އިންޑިޔާގެ ބޮޑު ވަޒީރު ނަރެންދްރަ މޯދީ އިންދިޔާގެ ނަން "ބާރަތް" އަށް ބަދަލު ކުރަން އުޅޭ އުޅުމަކީ މާނައެއް ނެތް ކަމެއއް ކަމަށް އިންޑިޔާގެ އިދިކޮޅު ލީޑަރު ރާހުލް ގާންދީ ވިދާޅުވެއްޖެއެވެ.
ޔޫރަޕަށް ފަސް ދުވަހުގެ ދަތުރެއް ގައި ވަޑައިގެން އުޅުއްވާ ރާހުލް ގާންދީ އަލްޖަޒީރާއަށް ވިދާޅުވެފައިވަނީ މޯދީ އިންޑިޔާގެ ނަން "ބާރަތް"އަށް ބަދަލު ކުރަން އުޅޭ އުޅުމަކީ މާނައެއް ނެތް ކަމެއް ކަމަށެވެ.
ރާހުލް ގާންދީ އިންޑިޔާގެ ނަން "ބާރަތް" އަށް ބަދަލު ކުރުން ސިފަކޮށްފައިވަނީ ދެބޯގެރި ދުއްވުން ފަދައިންނެވެ.
ރާހުލް ގާންދީ ވިދާޅުވެފައިވަނީ އަދާނީ ގްރޫޕްގެ މައްސަލަތަކުގެ ވާހަކަތއް މީޑިއާތަކަށް ތިލަވާ ވަގުތު ކޮންމެވެސް ޑްރާމާއެއް ޖައްސައި އެކަމުން މީހުންގެ ސަމާލުކަން ދުރަށް ޖައްސަން މަސައްކަތް ކުރާ ކަމަށާއި މިވެސް އެފަދަ ކަމެއް ކަމަށެވެ.
ކޮންގްރެސް ޕާޓީގެ ލީޑަރު ރާހުލް ގާންދީ ވިދާޅުވެފައިވަނީ މޯދީ ބޮޑެތި އިންޑާސްޓްރިއަލް ކުންފުނިތަކަށް ޚާއްސަކަމެއް ދޭ ކަމަށާއި އެފަދަ އިންޑަސްޓްރިއަލް ކުންފުނިތަކުން ކުރަމުން އަންނަ ކަންކަން ތަހްޤީޤުކޮށް ހަޤީޤަތް ދެނެގަންނަން ޖެހޭ ކަމަށެވެ.
އަދާނީ ގްރޫޕަކީ އިންޑިޔާގެ ކަނޑުގެ ބަނދަރުތަކާއި އެއަރޕޯޓްތައް އެންމެ ގިނައިން އޮޕަރޭޓް ކުރާ ކުންފުންޏެވެ. ދާދި ފަހަކުން ވެސް އަދާނީ ގްރޫޕްގެ ޓެކްސް ފައިސާގެ މައްސަލަތަކެއްގެ ވާހަކަތައް އިންޑިޔާގެ މީޑިއާއަށް ތިލަވެފައިވެއެވެ.
މީގެ އިތުރުން ރާހުލް ގާންދީ ވިދާޅުވެފައިވަނީ މޯދީ މިހާރު ކުރަމުން މިދާ ކަންކަމަކީ އިދިކޮޅި ޕާޓީތައް އެކުވެ މިފެށޭ އަހަރު އޮންނަ އިންތިޚާބުގައި މޯދީ އާއި ދެކޮޅަށް ވާދަކުރުމަށް ނިންމުމާއި ގުޅިގެން "ޕެނިކް" ވެގެން ކުރަމުންދާ ކަންކަންކަމަށެވެ.
Advertisement
This content is created and paid for by advertisers and does not involve Voice Journalists
