ރިޔާސީ އިންތިހާބުގެ ދެވަނަ ބުރުގައި ޕީޕީއެމް ޕީއެންސީ އާއެކުގައި ގުޅިގެން މަސައްކަތްކުރުމުގެ ދައުވަތު، އިންތިހާބުގެ ފުރަތަމަ ބުރުގައި އެންމެ ގިނަ ވޯޓު ހޯއްދެވި ޑރ މުހައްމަދު މުއިއްޒު ސިޔާސީ ހުރިހާ ޕާޓީތަކަކަށް ދެއްވައިފިއެވެ.
އިންތިހާބުގެ ފުރަތަމަ ބުރުގައި ލިބުނު ކާމިޔާބު ފާހަގަކުރަން މިރޭ އާޓިފިޝަލް ބީޗުގައި ބޭއްވި ޖަލްސާއެއްގައި މުއިއްޒު ވިދާޅުވީ އެ މަނިކުފާނު ކުރައްވަމުން ގެންދަވާ ގައުމީ މަަސައްކަތުގައި ބައިވެރިވުމަށް އެހެން ހުރިހާ ޕާޓީތަކަށް ދައުވަތުދޭ ކަމަށެވެ. ޕީޕީއެމް ޕީއެންސީން އިސްކުރާނީ ރަހުމަތްތެރިކަމުގެ އަތްކަމަށާއި ގައުމުދެކެ ލޯބިވާ ހުރިހާ ރައްޔިތުން އެ އަތުގައި ހިފުމަކީ އޭނާގެ އެދިލެއްވުމެއް ކަމުގައި މުއިއްޒުވަނިީ ވިދާޅުވެފައެވެ.
އަޅުގަނޑު އިސްކުރާނީ ރަހުމަތްތެރިކަމުގެ އަތް. އަޅުގަނޑު މި ދިއްކުރާ އަތުގައި އަޅުގަނޑު އެދެން ގައުމުދެކެ ލޯބިވާ ހުރިހާ ސިޔާސީވެރިން ހިއްޕެވުމަށް
ޑރ މުހައްމަދު މުއިއްޒު
މީގެ އިތުރުން މުއިއްޒުވަނީ ގައުމު އިސްކޮށް ގައުމުގެ ބަހާތައް އިހްތިރާމް އަދާކޮށް ގައުމުގެ މިނިވަންކަމަށް އިހްތިރާމް އަދާކުރާ ގައުމުގެ ތަރައްގީގެ ކަންކަން ކުރިއަށް ގެންދިއުމުގައި އެއް ވިސްނުމަކަށް އަންނަ ގައުމުގެ ކޮންމެ ރައްޔިތަކީ ހަމަހަމަ ރައްޔިތެއް ގޮތުގައި ދެކޭ ކޮންމެ ސިޔާސީ ވެރިއަކާ އެކުގައި މަސައްކަތް ކުރާނެ ކަމުގެ ޔަގީންކަން ދެއްވާފައެވެ.
މުއިއްޒު ވިދާޅުވީ މިއަދު އިސްކުރަންވީ ގައުމުކަމަށާއި ގައުމަށް އެންމެ ރަނގަޅު ގޮތަކީ އޭނާއާއެކު މަސައްކަތްކުރަން ހުރިހާ ޕާޓީއަކުން ވެސް ނިންމުންކަމަށެވެ. އަދި ސިޔާސީ ފިކުރަށްވުރެ ބޮޑަށް ގައުމީ ފިކުރު އިސްކުރަންޖެހޭ ކަމަށް ތަކުރާރުކޮށް މުއިއްޒު ވިދާޅުވިއެވެ.
އެގޮތުން މުއިއްޒު ވިދާޅުވީ، ދިވެހި ރައްޔިތުން ގައުމުދެކެ ލޯބިވާކަން އިއްޔެ ދައްކުވައިދީފިކަމަށާއި ދެވަނަ ބުރުގެ ވޯޓުނަގާ ސެޕްޓެމްބަރު 30ވަނަ ދުވަހު މާ ބޮޑަށް އެކަން ދައްކާނެކަމުގެ ޔަގީންކަން އޮތްކަމުގައެވެ.
އިއްޔެގެ ރިޔާސީ އިންތިހާބު 46 އިންސައްތައިގެ ނަތީޖާއަކާއެކު ކުރި ހޯއްދެވީ މުއިއްޒެވެ. ދެވަނައިގައި ރައީސް އިބްރާހިމް މުހައްމަދު ޞާލިހު ހޯއްދެވީ 39 އިންސައްތައެވެ.
Advertisement
This content is created and paid for by advertisers and does not involve Voice Journalists
