އިދިކޮޅު ޕީޕީއެމް/ޕީއެންސީ ގެ ވެރިކަމެއްގައި ޒުވާނުންނަށް މުނިފޫހި ފިލުވުމަށް ހާއްސަ ކާނިވަލެއް ގާއިމްކޮށްދެއްވާނެ ކަމުގައި އެ ކޯލިޝަންގެ ރިޔާސީ ކެނޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެެވެ. 

މުއިއްޒު މިފަދައިން ވިދާޅުވީ، ވޮއިސް އެކްސްކްލޫސިވް ރިޔާސީ ކެނޑިޑޭޓުންގެ ކުރު އިންޓަރވިއުގައި ވާހަކަދައްކަވަމުން އެމަނިކުފާނުގެ ވެރިކަމެއްގައި ކުޑަކުދިންނަށް ހާއްސަ އައިސްޕާކެއް ގާއިމްކޮށްދެއްވާނެ ކަމަށް މެނިފެންޓޯގައި ހިމަނައިފައި އޮތުމުން ޒުވާނުންނަށް ޚާއްސަ ކުރެވިގެން ކާނިވަލެއް ގާއިމްކޮށްދެއްވާނެތޯ ކުރެވުނު ސުވާލަށް ޖަވާބު ދެއްވަމުންނެވެ. 

އިންޓަރވިއުގައި މުއިއްޒު އިތުރަށް ވިދާޅުވީ ދިވެހިރާއްޖޭގައި ޒުވާނުންގެ ކުރިއެރުމަށް ދޭ އަހައްމިއްޔަތާއި ހޭދަ އިތުރުވާންޖެހޭ ކަމަށާއި އައިސްޕާކު ނޫނަސް ޒުވާނުންނަށް ހާއްސަކުރެވިގެން ކާނިވަލްތަކާއި ޒުވާނުންގެ ކުރިއެރުމަށް އަދި ވަކިން ހާއްސަކޮށް މި ގައުމުގެ ޒުވާނުންނަށް އުފާވެރި ހަމަ ޖެހޭ ދިރިއުޅުމެއް ހޯދައިދުމަށް ގާއިމް ކުރަންޖެހޭ ވަސީލަތްތައް ގާއިމްކޮށްދިނުމަށް އެމަނިކުފާނުން ހާއްސަ އިސްކަމެއް ދެއްވާނެ ކަމުގައެވެ. 

މީގެ އިތުރުންވެސް މުއިއްޒުވަނީ އެ މަނިކުފާނަށް ވޯޓު ދޭންޖެހޭ ސަބަބަކީ އެމަނިކުފާނަކީ ގައުމަށް އިޚްލާސްތެރިކަމާއި ތެދުވެރިކަމާއެކު ރައްޔިތުންގެ އަޑު އަހައިގެން ރައްޔިތުންނާއި އެންމެ ގާތުން މަސައްކަތް ކުރާނެ ކެނޑިޑޭޓުކަމުގައި ވުމުން ކަމުގައި ވިދާޅުވެފައެވެ.