މިހާރު ކުރިޔަށްދާ 16 އަހަރުން ދަށުގެ ސާފް ޗެމްޕިއަންޝިޕް ފުޓުބޯޅަ މުބާރާތުގެ ސެމީ ފައިނަލުގެ ފުރަތަަމަ މެޗުގައި މިއަދު މެންދުރު ދިވެހިރާއްޖެ އާއި އިންޑިޔާ ވާދަކުރި މެޗު 8-0 ގެ ތަފާތުބޮޑު ނަތީޖާއަކުން ކާމިޔާބުކޮށް އިންޑިޔާ އިން ފައިނަލުގެ ފުރަތަަމަ ޖާގަ ހޯދައިފި އެވެ.

މިމެޗަށް ނުކުންނައިރު އެންމެ ފަހުން އިންޑިޔާގެ 16 އަހަރުންދަށުގެ ޓީމު މެޗަކުން ބަލިވެފައި ވަނީ 2018 ވަނަ އަހަރު އޭއެފްސީ އޭޝިއަން ކަޕްގެ ޕްލޭއޮފްގައި ސައުތު ކޮރެއާ އަތުން 1-0 ގެ ނަތީޖާއަކުންނެވެ. އަދި 2019 ވަނަ އަހަރުގެ އޭއެފްސީ އޭޝިއަން ކަޕްގެ ކޮލިފިކޭޝަންގައި އިންޑިޔާގެ 16 އަހަރުންދަށުގެ ޓީމު ވަނީ ތުރުކުމެނިސްތާންގެ އިތުރުން ބަހްރެއިން އަތުން 5-0 ގެ ނަތީޖާއަކުން މޮޅުވެފައެވެ.

މުބާރާތުގެ ފުރަތަަމަ މެޗުގައި 3-0 ގެ ނަތީޖާއަކުން ޕާކިސްތާން އަތުން ބަލިވި ނަމަވެސް ރާއްޖޭ ސެމީ ފައިނަލުން ޖާގަ ހޯދީ ގްރޫޕްގެ ފަހު މެޗުގައި 3-2 ގެ ނަތީޖާއަކުން ބޫޓާން ބަލިކުރުމަށްފަހުގައެވެ.

Advertisement

މުޅި މެޗުގައިވެސް އިންޑިއާގެ ފަރާތުން ތަފާތު މޮޅު ކުޅުމެއް ފެނިގެންދިޔަ މިމެޗުގެ ފުރަތަަމަ ހާފުގައި އެޓީމުން ވަނީ ދެލަނޑުގެ ލީޑެއް ނަގާފައެވެ. އެގޮތުން އެޓީމުގެ ފުރަތަަމަ ލަނޑު މެޗު 22 ވަނަ މިނެޓުގައި ވިޝާލް ޔާދަވް ކާމިޔާބުކޮށްދިންއިރު، ދެވަނަ ލަނޑު ފުރަތަމަ ހާފުގެ 36 ވަނަ މިނެޓުގައި ކާމިޔާބުކޮށްދިނީ މުހައްމަދު ކައިފް އެވެ. މިއީ އެޓީމަށް ލިބުނު ކޯނަރެއްގައި ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން އިންޑިޔާ ކުރީގައި އޮވެގެންނެވެ.

މެޗުގެ ދެވަަނަ ހާފުގައި އިންޑިޔާގެ އެޓޭކުތައް ފެނުނީ މާބޮޑަށްވެސް ވަރުގަދަކޮށެވެ. އެގޮތުން މިހާފުގައި އެޓީމުން ވަނީ އިތުރު ހަ ލަނޑު ކާމިޔާބުކޮށްފައެވެ. މިހާފުގައި އެޓީމުގެ އެމްޑީ އަރުބާޝް އަދި އައިބޯލަންގް މިއިން ކޮންމެ ކުޅުންތެރިއެއް ދެ ލަނޑު ކާމިޔާބުކުރިއިރު އެޓީމުގެ އަނެއް ދެ ލަނޑު ކާމިޔާބުކޮށްދިނީ ލެވިސް އަދި މަންބަކުޕަރް އެވެ. މިއާއެކު މެޗުގެ ކުޅުން ނިމިގެންދިޔައީ 8-0 ގެ ނަތީޖާއަކުން އިންޑިޔާ ކުރީގައި އޮވެގެންނެވެ.

މިމެޗުން ދިވެހި ޒުވާން ޓީމު ތަފާތުބޮޑު ނަތީޖާއަކުން ބަލިވި ނަމަވެސް މި މުބާރާތަކީ 16 އަހަރުންދަށުގެ އުމުރުފުރާގައި ރާއްޖޭގެ އަށް ކާމިޔާބު މުބާރާތެކެވެ. ސަބަބަކީ މިއީ 16 އަހަރުންދަށުގެ ސާފްޗެމްޕިއަންޝިޕް ފުޓްބޯޅަ މުބާރާތުގެ ސެމީ ފައިނަލުން ދިވެހިރާއްޖެ ޖާގަ ހޯދީ ފުރަތަމަ ފަހަރެވެ.