ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު، ރޮޒައިނާ އާދަމްގެ ދައިރާއިންވެސް ޕީޕީއެމް/ޕީއެންސީގެ ކެންޑެޑޭޓް ޑރ. މުހައްމަދު މުޢިއްޒު ކުރި ހޯއްދަވައިފިއެވެ. 

ރިޔާސީ އިންތިހާބުގެ ފުރަތަމަ ބުރުގެ ވޯޓުލުން އިއްޔެ ނިމިފައި ވާއިރު، އެ އިންތިހާބުގައި މީގެ ކުރިން އެމްޑީޕީން މެޖޯރިޓީ ނަގަމުންއައި ވަރަށް ގިނަ ރަށްތަކާއި ސިޓީތަކުން ޕީޕީއެމް/ޕީއެންސީން ވަނީ ކުރި ހޯދާފައެވެ. 

އެގޮތުން، މީގެ ކުރިން އެމްޑީޕީ އެންމެ ބޮޑުކޮށް ނަގަމުން އައި، މާލެ ސިޓީ, އާއި އައްޑޫ ސިޓީގެ، ދާދި ފަހުން ސިޓީ އަކަށް ބަދަލު ކުރި ތިނަދޫ ސިޓީގެ އިތުރުން ފުވައްމުލަކުން ވެސް ކުރި ހޯއްދެވީ ޕީއެންސީގެ ކެންޑިޑޭޓެވެ. 

Advertisement

މީގެ ތެރޭގައި، ރައްޔިތުންގެ މަޖިލީހުގައި އެމްޑީޕީ ތަމްސީލުކުރައްވާ މެންބަރުންގެ ދާއިރާތައްވެސް ހިމެނޭކަން ފާހަގަކޮށްލަންޖެހެއެވެ. އެގޮތުން، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ އެންމެ އަރިސް އެއް ބޭފުޅެއް ކަމުގައިވާ އައްޑޫ މީދޫ ދާއިރާގެ މެންބަރު ރޮޒައިނާގެ ދާއިރާއިން ކުރި ހޯއްދެވީ މުޢިއްޒުއެވެ. ރޮޒައިނާގެ ދާއިރާއިން ގާތްގަނޑަކަށް 845 ވޯޓު ޑރ. މުޢިއްޒު ހޯއްދެވި އިރު، ރައީސް ޞާލިހު އަށް ލިބިލެއްވީ 817 ވޯޓެވެ. 

ރޮޒައިނާގެ އިތުރުން، މެންބަރު އިބްރާޙީމް ޝަރީފު (މަވޯޓާ ޝަރީފު) ގެ ދާއިރާ ކަމުގައިވާ މަރަދޫ ފޭދޫ ދާއިރާއިންވެސް ކުރި ހޯއްދެވީ މުޢިއްޒުއެވެ. 

އެހެންކަމުން މީގެ ކުރިން 2018 ވަނަ އަހަރު ރަން ރީނދޫ ކުލައިން ޖަރީކޮށްލި ދާއިރާތައް މިފަހަރު ވަނީ ޕީޕީއެމްގެ ފިޔާތޮށިކުލައިން ފުރާލާފައެވެ. މިޢީ ޑރ. މުއިއްޒަށް ލިބިލެއްވި ވަރަށް ބޮޑު ކާމިޔާބީއެއް ކަމަށް ގިނަ ސިޔާސީ ތަޖުރިބާކާރުން އަންނަނީ ބުނަމުންނެވެ.