ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒުގެ ކެންޕެއިން ހަރަކާތްތައް ނިންމާލުމުގެ ގޮތުން މިއަދު ހަވީރު ހިނގާލުމެއް ބޭއްވުމަށް ހަމަޖެހިއްޖެއެވެ. 

'ދިވެހިންގެ ނިންމުން' ނަމުގައި ބާއްވާ މި ހިނގާލުން ފަށާނީ މިއަދު ހަވީރު 3:45 ގައި ކަމަށް ޕީޕީއެމުން ބުނެއެވެ. އަދި ހިނގާލުން ފެށުމަށް ހަމަޖެހިފައިވަނީ މާލޭގެ އާޓިފިޝަލް ބީޗު ސަރަހައްދުން ކަމަށްވެސް ބުނެފައިވެއެވެ. 

އެހެންކަމުން، ހިނގާލުމުގައި ވޭހާވެސް ގިނަ ފަރާތްތަކުން ބައިވެރިވުމަށް އެ ކޯލިޝަނުން ވަނީ އެދިފައެވެ. 

ރިޔާސީ އިންތިހާބުގެ ކެމްޕެއިން ނިންމާލުމުގެ ގޮތުން ހިނގާލުން ބާއްވާއިރު، ފާއިތުވި ދުވަސްތަކުގައި އިދިކޮޅުން ވަނީ ކެންޕެއިނަށް ރާއްޖޭގެ ގިނަ ރަށްތަކަށް ޒިޔާރަތް ކޮށްފައެވެ. އެގޮތުން ކެންޑިޑޭޓާއި ރަނިންމޭޓްވެސް ގިނަ ރަށްތަކަށް ވަޑައިގެންފައިވާއިރު، ޕާޓީގެ ލީޑަރޝިޕުން ވަނީ އެ ބޭފުޅުންނަށް ނުދެވޭ ގިނަ ރަށްތަކަށް ވަޑައިގެންފައެވެ. 

ޕީޕީއެމް/ޕީއެންސީގެ ޓިކެޓް ޑރ. މުއިއްޒަށް ލިބިލެއްވީ އިންތިޚާބަށް ވަގުތު ވަރަށް ބޮޑަށް ކުޑަތަން ވެފައި ވަނިކޮށެވެ. އެހެންކަމުން، ހުރިހާ ރަށަކަށް ވަޑައިގަންވާނެ ވަގުތު ކެންޑިޑޭޓަށް ލިބިލައްވާފައި ނުވެއެވެ. ނަމަވެސް، ވެރިކަމަށް އިންތިޚާބު ވެވަޑައިގެންފި ނަމަ އެއްވެސް ރަށެއް ތަފާތު ނުކުރައްވާނެ ކަމަށް އެމަނިކުފާނު ވަނީ ވިދާޅުވެފަ އެވެ.