ރައްޔިތުންގެ މަޖިލީހުގެ ރައީސްކަމުގެ މަގާމުގައި ހުންނެވި މުހައްމަދު ނަޝީދު އެ މަގާމުން ދުރުކުރުމުގެ މައްސަލަ މަޖިލީހުގައި މާދަމާއަށް އެޖެންޑާކޮށްފިއެވެ.

ރައްޔިތުންގެ މަޖިލީހުގެ ރައީސްކަމުން ނަޝީދު ވަކިކުރަން ހުށަހަޅާފައިވާ ގަރާރު ކުރިއަށްގެންދާނެ ގޮތަކާ މެދު ގޮތެއް ނިންމުމަށް މަޖިލީހުގައި އެޖެންޑާކޮށްފައިވާއިރު، މަޖިލީހުގެ ތިން ވަނަ ދައުރު މިދިޔަ މަހުގެ 21ގައި ފެށި ނަމަވެސް ތަފާތު ޚިޔާލުތަފާތުވުންތަކާ ހެދި ކޮންމެ ޖަލްސާއެއް ވެސް މެދުކަނޑާލަންވަނީ ޖެހިފައެވެ. އަދި ގިނަ މެންބަރުން ރިޔާސީ ކެމްޕޭނުގައި އުޅުއްވާތީ ކޯރަމް ހަމަނުވުމުން، ވޯޓަށް ފަހު ޖަލްސާތައް ބާއްވަން މިދިޔަ ހަފުތާގައި މަޖިލީހުގެ އިދާރާއިން ވަނީ ނިންމާފައެވެ.

ވެރިކަން ކުރާ ޕާޓީ އެމްޑީޕީގެ ފަރާތުން މަޖިލީހުގެ ރައީސް މުހައްމަދު ނަޝީދު ގެ އިތުރުން ނައިބުރައީސްގެ މަގާމުގައި ހުންނެވި އީވާ އަބްދުﷲ ވެސް އެ މަގާމުން ވަކި ކުރުމަށް ވަނީ ހުށަހަޅާފައެވެ.

މިދިޔަ ޖޫން މަހުގެ ހަތެއްގައި އެމްޑީޕީގެ ފަރާތުން އެ މައްސަލަ ހުށަހެޅީ ރައީސް ނަޝީދު ގާނޫނު އަސާސީ އާއި ގަވާއިދުތަކާ ހިލާފަށް މަޖިލިސް ހިންގަވާ ކަމަށް ބުނެއެވެ.

ގާނޫނުއަސާސީގައިވާ ގޮތުން ރައްޔިތުންގެ މަޖިލީހުގެ ރައީސް ނުވަތަ ނައިބު ރައީސްގެ އިތުބާރު ނެތް ކަމަށް ފާސްވާނީ މަޖިލީހުގެ ދެބައިކުޅަ އެއްބައިގެ މެޖޯރިޓީ ލިބިގެންނެވެ.

ސުޕަމެޖޯރިޓީއަކުން މަޖިލީހުގެ މި ދައުރު ދެށި އެމްޑީޕީގެ 56 މެންބަރުން މަޖިލީހުގައި މިހާރު ތިއްބަވާ އިރު ދެވަނައަށް އެންމެ ގިނަ މެންބަރުން ތިއްބަވަނީ ނަޝީދު އިސްވެ ހުންނަވައިގެން އުފެއްދެވި ދަ ޑިމޮކްރެޓްސްގެއެވެ. އެއީ 12 މެންބަރުންނެވެ.