ޕީޕީއެމް ޕީއެންސީގެ ސަރުކާރެއްގައި ދިވެހިގައުމުގެ އިގްތިޞާދު ވެއްޓިފައިވާ ވަޅުގަނޑުން ނަގައި ކޮޅަށް ޖަހާނެ ކަމުގައި އެ ކޯލިޝަންގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ.
ރިޔާސީ އިންތިހާބުގެ ފުރަތަމަ ބުރުގައި އިދިކޮޅު ކޯލިޝަނަށް ލިބުނު ކާމިޔާބީ ފާހަގަކުރުމަށާއި ދެވަނަ ބުރުގެ ކެމްޕެއިން ފެށުމުގެ ގޮތުން އާރޓިފިޝަލް ބީޗުގައި މިރޭ ކުރިއަށްގެންދާ "ޝުކުރިއްޔާ ދިވެހިން" ޖަލްސާގައި ވާހަކަ ދައްކަވަމުން ޑރ މުއިއްޒު ވިދާޅުވީ، ކުދި ވިޔަފާރިތައް ވަނީ ބަނގުރޫޓުވެފައި ކަމަށާއި މެދު ފަންތީގެ އަދި ބޮޑެތި ވިޔަފާރިތައް ރަނގަޅަށް ކުރިއަށް ނުދާ ކަމުގައި ވިދާޅުވެފައެވެ.
" އަޅުގަނޑުމެންގެ އިގްތިސާދުގެ އަސާސްތައް ވަނީ މުގުރާލާފައި، މިކަންކަމާ އެއްބަސް ނުވާތީ ރައްޔިތުން އިއްޔެ ނިކުމެ އެ ނިންމުން އެ ނިންމެވީ"
ޑރ މުހައްމަދު މުއިއްޒު
އެގޮތުން ހުރިހާ ދިވެހިންވެސް މި ގައުމުގެ ޒުވާނުންނަކީ ފުދުންތެރި ބަޔަކު ކަމުގައި ހެދުމަށް ބޭނުންވާކަން ފާހަގަ ކުރައްވައި ޑރ މުއިއްޒު ވިދާޅުވީ، މި ގައުމުގެ ޒުވާނުންނަކީ ބިތް ޖެހިފައި ތިބޭ ޒުވާނުންނަށް ވާކަށް އެއްވެސް މީހެއް ބޭނުން ނުވާނެ ކަމަށެވެ.
އެހެންކަމުން ޑރ މުއިއްޒުގެ ވެރިކަމުގައި ޒުވާނުންނަކީ ފަހުރުވެރި ޒުވާނުންނަަށް ހައްދަވައި ދެއްވާނެ ކަމުގައި އެމަނިކުފާނު ވިދާޅުވިއެވެ. މީގެ އިތުރުން މި ގައުމުގެ އިސްރަށްވެހިންނަކީ މި ގައުމު މިހާ ހިސާބަށް ގެނެސްދިނުމުގައި އެންމެ މުހިއްމު ދައުރެއް އަދާކުރެއްވި ބައެއްކަން ފާހަގަކުރައްވައި މުއިއްޒު ވިދާޅުވީ، އިސްރަށްވެހިންނަށް މިގައުމުގެ ކަންކަން ނިންމުމުގައި އަބުރު ވެރިކަމާއެކު ބަސްބުނެ ގައުމަށް ހިދުމަތް ކުރުމުގެ ފުރުސަތު ހޯދައިދޭނެ ކަމަށްވެސް މުއިއްޒު ވިދާޅުވިއެވެ.
މީގެ އިތުރުން މުއިއްޒު ވިދާޅުވީ ރާއްޖޭގެ މަސްވެރިކަން މިހާރު ސަރުކާރުން ވަނީ ބޮޑު ވަޅުގަނޑަކަށް ވައްޓާލައިފައި ކަމަށާއި އެ އަނދަވަޅުން އެ ސިނާއަތް ނަގައި އެ ސިނާއަތުގައި މަސައްކަތް ކުރާ އެންމެ ފަރާތްތަކަކީ ފުދުންތެރި ބައެއްކަމުގައި ހަދައިދެނޭކަމަށެވެ.
Advertisement
This content is created and paid for by advertisers and does not involve Voice Journalists
