާއި ދުނިޔޭގެ އެއްވެސް ގައުމެއްގައި ދައުލަތަށް އެވަރުގެ ހިދުމަތެއް ކޮށްދެއްވި ވެރިންނާމެދު އެ ބީދައިން ކަންކުރެވެމުން ނުދާ ކަމުގައެވެ.

މަޓޭ އިތުރަށް ފާހަގަ ކުރި ގޮތުގައި ހުޅުލެ-މާލެ ދެމެދު އަޅާފައިވާ ބުރިޖުގެ ސަބަބުން ވާ ފަސޭހަ ހުޅުމާލެ ރައްޔިތުންނަށް އެނގޭނެ ކަމަށާއި ދަރުމަވަންތަ ހޮސްޕިޓަލުގެ ސަބަބުން ވާ ފަސޭހަ ދިވެހިންނަށް އެނގޭނެ ކަމަށެވެ. 

އަދި 2013 އިން 2018 އާއި ދެމެދު ދިވެހިން އުޅެމުން އައީ ފުދުންތެރި އުޅުމެއްކަން ފާހަގަކޮށް މަޓޭ ބުނީ ޑރ މުއިއްޒު މާލޭގެ މޭޔަރުކަމަށް ވަޑައިގެންފަހުން މުޅި މަންޒަރު ބަދަލުވެ މާލޭގެވެސް އެތައް ކަމަކަށް ހައްލު ލިބިގެން ގޮއްސި ކަމުގައެވެ.

މިހުރިހާ ސަބަބު ތަކަކަށް ވިސްނައި މި އަހަރުގެ ރިޔާސީ އިންތިހާބުގައި ޑރ މުހައްމަދު މުއިއްޒަށް ތާއިދު ކުރުމަށް އޭނާ ނިންމީ ކަމުގައި މަޓޭ ބުންޏެވެ.