މިއަދު ބޭއްވި ރިޔާސީ އިންތިހާބުގެ ވަގުތީ ނަތީޖާތައް ދައްކާގޮތުން ސިޔާސީ މައި ދެ ފިކުރު ކަމުގައިވާ ޕީޕީއެމް/އެމްޑީޕީ ފިޔަވައި އިންތިހާބުގެ އެހެން ފިކުރުތަކަށް ރައްޔިތުން ބޮޑުތަނުން ނޫނެކޭ ބުނެ ރާއްޖޭގައި ތާއިދު ބޮޑީ އިދިކޮޅު ޕީޕީއެމް އަދި ވެރިކަން ކުރާ އެމްޑީޕީގެ ފިކުރަށްކަން ހާމަވެއްޖެއެވެ.

ރިޔާސީ އިންތިހާބުގައި މިހާތަނަށް 160،000 އަށް ވުރެ ގިނަ ވޯޓު ގުނިއިރު، އެންމެ ކުރީގައި އުޅެނީ އިދިކޮޅު ޕީޕީއެމް/ޕީއެންސީގެ ކެންޑިޑޭޓު ޑރ. މުހައްމަދު މުއިއްޒެވެ. މިހާތަނަށް ގުނި ވޯޓުގެ 45 ޕަސެންޓަށްވުރެ ގިނަ ވޯޓު މުޢިއްޒު ހޯދައިފައިވާއިރު ދެވަނައަށް އެންމެ ގިނައިން ވޯޓު ލިބުނު މިހާރުގެ ރައީސް އިބްރާހިމް މުހައްމަދު ސޯލިހަށް މިހާތަނަށް ލިބިވަޑައިގެންނެވީ 39 ޕަސެންޓު ވޯޓެވެ. ތިން ވަނައަށް އެންމެ ގިނައިން ވޯޓު ލިބިވަޑައިގެންނެވި ދަ ޑިމޮކްރެޓްސްގެ އިލްޔާސް ލަބީބަށް މިހާތަނަށް ހޯދުނީ ހަ ޕަސެންޓު ވޯޓެވެ.

ބާކީ ތިއްބެވި ފަސް ކެންޑިޑޭޓުންނަށް ވޯޓު ލިބުނީ ވަރަށް މަދުންނެވެ. އެގޮތުން ޖުމްހޫރީ ޕާޓީގެ ލީޑަރު ގާސިމް އިބްރާހިމަށް މިހާތަނަށް ލިބިވަޑައިގަތީ އެންމެ ތިން ޕަސެންޓު ވޯޓެވެ. އަދި ކުރީގެ ހޯމް މިނިސްޓަރު އުމަރު ނަސީރު ވެސް ތިން ޕަސެންޓު ވޯޓު ހޯއްދެވިއިރު ކެންޑިޑޭޓް ފާރިސް މައުމޫނާއި މުހައްމަދު ނާޒިމާއި ހަސަން ޒަމީލަށް ލިބުނު ވޯޓު އެންމެ ޕަސެންޓަކަށް ވެސް ނާރައެވެ.

Advertisement

މިހާތަނަށް ރިޔާސީ އިންތިހާބުގެ ވަގުތީ ނަތީޖާތައް ދައްކާގޮތުން  މި ރިޔާސީ އިންތިހާބުގައި 50 ޕަސެންޓަށްވުރެ ގިނައިން އެއް ކެންޑިޑޭޓަކަށް ވޯޓު ލިބިވަޑައިގަންނަވާނެ ކަމަކަށް ނުބެލެވެއެވެ. އެހެންކަމުން، މި ސެޕްޓެމްބަރު 30، ގައި ރިޔާސީ އިންތިހާބުގެ ދެ ވަނަ ބުރެއް އޮންނާނެކަން ގާތްގަނޑަކަށް ވަނީ ޔަގީންވެފަ އެވެ.

މިހާރު އެންމެ ގިނަ ބަޔަކު އިންތިޒާރު ކުރަމުން އަންނާނީ ރިޔާސީ އިންތިހާބުގެ ދެވަނަބުރުގައި ކޯލިޝަންތައް ހެދިގެން ދާނެ ގޮތަކާއި މެދުގައެވެ. އެހެން ނަމަވެސް ވަގުތީ ނަތީޖާތަކަށް ބަލައި އިންތިހާބުގެ ދެވަނަ ބުރުގެ ނަތީޖާއަށް މާބޮޑެތި އަސަރުތަކެއް ކުރާނެ އަދަދަކުން އެހެން ކެންޑިޑޭޓުންނަށް އަދި ވޯޓު ލިބިފައެއް ނުވެއެވެ. 

މި އިންތިހާބުގައި ވޯޓު ދިނުމުގެ ހައްގު 282,395 މީހުންނަށް ލިބޭއިރު ވޯޓުލީ ގާތްގަނޑަކަށް 75 ޕަސެންޓު މީހުން ކަމަށް އިލެކްޝަންސް ކޮމިޝަނުން ބުނެ އެވެ. އެއީ ގާތްގަނޑަކަށް 211،796 މީހުންނެވެ. އެހެންކަމުން މިއީ ރިޔާސީ އިންތިހާބެއްގައި އެންމެ މަދުން ވޯޓު ލީ ފަހަރުކަންވެސް ފާހަގަކޮށްވެއެވެ.