ވޯލްޑްކަޕް ކޮލިފައިންގައި މިއަދު ހެނދުނު ބޮލީވިއާ ދެކޮޅަށް އަމިއްލަ ދަނޑުގައި ކުޅުނު މެޗު ފަސޭހަކަމާއިއެކު ބްރެޒިލް އިން ކާމިޔާބުކޮށްފި އެވެ. މިމެޗު ބްރެޒިލް އިން ކާމިޔާބުކުރީ 5-1 ގެ ނަތީޖާއަކުންނެވެ.

މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅެ ބްރެޒިލް އިން މެޗު ޑޮމިނޭޓުކުރި އިރު، އެޓީމުން ވަނީ މިހާފުގައި ލަނޑުޖަހާނެ ރަގަޅު ގިނަ ފުރުސަތުތަކެއް ތަނަވަސްކުރި އިރު، މިހާފުގައި އެޓީމުން ލަނޑުޖަހާނެ އެންމެ ހުސް ފުރުސަތެއް ލިބުނީ ނޭމާ އަށެވެ.

ފުރަތަަމަ ހާފުގެ 17 ވަނަ މިނެޓުގައި ބޮލީވިއާގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއެއްގެ އަތުގައި ބޯޅަ ޖެހުމުން ރެފްރީ ވަނީ ބްރެޒިއަށް ޕެނަލްޓީއެއް ދީފައެވެ. ނަމަވެސް ނޭމާ ފޮނުވާލި ޕެނަލްޓީ ބޮލީވިއާގެ ކީއްޕަރު ގުއިލެރްމޯ ވިސްކަރާ ވަނީ ހުޝިޔާރުކަމާއެކު ދިފާއުކޮށްފައެވެ.

މިމެޗުގައި ބްރެޒިލް އިން ކާމިޔާބުކުރި ފުރަތަމަ ލަނޑު، ފުރަތަމަ ހާފުގެ 24 ވަނަ މިނެޓުގައި ކާމިޔާބުކޮށްދިނީ ރެއާލް މެޑްރިޑްގެ ފޯވާޑް ރޮޑްރިގޯ އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ބްރެޒިލް ކުރީގައި އޮވެގެންނެވެ.

މެޗުގެ ދެވަަނަ ހާފު ފެށިގެން ދެވަނަ މިނެޓުގައި ބްރެޒިލް އިން ވަނީ ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްފައެވެ. މިލަނޑު އެޓީމަށް ކާމިޔާބުކޮށްދިނީ ބާސެލޯނާގެ ފޯވާޑް ރަފީނިއާ އެވެ. މިއީ ނޭމާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިމެޗުގައި ބްރެޒިލް އިން ކާމިޔާބުކުރި ތިންވަނަ ލަނޑު ދެވަނަ ހާފުގެ 53 ވަނަ މިނެޓުގައި ރޮޑްރިގޯ ކަމިޔާބުކުރިއިރު، އެޓީމުގެ ހަތަރުވަނަ ލަނޑު ކާމިޔާބުކޮށްދިނީ ނޭމާ އެވެ. މިއާއެކު ނޭމާއަށް ވަނީ ބްރެޒިލްގެ ގައުމީ ޓީމަށް އެންމެ ގިނަ ލަނޑުޖެހި ކުޅުންތެރިޔާގެ ޝަރަފް ލިބިފައެވެ. ކުރިން މި ރެކޯޑް އޮންނަނީ 77 ލަނޑާއެކު ބްރެޒިލްގެ ލެޖެންޑް ޕެލޭގެ އަތުގައެވެ.

ބޮލީވިއާ އިން މިމެޗުގައި ކާމިޔާބުކުރި ހަމައެކަނި ލަނޑު ދެވަނަ ހާފުގެ 78 ވަނަ މިނެޓުގައި ކާމިޔާބުކޮށްދިނީ ވިކްޓާ އެބްރެގޯ އެވެ. އަދި ބްރެޒިލްގެ ފަސްވަނަ ލަނޑު މެޗުގެ އިތުރު ވަގުތުގެ ތެރޭގައި ކާމިޔާބުކޮށްދިނީ ވެސް ނޭމާއެވެ. މިމެޗުގައި ނޭމާ ކާމިޔާބުކުރި ދެލަނޑާއެކު އޭނާ ގައުމީ ޓީމަށް ކާމިޔާބުކޮށްދިން ލަނޑުގެ އަދަދު ވަނީ 78 އަށް އަރާފައެވެ.

މިއާއެކު މެޗުގެ ކުޅުން ނިމިގެންދިޔައީ 5-1 ގެ ނަތީޖާއަކުން ބްރެޒިލް ކުރީގައި އޮވެގެންނެވެ.